قلبي بيوجعني !!..

[إلى حب الله]

قلبي بيوجعني !!..
بقلم : أبو حب الله ..


><>< قولتو دعاء دخول المسجد يا ولاد ؟..
>< طبعا ًقولناه ..! يمكن قبلك كمان ..!

><>< طب شوفولنا مكان نصلي فيه ركعتين تحية المسجد في الزحمة دي ..

>< تحية مسجد إيه بس يا والدي !!.. هِنا تحية المسجد هيا الطواف علطول !

><>< ما شاء الله عليك يا وليد .. غلباوي من يومك ومستقصد أبوك !

> إلا صحيح يا أمي .. هو ليه وليد مستقصد أبي علطول كده ؟!

><> هو مش مستقصده ولا حاجة يا تامر .. بس هما بيحبوا يهظروا مع بعض !

><> بس بقى يا ولاد عشان إحنا وصلنا الصحن أهوه ..
---


><>< احفظوا بقى .. إحنا دخلنا من باب الملك فهد عشان بعد الطواف ..

>< مش هايفدنا بحاجه يا والدي .. لأن بعد الطواف هانخش باب المسعى ..

><>< طيب يا فالح .. شوفولنا بقى بداية الطواف منين .. مش المفروض كنا
استنينا مشرف العمرة زي ما قال ؟.. أنا شايف كان هايبقى أحسن ..

>< نستنى أكتر من كده إيه يا والدي !!.. دي ليلة سبعة وعشرين ..
والناس من ساعة ما التراويح خلصت وهيا عماله تزيد ما شاء الله !!..
قرارنا بالعمرة دلوقتي صح .. والحاجه اللي مش عارفنها نسأل ..

><>< السلام عليكم يا أخي .. لو سمحت .. هيا بداية الطواف منين ؟..

>-- وعليكم السلام : شايف ركن الكعبة اللي جاي ده : من عنده كده
وف مكان ما الناس بترفع إيديها : ده ركن الحجر الأسود : بداية الطواف ..

><>< شكرا ً.. جزاك الله خيرا ً.. ياللا يا ولاد ..

--------
-----------------

><>< أهو احنا كده قصاد الحجر الأسود بالظبط ..
إيه الزحمة دي كلها ؟!!..

><> ليلة سبعة وعشرين رمضان !!.. هاتكون عاملة إزاي يعني يا حسام ؟!

><>< ياللا إرفع إيدك يا تامر وقول : بسم الله والله أكبر ..

> بسم الله والله أكبر ..

>< بسم الله والله أكبر ..

><> بسم الله والله أكبر ..> أبي .. هوا مين اللي هايعد ؟!!..

><>< هه !!.. وليد طبعا ً!.. هوه اللي فايق ورايق ع الآخر الليلادي ..

>< واشمعنا أنا !!.. ولا عشان لما اتلخبط تقولوا وليد اللي لخبطنا ؟!..

><>< خلاص خلاص .. أنا اللي هاعد .. كل شوط هاعده على صوابعي ..
خليك بس جنب والدتك قدام .. وأنا وتامر وراكم أهوه .. خالو بالكم ..
أنا هامسك في شنطتك يا أم وليد .. وأنت امسك في إحرام وليد يا تامر ..
يا للا .. على بركة الله .. الشوط الأول ..

--------
-----------------

زمان آخر : قبل إفطار ليلة سبع وعشرين رمضان بساعة ..

مكان آخر : الأسكندرية – مصر ..

---------
-----------------

>< أمي .. أكياس البسكوت الفاضية دي جَيا منين ؟!!..

><> هه !!.. دي .. دي كنت باعمل ليكو بيها حاجه حلوه من امبارح ع الفطار !

>< إنتي برضه ؟! ولا والدي ؟! عيب عليكي يا أمي ما تكدبيش وانتي صايمة !
أنا اللي مفضي كيس الزبالة إمبارح بالليل !!.. وما كانش فيه الحاجات دي !

><> يعني إيه يعني يا وليد ؟!.. إنتا مش مصدقني للدرجاتي ؟!!..

>< يا أمي أنا ما بقيتش صغير !!.. أنا عارف إن والدي هو اللي بياكلهم قبل
الفطار في أوضته وفي الحمام كمان !!.. ليه هوه بيعمل كده ؟!!.. وليه إنتي
بتضحكي عليا ؟!!..

><> أنا مش بضحك عليك ولا حاجه يا وليد .. إهيء إهيء .. أنا قولتلك قبل
كده إن والدك قاللي عنده ظروف خاصة .. إهيء إهيء .. ومش بيقدر يصوم ..

><>< إيه يا سي وليد .. مزعل والدتك في إيه ؟.. صوتكوا جابني من جوه !

>< والله يا والدي إنت اللي مزعل الكل !.. أنا مش عارف بس أقول لك إيه !
ليه بتعمل فينا كده ؟!!.. ليه ؟!!..

><>< هوه فيه إيه يا أم وليد ؟!.. ماله الولد ده ؟!..

>< بس لو سمحت بس ما تقولش ولد .. روح شوف مين اللي بيفطر في نهار
رمضان زي العيال الصغيرة : وابقى تعال اتكلم ..!
أنا زهقت خلاص !!.. ومش عارف أقول إيه واللا أقول اللي عايز أقوله إزاي ؟!
أنا خارج ويمكن ما جيش ع الفطار ..

><> استنى يا وليد .. استنى يا ابني هنا ..><>< استنى يا وليد .. أنا اللي خارج ......
فعلا ً.. اللي فطران : المفروض هوه اللي ما لوش نصيب في الفطار معاكو ..
السلام عليكوا ..طرااااخ

--------
-----------------

><>< كده شوط .. هانبدأ التاني أهوه .. استعدوا ..

> إنت ليه يا والدي ما بتقراش من كتيب الأدعية زينا ؟!..

><>< عشان أنا بيني وبين ربنا كلام كتير عايز أقوله يا تامر .. ومش هلاقيه
في كتاب .. يا للا يا أم وليد .. يا للا يا ولاد ارفعوا ايديكو .. بسم الله و ......

>< حيلك حيلك يا والدي !!.. هو رفع الأيد كل شوط وللا إيه !!..

><>< أيوه بقى يا شيخ وليد !.. دي بقى : أنا متأكد منها زي ما أنا شايفك
قصادي أهوه !!!.. لأني لسه قاريها من شويه .. عندك اعتراض ؟!..

>< طيب طيب ما تزعلش .. والله يا والدي أنا بهزر معاك .. إنت حامي معايا دايما ً
كده ليه ؟!!..

><> يا جماعة ركزوا في الطواف .. إنتو مش حاسين بالهيبة دي واللا إيه ؟!

><>< الصراحة أنا كل أما أبص للكعبة : جسمي كله بيقشعر !!..
بحس إن قلبي كده : قلبي كده .. مش عارف أوصف الشعور ده ! سبحان الله !
بحس إني عايز أبكي .. بس مش قادر ..

--------
-----------------

><>< قلبي بيوجعني ...........!

مش عارف أروح لمين خلاص ..! أو حتى حاقولوا إيه ؟!!!..

يااااااه .. حاسس إن دماغي هاتنفجر !!..
نفسي أخبط دماغي في أي حيطه : في أي حاجه : وبعدين أنام !!..
نفسي أنام !!..

نفسي في زرار في المخ : أتك عليه : يوقف مخي شويه وارتاح وأنام !!..
إيه اللي انا فيه ده ؟!!!..
معقوله في حد زيي كده ؟!!!..
المصيبة إن ما فيش حد في منتدى الملحدين معايا بيقول كده !!!..
بس كل اللي بيأسلم منا في منتديات المسلمين بيقول كده !!!..
إيه وجع الدماغ اللي ما بيبطلش يوم ده ؟!!..
معقولة يكون زمايلي الملحدين واللادينيين برضه كده بس مخبيين زيي ؟!

معقولة يكون اللي انا فيه ده هو فعلا ًضريبة التمرد على وهم الدين ؟!!!..
معقولة الألم ده كله : علامة نجاح إنساني كبير : وعظمة تفكير ؟!!!..

معقوله اللي خرج من الوهم : ومن عنق الزجاجة : وطلع بره دايرة الدين
دي : يبقى هوه اللي عقله تعبان : ومتشحطط زيي كده ؟!!..
معقولة الجهلة اللي غرقانين في الوهم : مرتاحين ولا في دماغهم حاجه ؟!
واحنا اللي نبقى تعبانين ؟!!..

لو كنت لسه مسلم وهارد بالقرآن كنت قلت عليهم :
" ذرهم في طغيانهم يعمهون " !!.. أو حتى كنت قلت فيهم :
" ذرهم يأكلوا .. ويتمتعوا .. ويُلههم الأمل : فسوف يعلمون " !!..

لكن أنا عارف إن الكلام ده : مش لينا احنا ..! ده المفروض : علينا احنا !!..
ده المفروض يتقال للي مش شايفين إن فيه حياة بعد الموت وحساب !!..
يعني المفروض هما اللي يوصفونا كمان ويقولوا علينا :
" يتمتعون : ويأكلون كما تأكل الأنعام : والنار مثوىً لهم " !!!..

أووووف !!.. النار ..!
جسمي بيقشعر لما بتيجي سيرتها !!..

هو الدين ده ما فيهوش رحمة ليه ؟!!.. يعني ما لقاش غير النار دي : هيا
اللي يكون بيها العذاب ؟!!..
يعني مافيش مثلا ًفرصة تانية ؟!!.. مافيش مثلا ًخلاص : اتعلمت غلطي ؟!!..
خلاص : عرفت وشوفت ؟!!.. خلاص : مش هاعمل كده تاني ؟!!!..

اللا اللا اللا !!.. إنت هاتخيب يا عم حسام واللا إيه ؟!!!..
معنى كلامك ده إن في احتمالية عندك إن فيه إله ؟!!.. لأ إصحى ...!
إنت فاكر لما قلت من تلت سنين إنك خلاص اقتنعت بالإلحاد ومش راجع للدين
تاني ؟!!!..
آه أنا ما بدأتش أظهر ده في البيت أللا السنه دي بس : لكن بالفعل أنا من
تلت سنين : وأنا ملحد خلاص من جوه !!!..

آآآآآآه .. مش عارف الحقيقة والله !.. أنا تعبت ع الآخر !!..
دماغي هاتتفرتك خلاص من كتر التفكير !!.. ساعات بحس إني هاتجنن
خلاص !!.. بكلم نفسي !!.. وبرد على نفسي !!.. وللا يمكن الشيطان
هو اللي بيكلمني ؟!!.. مش عارف ..!

أنا مش قادر حتى أمشي ..!
هو الكورنيش ما بانشي لحد دلوقتي ليه ؟!!!..
الناس بينزل وزنها في رمضان من الصوم .. وأنا بقالي تلت سنين وزني بيقل
من التفكير !!.. يعني لو محصليش حاجه في دماغي : أكيد هايحصلي حاجه
ف جسمي !!!..

يااااااه .. ما كنتش فاكر إن الإلحاد ده متعب كده !!!..
هو أنا ألحدت عشان أتعب ؟!.. واللا عشان أرتاح ؟!!!!..

--------
-----------------

><>< ياااااااه .. ما كنتش عارف إن الكعبة بالجمال ده !!..
وخصوصا ًبالليل كده !!.. كل أما أبصلها : أحس إن فيها شيء روحاني عجيب !

><> بس الزحمة بعد صلاة التراويح فظيعة الصراحة يا حسام !!.. أنا ما كنتش
فاكراها حتبقى للدرجة دي !!..

> يا اللا يا والدي عشان قربنا على نهاية الشوط .. هو اللي جاي ده الشوط
الكام ؟؟..

><>< هه ..! استنى أما اشوف أنا مطبق كام صباع ؟.. اتنين .. يبقى اللي جاي
ده هيبقى التالت إن شاء الله ..-- يا حاج .. يا حاج ..

><>< أيوه يا أخي : فيه حاجه ؟!!..

-- إنت عاكس لبس الإحرام في الطواف يا حاج !!.. المفروض كتفك
اليمين هوه المكشوف مش الشمال !!..
><> يا دي الفضايح !!..

><>< شكرا ًيا أخي !.. جزاك الله خير ..

>< يعني بس كل ما حد فينا يقولك حاجه تقوله : قاري قاري ! قاري إيه بقى ؟!

><>< إيه يا جماعة !!.. إنتو ما صدقتوا واللا إيه ؟!.. طبعا ًأنا عارف السُنة
دي .. بس رهبة المكان طبعا ً ليها مفعول ..! مش كده ولا إيه ؟!..
يا للا .. الشوط التالت ..

--------
-----------------

><>< آآآآآآآه يا بحر !!.. قلبي بيوجعني ...................................!

أنا بقيت مستودع شبهات !!.. حاسس إني لو طلعت كل الشبهات اللي جوايا :
ممكن تملاك كلك يا بحر !!..

إيه ده ؟!!.. أنا إزاي بقيت كده ؟!!.. والغريبه إن كلها بس : ضد الإسلام !
وفي الإسلام !!.. هل ده عشان أنا كنت مسلم ؟!!!..
ليه كل اللي في المنتدى بيشتموا وبيجيبوا شبهات بس عن الإسلام ؟!!..
وليه بس المسلمين : هما وحدهم اللي بيقدروا يردوا علينا ؟!!!..
فين النصارى والشيعة وغيرهم وغيرهم ؟!!!..
هما دول ما لهومش أهمية مع الإلحاد واللا إيه ؟!!..

آآآآآآآه .. حاسس بتوهان من كتر الشبهات اللي حاطيتها على عيني ! مش قادر !
سنين وأنا قلبي مفتوح بس : لكل شبهة !!..

في الأول كانت الشبهات هيا اللي بتيجي في طريقي : عشان تقولي الدين غلط !
أما دلوقتي ...
حاسس إني بقيت زي المغناطيس الكبير اللي بيلف النت رايح جاي : عمال يجمع
شبهات من هنا وهناك : بس : عشان يثبت إن الدين غلط !!!..

المصيبة إن من ساعة ما بقيت أحتك بمسلمين فاهمين : بدأت أحس بالهزة
للأسف !!.. أيوه يا بحر !...
هزه بتزلزل كياني كله : وبتزيد كل ما يوضحولي تفاهة الشبهات اللي بجيبهالهم !
إنت معايا يا بحر ؟؟...

فعلا ً.. خلوني أحس بقيمتي الحقيقية !!!.. أنا لا شيء يا بحر !!.. حقيقي ..!
كل مره بيثبتولي إني مش فاهم حاجه ولكن : جامع وناقل ومترجم وبس !!!..

كل اللي كنت طالع بيه السما من الشبهات : وفاكر إنها جديدة عليهم :
معاهم : بينزلو بيها سابع أرض !!!..
بيحسسوني إني مضحوك عليا يا بحر !!!..

هل هيا دي فعلا ًالحقيقة يا بحر ؟!!!.. إني مضحوك عليا ؟! مش عارف ..!
مش عارف أي حاجه يا بحر .....!

في الأول : كنت بستريح لما أخش منتدى الملاحدة دول ...!
كنت بقول كل اللي ما قدرش أقوله قصاد حد !!!..
أسأل كل الاسئلة اللي في دماغي : وما خافش من حد !!!..

كنت بقول حاجات لو سمعها مسلم : ممكن يموتني !!..
كنا بنشتم وننقد ونعترض براحتنا : على أي حد !!!..
ونتهم : أي حد ....!
ونكدّب : أي حد .....!
لحد ما بقيت : مش مصدق حد ......!
أي والله يا بحر .......!

اللي كنت فاكرهم أعلام في الإلحاد : ومنورين المنتدى بفكرهم الحر :
شوفت إزاي كل اللي كانوا بيعتمدوا عليه في شبهاتهم : أوهام !!..
شفت إزاي طلعوا هما كمان زيي يا بحر !!!..
مش فاهمين أي حاجه !!..
شفت إزاي كل الشبهات اللي معاهم : زي حالاتي : فالصو !!..

طب ليه ما سيبتهومش ؟!!.. مش عارف برضه يا بحر ....؟!
يا ريت إنت تقولي ؟!!!..

المشكلة إن كل ما شبهاتهم تتفرم قدامي في منتديات السلفيين دول :
يطلعلي بدل الشبهة : عشرة من جديد ؟!!!..

عارف .....
ساعات بحس إنهم زيك يا بحر .......!
كل ما موجه منهم تخلص : وتنتهي على ما فيش ع الشط :
تيجي وراها موجه من جديد !.. أو حتى عشره !!!..

استنى كده .. يمكن هو ده اللي مخليني لازق فيهم لحد دلوقتي ؟!!..
هل أنا بقيت : مدمن شبهات يا بحر ؟!!..
هل أنا متمسك بيهم بس لأني : مش قادر أبعد يا بحر ؟!!!..
مش قادر أبطل ؟!!!..
كل ما خش النت : أجري علطول أشوف إيه آخر الشبهات عندهم ؟!!!..

أيوه صح !.. أكيد هوه ده تشخيص حالتي فعلا ً...!
لأني بقالي مده كبيره حقيقي : ما بكتبش أي حاجه في منتدى الملحدين !!!..
أنا بس بقيت متفرج !!.. بقيت صندوق كبير : وبابه مفتوح للأسف !!!..
بس الظاهر إن قعر الصندوق ده مخروم يا بحر !!!..
عارف ليه ؟!!!..
لأنه ما بيتمليش أبدا ًللأسف !!!..

عارف أنا نفسي في إيه يا بحر ......؟!!..
نفسي أبعد ....!
أبعد بعيد قوي : عن كل شيء !!!..
نفسي أرجع طفل صغير ..!
ولو حتى طفل اد ابني تامر كده !!.. لعب وضحك وبس !!!..
مش عايز أعرف حاجه !!.. مش عايز أفهم حاجه !!.. بس إزاي ؟!!..

أنا سر عذابي شايله جوايه يا بحر !!!..
عقلي اللي ما بيبطلش تفكير ده !!!..
وهيا دي المشكلة الحقيقية : إزاي هاخلص من شيء وهو جوايا ؟!!..
كان في الأول بيفكر ساعات وساعات .. أما دلوقتي خلاص !!.. ما بيوقفش !
ما بقاش يبطل تفكير !!!..

عامل زي اللي النار مسكت فيه : وهوا شايفها وهيا بتاكل جسمه حته حته :
ومش قادر يطفيها !!!.. بل للأسف : بتزيد !!.

أكيد أنا اتجننت عشان باتكلم معاك يا بحر ...!
صح ؟.. موافقني على كده ولا لأ ؟!!..

شايف الراجل اللي جايب أكل جاهز ده : وبيجري هناك قبل مدفع الإفطار :
نفسي اكون زيه يا بحر !!!..
ما يهمنيش هوا إيه .. ولا دينه أيه .. أنا عايز بس أبقى مشغول بحاجه :
وفرحان بيها !!.. وبعملها وأنا مبسوط !!!..
عايز راحة القلب يا بحر .....! عايز اضحك تاني بحقيقي لنفسي يا بحر ....!

قلبي بيوجعني .....!

عايز أبعد يا بحر ..
عايز أبعد بعيد عن عقلي وقلبي ......!
ممكن ؟؟..

--------
-----------------

><>< ابعدي يا أم وليد كده شويه !!.. إنتي مايله ناحية الناس كده ليه ؟!
أمال أنا مخليكوا تطوفوا من بعيد ليه وما اتزاحمناش جوه ؟!!!..

><> إيه يا حسام ؟!!.. ما أنا بعيد أهوه !!..

><>< لا مانتش بعيد !!.. عيب على واحده مغطيه وشها زيك كده تقرب من
الناس بالشكل ده !!.. إنتي مش حاسه بنفسك ولا إيه ؟!!..

><> معلش يا حسام .. والله فعلا ًأنا مش حاسه بنفسي تقريبا ً!!.. كل اللي
حاساه بس : إني عايزه أقرب من الكعبة أكتر !!!..

>< نعمل إيه في الزحمة بس يا أمي .. داحنا يدوب بنطوف من آخر مسافة
حولين الكعبة !!.. كنت متخيل إن ممكن نقرب من الحجر الأسود في كل شوط !
لكن كل ده دلوقتي بقى أحلام !!.. أنا حاسس إن فيه أكتر من ميت ألف واحد
بيطوفوا معانا !!!..

> أبي : دي اللفه الكام دلوقتي ؟؟..

><>< إيه لفه دي يا تامر !.. اسمه شوط ..! إحنا في نهاية الشوط الثالث أهوه ..
واللي جاي ده الرابع ...
وانتي يا ست هانم بدلي مكانك .. هاتي وليد هو اللي جوا .. وانا وانتي خلينا
ناحية بره ...
يا للا .. الشوط الرابع أهوه ..

--------
-----------------

-- تشرب حاجه ساقعه ؟..

><>< هه !!.. لا شكرا ً.. ما ليش نفس !!..

-- طب تيجي تجرب حظك معانا ؟!..
تعالا شوف هاتقف قد إيه ف وسط الطريق : لحد ما عربيه تعدي ؟!

><>< أقف ف وسط طريق الكورنيش !!.. إنت اتجننت يا ابني ؟!!!..
خلي بالك .. أنا عمري مش صغير لو كنت شايف كده !!!..
أنا ابني الكبير داخل على أولى كلية !!!..

-- خلاص خلاص يا عمو .. افتكرناك تحب تلعب معانا شويه .. ولعلمك :
خلاص المغرب هايدن .. وهاتشوف إن العربيات هاتختفي من الشارع دلوقت !

><>< لا شكرا ً.. أنا هاتفرج عليكو من هنا .. بس خلي بالكو لتجيبولنا مصيبة
في نص الطريق !!..

-- لا ما تخافش يا عمو .. إحنا من أول رمضان واحنا بنلعب هنا وقت الفطار !

استنى يا جون .. مايكل هو اللي عليه الدور .......

--------
-----------------

> ممكن تقرالي دي يا أبي ؟؟..

><>< " ربنا آتنا في الدنيا حسنة .. وفي الآخرة حسنة .. وقنا عذاب النار "
> آآآه .. أصل السطر ده ممسوح شويه ..

><> بص يا حسام الفوج الأوروبي ده .. سامعهم بيدعو إزاي ؟؟!!..

><>< سبحان الله .. شكلهم كده ألمان .. لأول مره أحس بقيمة إني باتكلم
عربي : وبقرا عربي !!..

> طريقتهم في الدعا مضحكة قوي يا أبي .. صح ؟؟..
يعني لو الراجل اللي بيقولوا وراه ده قال غلط : هايقولوا زيوا برضه !!!..

><>< بس أنت بس يكون عندك ربع حبهم للدين يا سي تامر فذلكة !!..
إنت فاكر يعني إنهم مش قادرين كل واحد يدعي في سره بلغته وخلاص ؟!!..
دول عايزين يعملوا كل حاجه : زي ما عملها أو قالها رسول الله صلى الله عليه
وسلم !!!.. ربنا يحميهم يا رب .. فكروني بالصحابي ابن عمر .. كان بيحب يقلد
حتى حركات النبي : وبيمشي في نفس الحتت اللي كان بيمشي فيها : من كتر
حبه ليه !!!..

><> سبحان الله يا حسام !!.. تحس إن وشوشهم منورة : ولا ده بس عشان
أجانب ؟؟!!..

>< يا أمي دول دخلوا الإسلام عن حب واقتناع !!!.. حب حقيقي !!!..
الواحد فيهم كأنه مولود جديد .. إنتي تعرفي إن أقصى أمانيهم في بلادهم
هيا الحج والعمرة !!!..
همّا بيحوشوا فلوس عشان ييجوا يعملوا عمرة .. واحنا شبابنا بيحوشوا
عشان يروحوا مارينا أو يسافروا يحضروا ماتش كوره !!!..

><>< يا للا يا جماعة هانت .. اللي جاي ده الشوط الخامس ..

--------
-----------------

><>< شفت يا بحر !!.. حتى النصارى بيضحكوا وبيلعبوا !!!..
أهو دول بقى : أنا متأكد مليار في الميه : إنهم على باطل !!.. بس حتى دول :
حالهم أحسن مني !!!!.. ع الأقل : عندهم شيء في حياتهم متعلقين بيه !!..
آآآه يا قلبي !!..
معقول أكون أنا اللي عامل في نفسي كده ؟!!!..

يعني كل الناس من حوليه ممكن تضحك .. ممكن تفرح .. ممكن عقلها ينشغل
بحاجه .. ونفسها تتعلق بحاجه : إلا أنا !!!.. طب ليه ؟!!..
يعني أفهم من كده إن السعاده : مش إني أخلع نفسي من كل مسؤلية وهدف ؟!

أنا كنت فاكر إن الملحد ده : وبمجرد إنه ساب الدين : هايكون زي الفراشه
الطايره !!.. لا حد هايقيد حركتها !!.. ولا حد هايمنعها من الزهرة اللي تختارها !

معقولة تكون السعادة : هيا إن يكون للإنسان هدف في الحياة ؟!!..
إن يكون عليه واجبات : وعليه حقوق ؟!!!..
هل ده بس هو سبب فرحة قلوب الناس دي ؟!!!..

طب ما أنا في حياتي العاديه وحتى من غير دين : عليا واجبات وعليا حقوق ؟!..
مش كده يا بحر ؟!!!..
لا لا لا .. أكيد مش هوه ده السبب بس .. لازم في حاجه كمان !!..
يا إما الواجبات والحقوق اللي عندي وعندهم : مش زي بعضها !!..

عارف يا بحر .. أنا يهون عليا أغرق فيك : ولا أسمع القرآن ده !!..
كل ما أسمع صوت الصلاة في المسجد اللي جنبنا : بتجنن !!..
صلاة المغرب دي : بتمنى لو الإمام يقرا في كل ركعة : قل هو الله أحد !!..

المشكلة إن الإحساس ده ما بيجليش إلا لما بشوف أي مظهر إسلامي بس !
بحس ساعتها إني عايز أهرب !!.. عايز تنشق الأرض وتبلعني !!!..
الأذان ..! اللحية ..! النقاب ..! المساجد ..! حتى الجلبية أو الطاقية البيضا !
حتى شيوخ الدين : وبالذات السلفيين دول !!..
عارف السبب إيه يا بحر ؟؟..
أنا هقولك ..

لما بشوف أي مظهر تاني غير الإسلام : زي الصليب مثلا ًوالحاجات دي :
بحس إن أنا قدامي طرق كتيره جدا ًفي الحياة : ممكن أختار أي واحد فيهم
لو أنا عايز ..
أما مع مظاهر الإسلام دي :
بحس إن ما فيش غير طريقين بس قدامي !!.. يا ابيض !!.. يا اسود !!..
يا حق !!.. يا باطل !!..
الغريبة إن الإسلام في كل مظاهره : قوي !!!..
مش ممكن تشوفها أو تسمعها أو تقراها : إلا وتحس إنه سبقك وحجز لنفسه
كرسي الحق !!.. طريق الحق !!..
وطبعا ًده معناه بكل بساطة : إنه ما سابش ليك إلا إنك على الباطل ! وطريق
الباطل !!!..
وده اللي ما بقدرش استحمله !!.. وده اللي بيجنني !!..
ومش لاقيله تفسير مقنع لحد دلوقتي !!..

طبعا ًيا بحر أنا بكلمك بكل صراحة : عشان نفسي أشوف نفسي الليلادي
ولو مره واحده على حقيقتها : من غير رتوش ولا خداع !!..

نفسي أقولك كل اللي ليا .. وكل اللي عليا !!..
بس للأسف !!.. شكلي مش هاقدر أقعد معاك أكتر من كده هنا يا بحر ...

شويه وصلاة العشا هاتبدأ كمان ..!
ومن بعدها التراويح ..!
والمساجد صوتها بيملا الكورنيش بطريقه عجيبه !!..
مش عارف هاروح فين ساعتها يا بحر : وصوت القرآن في كل مكان !!..
مش عارف !!..

--------
-----------------

> إنت قولت ده الشوط الكام يا أبي ؟!!.. السادس ولا الأخير ؟!!..

><>< هه !!..

> بقولك : ده الشوط السادس ولا السابع ؟!!.. بص كده لصوابعك ؟!!..

><>< المشكلة يا تامر إني وأنا بعدل الرداء : فكيت صوابعي !!!..

> يعني تاه منك العد ؟!!.. إلحقي يا أمي .. أبي تا ........

><>< يا واد اسكت !.. إنت علطول كده ما يتبلش في بوقك فوله أبدا ً!!..

><> إيه ؟.. فيه أيه يا حسام ؟!!.. تامر عايز إيه ؟!!..

><>< لا مافيش .. هو بس كان بيقولي إن خلاص الشوط ده هايخلص
أهوه : وهانبدأ بعديه الشوط اللي بعده ..

>< آآآه .. الشوط ده !.. والشوط اللي بعده !!.. على فكره يا والدي ..
السهو في عدد أشواط الطواف : زي السهو بالظبط في عدد ركعات الصلاة !
يعني بتبني على الأقل !.. إنت أقل حاجه فاكرها إيه ؟..

><>< ومين قاللك إني نسيت أصلا ًيا فالح !!.. مش عارف والله إنتو
مستقصدني ليه الليلادي أنت واخوك ؟!!.. ده الشوط السادس .. واللي جاي
ده : الشوط الأخير إن شاء الله !!..

>< متأكد يا والدي ؟؟..

><>< متأكد يا وليد !!..

><> متأكد يا حسام ؟؟..

><>< متأكد يا سيتي !!..

> متأكد يا أبي ؟؟..

><>< اسكت انت يا سوسه وخليك ماشي جنبي ..!

--------
-----------------

><>< يعني الواحد في الزمان ده ما يعرفش يلاقي حته يختلي فيها بنفسه ؟!
حتى الشقه عندي دلوقتي : مش هاعرف أقعد فيها ..!
أيوه كلهم بره الليلادي .. بس مش هاعرف أقعد فيها !!..
كفايه صوت المسجد اللي جنبنا !!..
وحتى لو ما فيش مسجد : أنا زهقت خلاص من قعدة البيت !!!..
بحس إني في سجن جوه السجن اللي أنا فيه أصلا ً!!.. عشان كده أنا خرجت
للبحر !..
أيوه فيه ييجي سبع أفلام أجنبيه جديده لسه ما تفرجتش عليهم ..
ولسه منتدى الملحدين فاتح بابه عشان يلمنا مخصوص الليلادي !!..
بس أنا زهقت خلاص يا بحر ..! زهقت من الملل ..! زهقت من الهروب ..!
حاسس إني بضحك على نفسي في كل يوم ..!
أنا الوحيد اللي عارف إني بضحك على نفسي : وإن قلبي بيوجعني مهما عملت !

لا ..
لازم أحدد موقفي الليلادي ...
لو أنا مش على باطل فعلا ً: طب ليه أنا مكبر المواضيع دي كده !!!..
فيها إيه يعني لما أسمع القرآن أو صوت الصلاة أو أمشي جنب المسجد !!..
ما هو يا أنا غلط : والحاجات دي فعلا ًليها حق تضايقني ..!!
يا أنا صح : وما يهمنيش احتك بالحاجات دي كلها طالما واثق من نفسي !!..

خلاص ......
يبقى أمثل إني واثق من نفسي .. ولو الليلادي بس على الأقل !!..

--------
-----------------

><> عارف أصعب حته في الطواف إيه يا حسام : هي حتة ورا المقام دي ..!

><>< هيا السُـنة كده يا أم وليد : بعد نهاية الشوط السابع : تصلي ركعتين
خفيفتين ورا مقام سيدنا إبراهيم عليه السلام ..

> بس المشكلة يا أبي إن فيه ناس قاعده هناك أو بتطول في الركعتين دول !
يعني مش يخلصوا بسرعه عشان يسيبوا فرصه لغيرهم ؟!!..
يعني مش شايفين الزحمة قدامهم إزاي ؟!!..

>< ممكن أصلا ًتصلي الركعتين دول في أي مكان في الحرم : لو مالاقيتش
مكان ورا المقام !!.. الشيخ قال كده ..

><> طب خلوا بالكو بس .. أنا لسه فيه دعاء عايزه أقوله في الشوط الأخير
ده !!..

--------
-----------------

><>< ياه .. قطه ميتة تاني ......!

دا أنا لسه شايف واحده من يومين !!..
يعني هالاقيها من صلاة التراويح اللي خرمت قلبي دي : ولا من القطط ؟!!..
هيا القطط دي ما بتخترش إلا الحتت اللي أنا هامشي فيها : وتخلي العربيات
تدوسها ؟!!!..
حتى دي كمان مستقصداني وعايزه توجع قلبي بمنظرها ؟!!..
مش كفايه إللي أنا فيه ؟!!!..

ماتبصش يا حسام .. ماتبصش يا حسام .. هاتتقرف يا حسام ..

الحمد لله .. ما بصتش !!..

أهي قطه وراحت .. يعني هاشوف إيه يعني .. شوية لحم ودم خبطتهم عربيه !
يااااااااااه .. أد كده الحياة دي ممكن تروح في لحظة ؟!!..
أكيد فيه حكمة إني أشوف المنظر ده كل فترة قدامي بالصورة دي !!!..
هل يا ترى دي رسالة ليا ؟!!..

يعني ......
هل فعلا ًلو أنا مت كده في لحظة : خبطة عربية مثلا ً أو غيرها ..
هل خلاص كده ؟!!!.. ما فيش حسام ؟!!!..
اختفى من الوجود للأبد ؟!!..
جه صدفه .. وراح بلا رجعه ؟!!..

المشكلة إن أنا مش حاسس بكده !!.. مش قادر أضحك على نفسي !!..
أنا حاسس إن الدنيا من حوليا : زي العلبه الصغيرة !!..
حاسس إن فيه حد باصصلي ومراقبني من فوق !!.. حاسس إن كل اللي اعرفهم :
اتحطوا ليا بقصد عشان اعرفهم واحتك بيهم !!..
سواء اللي بيفرحوني زي زوجتي وعيالي وأبويا وأمي .. وسواء اللي بيزعلوني !
ياااااااه .. كل دي أفكار بسبب قطة ميتة ؟!!..

جسمي بيقشعر !!.. إيه الكلام ده ؟!.. يمكن عشان كده أنا باشمئز من المنظر
ده !!.. طيب لو فيه ربنا فعلا ً: هل دي ممكن تكون رسايل منه ليا ؟!!..
مش عارف ....!

خليني أرجع للكورنيش بقى وأقضي بقيت الليلة هناك !!!..
ما هي مش فارقه ..! هنا هاسمع صوت الصلاة .. وهناك برضه هاسمعها !!..
محاولة هروب فاشلة !!.. يبقى أرجع للبحر أحسن .. أنا باستريح هناك !..

-- لو سمحت يا عم .....

><>< أيوه يا بنتي ؟!!..

-- ممكن تنزل معايا أبويا من على الكرسي المتحرك ؟..
أصله عاجز وأخرس معلشي ...

><>< يعني هوه يعني ما يقدرش يصلي على الكرسي ؟!!.. ما صلاته هاتتقبل
برضه ؟!!..

-- لأ .. هو عايز يلحق دعا ليلة القدر دي مع الناس في المسجد ..
هو جاي مخصوص عشان كده !!.. نفسه يبقى معاهم وجنبهم ..

><>< طيب يا سيتي ..
إيه ده ؟!.. هو رجليه مقطوعة ؟!!.. وازاي بقى هايخش المسجد ؟!!..
أصلا ًالمسجد ده مليان على آخره ... ثم أنا كمان ما بخشش جوه !!..

-- نزله بس معايا في الحته الفاضية دي في آخر الناس دول ... هو عايز كده !!..
ياللا قبل أما الإمام يركع ..

><>< حاضر يا سيتي ..

-- ..............

><>< سبحان الله !!!..

-- شفت هو انبسط منك ازاي لما حطيته يا عم ؟!..
ربنا يجزيك ألف خير يا رب .. شوفت أبويا بيقولك إيه بإيده :
بيشكرك ....

><>< لا ما فيش حاجه تستاهل .. بص يا عم .. لو عايز تشكرني حقيقي :
ادعيلي معاك براحة القلب ....!
أقولك :
كل أما تدعي لنفسك دعوة كويسه : ادعيلي زيها !!.. ماشي ؟..
يا للا سلام ..
خاللي بالك منه يا بنتي بعد الصلاة في خروج الناس ...

-- هو انتا مش هاتصلي معاهم يا عم ؟!!..

><>< هه ..! لأ ...

-- ليه ؟!!.. طب ما تصلي وتبقى ترجّع أبويا معايا تاني على الكرسي !!..

><>< امممم ..! أصل أنا تعبان !.. تعبان والله يا بنتي !!..

--------
-----------------

><>< الناس سبحان الله عماله تزيد في الطواف بطريقه عجيبه !!..
الغريبة إن ده المكان الوحيد في العالم اللي لا بيخلى من البشر ليل ولا نهار !

>< معظم حملات عمرة رمضان الجايين من المدينة زيينا : بيعملوا عمرتهم ليلة
سبعة وعشرين !!.. نفس التفكير طبعا ً: رغم إن كان قدامهم ليالي العشر اللي
فاتت ...

> أنا دلوقتي عرفت ليه يا أبي ما وافقتوش على اقتراحي إن نعمل عمره أول ما
جينا من المدينة : ونعمل عمره ليلة سبعة وعشرين .. فعلا ً: العمرة في رمضان
متعبة جدا ًفي الزحمة دي ..><> بص كده يا حسام ...!

><>< إيه ؟!!.. خير ...؟!!..

><> شايف الراجل على الكرسي المتحرك ده ؟!!..

><>< فين ؟..

><> اللي هناك ده .. مش تحس إنك شوفته في إسكندريه قبل كده ؟!!..
فين .. فين .. مش فاكره ..!>< لا .. وسبحان الله : رجله مقطوعة كمان ..
والله الناس دي حُجة على البني آدميين اللي معاهم مال وصحة : وما حدش
فيهم فكر يعمل عمرة ولا حج مرة واحدة في حياته !!..
صح يا والدي ؟...

><>< .................

>< فيه إيه يا والدي ؟!!..

><>< ...................

><> إنت نمت ولا إيه يا حسام ؟!.. إنت شايف الراجل اللي بنحكي عليه ؟

> أبي بيبكي يا أمي ...!

><> هو فعلا ًمنظر يبكي ...

>< أول مره في حياتي أشوف والدي بيبكي !!!..

> معلش يا أبي معلش .. خلاص بقه ..

>< خلاص بقى يا والدي .. ده أمي كمان بكت ...

><>< ..........................

--------
-----------------

><>< غريبه الراجل ده والله !!!..
يعني حتى ده كمان : لقى حاجه تفرحه في الحياه : وهو بحالته دي ؟!!!..
يا حسرتي عليا !!!..

طب ده هايكون بيدعي بإيه يا ترى ؟!!!..
رجليه : وراحت خلاص !!!..
أكيد هايدعي ربنا يغنيه !!.. وخصوصا ًوأنا شاكك إنه أصلا ًشحات هو وبنته !
على العموم : أتمنى فعلا ًإنه يكون في أحسن حال ...
كفايه إنه كان مبسوط حقيقي : وهوا جنب الناس مسنود بيدعي !!..

--------
-----------------

><> الحمد لله .. خلصنا الطواف .. هانمشي إزاي بقى يا حسام ؟!!..

> أبي بيشاور نرجع لورا يا أمي ..

>< أيوه صح .. الباب إلى المسعى ورانا أهوه ...

><> إنتو مش مركزين ليه ؟!!.. وفين ركعتين نهاية الطواف ورا المقام ؟!

>< أخ !!.. صحيح .. ! كنا هاننسى !!..
أول عمره بقا نعملها في حياتنا : ولوحدنا من غير مرشد ولا حاجه ..

><> يعني نمشي بقى لـقدام مش لورا ... صح ؟!..

>< مش احنا قولنا في الزحمة الشديدة : ممكن نصلي الركعتين دول في أي
مكان يا أمي ؟!!..

><>< تعالوا في الحته اللي ورا دي ..

><> أخيرا ًاتكلمت ..!

><>< هاصلي أنا وأمكم الأول .. وبعدين أنتوا صلوا مكاننا .. ماشي ؟..

> ماشي ...

--------
-----------------

><>< أخيرا ً!!.. الصلاة خلصت قبل حتى أما أوصل لشارع الكورنيش ..!
الحمد لله !!!..

الحمد لله ؟؟؟!!!!!!..

غريبة دي والله !!.. غريبة إن العادة في الكلام كمسلم : صعب الواحد يسيبها
كده بسهوله !!.. ما علينا ......قلبي بيوجعني !!!..

شوف حتى العيال الفقرا متلميين على اللي خارجين م الصلاة : وبياخدوا منهم
فلوس العيد بفرحه إزاي ؟!!!..
يعني كل الناس فرحانه الليلة !!.. مسلم وغير مسلم !!.. صغير وكبير !!.. الصحيح
وحتى المريض !!.. إلا أنا بس كده اللي قلبي موجوع ؟!!.. ليه ؟!!!..

طب لو قلنا مثلا ًإن دي : ضريبة عظمة الإلحاد !!!.. وإن ما فيش عظمة :
من غير تعب وتضحيات : فهل أنا فعلا ًكده ؟!!!..

لا لا لا ..!
حتى في الإسلام لما بيتكلموا عن العظمة دي : أو عظمة الإيمان : بيقولوا إن
الإنسان العظيم ده : ممكن يبقى موجوع في حياته من بره : من جسمه :
بس بيبقى في نفس الوقت : راضي وسعيد من جوه : من قلبه !!!..

يعني حتى دي كمان : ما تنطبقش عليا !!!..
بل بالعكس :
أنا يمكن عندي كل أسباب الراحة في حياتي من بره !!.. من جسمي :
بس موجوع من جوه للأسف !!.. من قلبي !!!..
ليه .........؟!..
ليـــه ............؟!!..

ياااه !.. المسجد ده أنا فاكره كويس .. كنت باجي أصلي فيه وأنا صغير ....
يا ترى لسه فيه ناس برضه عجوزه كده بيقعدوا فيه بعد الصلاة يتكلموا في
الدين : ويقروا قرآن ؟!!..

أما أبص كده من الشباك ....
أكيد المسجد فضي دلوقتي على آخره .. أكيد ما حدش فيه حيل يقعد بعد صلاة
التراويح الطويلة دي الليلة ...

يااااه .. ده لسه فيه برضه رجالة المسجد قاعدين !!.. لا وإيه : جايبين شاي
ومنظمين القعده آخر تمام !!.. آآآه : أنا نسيت إن فيه اعتكاف !!..
بس معقول !!.. في السن ده والناس دي قعده برضه في المسجد ؟!!!..

يا ترى : هما المخدوعين ولا أنا ؟!!!..

أنا كنت زمان باربط بين قعاد الناس الكبيرة في السن دي في المسجد :
وبين طلوعهم ع المعاش !!.. كنت بقول إن الفضا هوا اللي جايبهم فيه !!..
أما دلوقتي ....

فأعتقد إن قرب نهاية حياة الواحد فيهم : هو اللي بيخليه يقرب من ربه أكتر !
يعني بقت مسألة مصير حياته : يا ابيض : يا اسود !!.. وما فيش وقت للرمادي !
يا بختهم إن عندهم فرصة للرجوع أصلا ًفي العمر الكبير ده !!!..
طيب وأنا ؟!!!..
هل هايكون قدامي عمر كبير زيهم كده ممكن أرجع فيه لو كنت غلط ؟!!!..
أتمنى !!!..
ع الأقل لو كنت في إلحادي غلط : ألحق أعدل نفسي قبل ساعة الموت !!!..

يا رب ما موتشي بدري ولا دلوقتي !!!..

ياااااااه !!!.. دماغي هاتتفرتك !!..

أنا اتكلمت كتير قوي الليلادي مع نفسي !!.. حاسس إني هاتجنن خلاص !!..
مش عارف أنا باتكلم صح ولا غلط أصلا ً؟!!!..
عايز حد يُحكم عليا !!!.. يُحكم على كلامي !!!..
عايز أكلم حد !!.. أي حد !!..

-- السلام عليكم .. فيه حاجه يا أخ ؟!!!.. شايفك كده باصص من شباك المسجد
بقالك شويه !!.. فيه حاجه ؟!!..

><>< ومين بقى حضرتك ؟!!..

-- أنا إمام المسجد !!.. فيه حاجه أقدر أساعدك فيها ؟!!!.. بتدور على حد ؟!!..

><>< بدور على حد !!.. أيوه والله يا شيخ !!.. عارف بدور على مين ؟!!..

-- على مين يا أخي ؟..

><>< بدور على نفسي يا شيخ !!..

-- بتدور على نفسك !!!!.. إيه الكلام ده ؟!!..

><>< أي والله يا شيخ ما بكدبشي عليك !!.. بدور على نفسي !!!..

-- لا .. دانتا عايز قعده على رواقه ...! ممكن تيجي تقعد معايا جوه في أوضتي ؟..

><>< جوه في المسجد ؟!!!..

-- أيوه جوه .. فيه مشكله إنك تقعد معايا جوه ؟!!!..

><>< طب ما ينفعش تقعد معايا انت شويه ع الكورنيش ؟ هوا قريب من هنا ..

-- لا للأسف يا أخي .. أنا معتكف هنا في المسجد .. ولو انتا خايف إن حد يسمع
كلامنا : ما تخفش !!.. أنا أوضتي أصلا ًفي آخر المسجد : وأما باقفل الباب : ما
حدش بيسمع اللي جواها ... تعالا تعالا ما اتخفش ...

--------
-----------------

><> بص يا حسام !!.. ده المسعى زحمه جدا ًهوا كمان .. يا اللـــــه ..

>< إيه رأيكم لو نسعى في الدور التاني ؟.. أنا سمعت إنه بيبقى أخف شويه
من الدور الأرضي ....

><>< مش عارف !!.. حاسس إنه هايكون برضه زحمه زي هنا ..!
الحرم ما شاء الله مليان مسلمين ..
زائد إني طبعا ًما عرفشي : هانطلع فوق إزاي أصلا ً!!..

><> إللي يسأل ما يتوهش يا حسام ..

-- السلام عليكم يا أخي ..

><>< وعليكم السلام ورحمة الله وبركاته ..

-- مصري .. صح ؟..

><>< أيوه مصري .. فيه حاجه ؟!!..

-- أنا عرفتك من لهجتك .. شكلك كده حيران من الزحمة في المسعى ...

><>< فعلا ًوالله .. إنت حاسس بينا واللا إيه ؟!!!.. سبحان الله ..

-- خير إن شاء الله يا أخي .. أنا هقولك ...
شايف السلم اللي هناك ده ؟..

><>< ده .. إللي عنده العسكري السعودي ده ؟؟...

-- أيوه .. السلم ده بينزل لتحت .. لدور مسعى تاني تحت الدور ده ...

>< والله ؟!!..

-- أيوه يا سيدي أبشر .. كتير ما يعرفوش الحكايه دي .. وعشان كده
هاتلاقي الزحمه تحت : أخف بكتير من هنا ...
يا للا يا عم .. على بركة الله إنت وأهلك ...
وما تنساش تدعيلي ...

><>< أدعيلك إيه يا أخي .. دا انتا ربنا بعتك لينا زي ما بيقولوا !!..
ربنا يجزيك خير ....

--------
-----------------

-- إنت اسمك إيه بقى ؟؟..

><>< لازم يعني ؟!!..

-- طبعا ًيا أخي !!.. أمال هانتكلم إزاي ؟!!!..

><>< اسمي حسام ...

-- حسام بس .. ولا حسام الدين ؟!!!..

><>< مهم يعني ؟!!..

-- هاتفرق كتير طبعا ًمعايا ..! لأن حسام الدين : معناها إن فيه نسبة
كبيرة تكون نشأتك وانت صغير : متدينة !!.. سواء منك أو من أبوك ع الأقل !

><>< فعلا ً.. اسمي حسام الدين ..

><>< شكلك كده شيخ مثقف .. إنت بتعرف تشغل الكمبيوتر ده ؟!!!..

-- طبعا ًيا أخ حسام !!.. شكلك كده مستغرب الأوضه !!..
تقدر تقول عليا : شيخ ديجتال شويتين ...!

><>< فعلا ً.. شكلك حقيقي شيخ ديجيتال !!!.. وخصوصا ًبالطاقية !
وانت بقه اسمك ايه ؟..

-- اسمي الشيخ محمد .. أو تقدر تعتبرني : أخوك الصغير محمد ...

><>< والله يا شيخ محمد : أعتقد إنك لو عرفت مشكلتي : ما كنتش
هاتعتبرني أخوك إطلاقا ً!!!.. لا الصغير !!.. ولا حتى الكبير !!!..

-- ليه يا أخي ؟!!.. خير ... هات ما عندك ... اتفضل ...

><>< مش عارف والله يا شيخ أبدأ إزاي وأقول إيه !!.. متهيألي غلط
إني أقول الكلام ده أصلا ًهنا في المسجد !!!..

-- يا أخ حسام ولا يهمك .. دا أنتا اللي ما تعرفش أنا سمعت إيه في الأوضه
دي هنا في المسجد !!!.. أنا سمعت شكاوى وقصص حقيقية ومصايب :
تشيب الولدان !!!.. أومال انتا فاكر الشعر الأبيض اللي في راسي ده من
شويه ؟!!!.. يا عمي : فضفض فضفض …

><>< فعلا ًسبحان الله .. ما كنتش أتخيل الشعر الأبيض اللي ف راسك
ده لما قلعت الطاقيه …

-- يا أخ حسام : أنا لما قولتلك اعتبرني أخوك الأصغر : فأنا فعلا ًهاتعامل
معاك على أني أخوك الأصغر …
فالأخ : عمره ما يسيب أخوه ولا يبعد عنه مهما كان … صح ؟..

><>< صح …

-- وحتى لو أخوه جالوه مرض : تفتكر إنه هايسيبه في مرضه ؟؟!!..

><>< لأ طبعا ً…

-- كويس .. ولما اخترت إني أكون أخوك الأصغر : ومش الأكبر مثلا ً:
فده مش عشان فرق السن بس اللي بيني وبينك .. لا ..
ولكن عشان أحسسك إن أخوك الصغير : حتى ولو هاينصحك أو يعتب
عليك : هايكون بكل أدب وبكل رحمه …! إيه رأيك بقى ؟؟…

><>< ما شاء الله عليك .. كلامك بيريح القلب يا شيخ محمد والله !!..
أنا حاسس إن ربنا بعتك ليا الليلادي !!!..
وصدقني .. أنا الليلادي هتلاقيني مطاوع ومهاود لأقصى حد !!!..
لأني خلاص .. مش قادر أكتر من كده !!!..
عايز أعرف الحق فين حقيقي يا شيخ والله .. عايز الحق : لأني لو عرفت
إني ع الحق : هارتاح …!

-- خلاص يا أخ حسام .. هات كل إللي عندك .. اتفضل …


يُتبع إن شاء الله ...

[حسن المرسى]

الله المستعان ..
المشكلة إنى غصبن عنى ها أقرأ الموضوع كله ...
وكمان إيه .... يتبع ..
محدش عارف مين اللى بحر ..

[أبو يحيى الموحد]

متابعون بشغف

[أسلمت لله 5]

متــابع ...

[أهل الحديث]

سلم الله قلبك يا أبو حب ، متابع لا حرمك الله أجر ما كتبت .

[أبو يحيى الموحد]

يُرفع....
لا اله إلا الله

[عبدالرحمن الحنبلي]

ظننت ان الاستاذ ابي حب الله يعاني من نوبه قلبيه ....العنوان مفزع قليلا ....

[عــمــر]

القصة لا أجد وصفاً لها الآن حتى وهي غير مكتملة

حينما بكى الوالد عند رؤيته الشيخ المعاق خطر على بالي خاطر ما
وأرجو أن يكون صحيحاً
للحق ..عندما وصلت لهذه النقطة أدمعت عيناي

من أشد المتابعين أستاذي أبو حب الله

[ahmedmuslimengineer]

فلا يرجع أصحاب المرض في القلب ..! ولا يرجع أصحاب الغرور بالعقل ..!
هل من توضيح لأصحاب المرض فى القلب
هل المقصود بهم الذين غضب الله عليهم ؟
الذين يعرفون الحق ولا يستطيعون العودة إليه مهما فعلوا
ويريدون العودة إلى دين الله فلا يستطيعون

[إلى حب الله]

هل من توضيح لأصحاب المرض فى القلب
هل المقصود بهم الذين غضب الله عليهم ؟
الذين يعرفون الحق ولا يستطيعون العودة إليه مهما فعلوا
ويريدون العودة إلى دين الله فلا يستطيعون

هم الذين قال الله تعالى فيهم :
" في قلوبهم مرضٌ : فزادهم الله مرضا ً" !!..

فهؤلاء هم الذين اختاروا المرض على الصحة .. والسقم على السلامة :
فكان الجزاء من جنس العمل .. هم عكس الذين قال الله عنهم :
" يوم لا ينفع مال ٌولا بنون : إلا مَن أتى الله بقلب ٍسليم " !!..

وعكس الذين :
" يستمعون القول : فيتبعون أحسنه " !!..

وعكس الذين :
" إذا ذ ُكروا بآيات ربهم : لم يخروا عليها صما ًوعميانا ً" !!..

والآيات هنا :
هي الآيات الكونية من حولهم الدالة على وحدانية الإله الخالق ..
وهي الآيات المقروءة والمسموعة أيضا ً..
هذا باختصار أخي الحبيب أحمد ..
----

ولعلكم تعجبون لو عرفتم أن ما قرأتموه الآن :
كنت قد انتهيت منه بالفعل قبل العشرة الأواخر من رمضان الماضي !!!..
وبسبب ظرف ما : توقفت ..
وبسبب توقف المنتدى في العشر الاواخر : تكاسلت !!..

ولكن على كل ٍ: فالنصف الباقي من القصة :
جاري الانتهاء منه بارك الله فيكم وفي كل مَن تابع وسأل ..
ولكنه من أصعب ما احتجت له التفرغ (العقلي) بجانب التفرغ (الوقتي) ..
فعسى أن يكون ذلك في الساعات أو الأيام القليلة المقبلة ..

والله المستعان ..

[ahmedmuslimengineer]

جزاك الله خيرا على ردك السريع
وننتظر أن يكتمل هذا الموضوع بالكامل خلال الدقائق القليلة المقبلة
فالاخوة هنا لا يعترفون بالساعات فى الانتظار

[في سبيل الله]

رفع الله قدرك وزادك فضلا وعلما انه ولي ذلك والقادر عليه

[ريحانة]

متابعه وانتظر التكمله على احر من الجمر

[إلى حب الله]

أختي الكريمة .. والإخوان الأفاضل ..
أدعو الله عز وجل القادر سبحانه : ألا تمر ليلة الخميس هذه إلا والقصة مكتملة بعونه ..
وأن يجعل فيها النفع الكثير بإذنه ..
وجزاكم الله خيرا ًعلى حسن ظنكم بأخيكم ..
والله المستعان ..

[إلى حب الله]

>< كده الصفا يا والدي : يمين هنا …

><> افتح صفحة الدعاء يا تامر ياللا معانا …

>< يااااه .. بصي يا أمي شكل الجبل عامل إزاي !!!.. سبحان الله !!..

><> ده حقيقي ده يا حسام ولا إيه ؟!!!..

><>< طبعا ًحقيقي !!.. هايكون عاملينه ديكور يعني ؟!!!..

><> لا .. بس شكل الصخور أملس وبيلمع بطريقه غريبه قوي !!!!..

> ممكن يكونوا رشينه حاجه يا أمي عشان تحميه وتحافظ عليه …

><> فعلا ً.. وعشان كده محاوطينه بإزاز برضه .. بس شكله غريب قوي
سبحان الله …!

>< إنتي عارفه يا أمي ممكن يكون إيه كمان .. ممكن يكون بقى أملس كده
من كتر الناس اللي وقفوا وقعدوا عليه !!.. شوفي كام ألف سنة بقى !!!..
يعني من قبل حتى الإسلام كمان !!!..

><> الله أعلم .. المهم إن شكله عجيب قوي …

><>< يا للا يا جماعه .. لسه قدامنا سبع أشواط سعي كمان ..
ياللا قولوا زيي .. إن الصفا والمروة : من شعائر الله .. أبدأ بما بدأ به الله ...

يا للا تعالوا اوقفوا جنبي هنا عشان ندعي .. بصوا معايا كده ناحية الكعبة ..
> بس الكعبة مش باينه يا أبي !!..

>< مش مهم .. كل خطوط رخام الأرضية دي : اتجاهها للكعبة ..

><>< يا للا قولوا زيي :

لا إله إلا الله وحده : لا شريك له .. له الملك .. وله الحمد .. يحيي ويميت :
وهو على كل شىء قدير .. لا إله إلا الله وحده : أنجز وعده .. ونصر عبده ..
وهزم الأحزاب وحده ..

يا اللا بقه : اللي عايز يدعي بحاجه قبل أما نبدأ سعي ..

--------
-----------------

><>< مش عارف إيه رأيك يا شيخ محمد ؟!!!..
متهيألي هاتقولي : قوم اطلع بره المسجد يا كافر !!.. صح ؟!!..

-- لا يا أخي ما تقولش كده !!.. خد المنديل ده .. عينك دمعت ..
إنت لو ما فيكش خير يا أخ حسام : ما كنتش تقولي إنك بتدور ع الحق ..!
وما كنتش رضيت تدخل هنا المسجد أصلا ً!!!..
بس أنا لي عتاب مبدئيا ًعليك …

><>< إيه هوا يا شيخ ؟!!!..

-- ليه دايما ًبداية إلحاد حد مسلم : بتكون هايفه قوي كده ؟!!!..
يعني فعلا ًالجهل بيخلي بعض المسلمين : زي الريشة في مهب الريح !
أي شوية شبهات كده ولا كده : بيودوه ويجيبوه !!!..
فعلا ًوالله !!!.. ما أقبح الجهل من مسلم !!!..

ليه يا أخي لما صابتك شوية شبهات : سارعت وقولت أنا ملحد !!!..
ليه مقولتش مثلا ً: أنا مسلم بس عندي شبهات ؟!!!..
هل كان سهل عليك كده تطلع م الإسلام : أو حتى تنطقها ؟!!!..
هل إنت كنت بتعبد الله فعلا ًعلى حرف ؟!!!..
سبحان الله العظيم !!!..
إنت ما تعرفش يا أخي إن كلام اللسان : ومع تكراره مع الوقت : بينطبع في
النفس والعقل والقلب : حتى ولو ما كانشي صحيح ؟!!!..

يعني مجرد إنك اتسرعت وسميت نفسك ملحد : فمع الوقت : بقيت فعلا ً
تتصرف زي الملحد : وتفكر زي الملحد !!..

الغريبة إن كلامك فيه حاجات كتير بتدل على تدين وقراية إسلامية واسعة !!!..
><>< لا يا شيخ محمد .. ما تنخدعش بالحاجات دي !!.. لأن معظمها
حاجات قريتها عشان الشبهات بس !!.. مش عشان الإسلام والدين للأسف !
تاني حاجه : زوجتي أصلا ًمتدينة ! دي حتى انتقبت لما حست إني بعدت عن الدين !
ولولا هيا الصراحة : كان ولادي الاتنين باظوا بسببي من زمان !!!..
ولعلمك ..
الشهور الأخيره دي بس : أعتقد إنها كانت هاتطلب مني الطلاق خلاص !!..
لأني فعلا ًوصلت لدرجة واضحة من سيبان الدين حتى الصيام : ما فيهاش تأويل !
هيا كانت بتلتمسلي الأعذار قبل كده : لأني طبعا ًما كنتش بقولها حاجه ..
إنما الفترة الأخيرة دي خلاص : حياتنا وحياتي أنا نفسي اتعقدت ع الآخر !

-- ماشي يا أخ حسام .. نرجع لموضوعنا …
طبعا ًحكاية إلحادك كمسلم : حكاية مكررة !!!..

جهل منك بالدين

>> مواجهة شبهات معرفتلهاش رد

>> واستلذيتها طبعا ً
لأن في ظاهرها الرحمة بكل الناس حتى الكافر : وف الحقيقة في باطنها العذاب !!..

>> وبدل من أنك تتهم عقلك موش الدين

>> اتهمت الدين وشرع الإسلام !

>> وطبعا ًده في أوله كان ليه عندك لذة !!.. الإحساس بالتميز !!.. أو حتى بأنك
ما بقتش تبع لحد في العقيدة والتفكير !!.. أو حتى غرورك بعقلك إنك فهمت من
الدنيا : اللي ما حدش فهمه غيرك !!.. لدرجة أنك ما سألتش حد من أهل العلم
عن الشبهات دي !!..

><>< بس .. أنا سألت فعلا ًبعض الشيوخ يا شيخ محمد : وبعض الناس
المتدينة اللي أعرفهم : ما حدش فيهم عرف يجاوبني زي ما قولتلك !!..

-- يا أخ حسام .. فرق كبير إنك تسأل مسلم متدين عابد .. وبين إنك تسأل
مسلم مثقف عالم !!.. فالأول بينفع نفسه .. أما الثاني : فبينفع وبيحمي : نفسه
وغيره !!!... وده هو الصنف اللي مش هاتلاقي منه كتير في الزمان ده للأسف !..
وكمان فيه حاجه تانيه ..
معظم المسلمين والمؤمنين : هما على الفطرة البسيطة .. وعمرهم ما فكروا في اللي
انت فكرت فيه ده أصلا ً: ولا حتى بالصوره دي !!.. هما مرتاحين في إيمانهم :
لأنه متوافق مع فطرتهم !!!..

><>< ما شاء الله عليك يا شيخ محمد .. إنت فهمت كلامي بالظبط : وبتتكلم
كأنك احتكيت بعالم الإلحاد ده فعلا ً.. هما دول اللي انت بتقول إنك سمعت ليهم هنا
في الأوضه دي : حاجات تشيب الولدان ؟!!!..

-- لا يا أخي .. إنت أول ملحد أتكلم معاه وجها ًلوجه ..
قبل كده اتكلمت هنا مع ناس مسلمين : عندهم شبهات زي اللي عندك بالظبط :
بس ما حدش فيهم قال أبدا ًإنه ملحد : أو إنه كفر بالله والعياذ بالله !!!..
وده اللي قصدته بعتابي ليك في أول كلامي !!!..
نفس شبهاتك دي سمعتها هنا قبل كده أكتر من مرة :
بس ولا واحد فيهم قال إنه ملحد !!.. وعشان كده : كان إيمانهم وثقتهم بالله :
بترجعلهم علطول !!!..
أما الحكايات اللي تشيب الولدان .. فهيا عن ذنوب ومعاصي يا أخ حسام :
ربنا يعافيني ويعافيك وأهلنا منها يا رب .. لا داعي لذكرها دلوقتي ..

><>< أنت بتقول إن أنا أول واحد ملحد تكلمه وجها ًلوجه !!.. أمال كلمت
ملحدين غيري قبل كده إزاي ؟!!!..

-- على النت يا أخي !!.. مش قولتلك شيخ ديجيتال !!!!..

><>< طيب يا شيخ محمد : إنت دلوقتي كتبت في الورقة اللي معاك دي شوية
حاجات .. ممكن أعرف إيه هيا ؟!!..

-- دي يا أخي 7 شبهات : أنا لخصتها من كلامك معايا .. وممكن أناقشك فيها
دلوقتي : لأنها بتعبر عن اللي انتا بتعاني منه الفترة دي .. فانت دلوقتي كوكتيل بين
الإلحاد واللادينية واللا أدرية !!.. وبتتقلب بينهم في كل لحظة : وهوه ده اللي خلاك
وصلت للحالة دي دلوقتي اللي بتقولي فيها إن قلبك بيوجعك !!..
لأنك من جوه نفسك عارف إنك لو على الحق : ما كنتش تبقى قاعد تتقلب بين
الـ 3 حالات دي !!..

><>< كويس قوي يا شيخ محمد .. يعني أفهم من كده إنك لو ناقشتني في السبع
حاجات دول دلوقتي : واقتنعت بيهم فعلا ً: هايبقى حالي أحسن : ولو رجعت للإسلام
هارجع عن حق ؟!!..

-- بإذن الله يا أخ حسام .. بإذن الله ..
><>< طب مستني إيه يا شيخ .. ياللا نبدأ .. أنا مستعد ..

-- ماشي يا أخي .. أول نقطة لازم نقضي عليها تماما ً: هي نقطة الإلحاد وعدم
وجود خالق للكون .. ومن هنا أحب أسألك سؤال واحد بس .. ممكن ؟!!..
><>< اتفضل يا شيخ محمد ..

-- سؤالي يا أخي هو : هل عندك بديل تاني عن الخالق العاقل : إلا الصدفة ؟!!..
وخلي بالك : أنا ما بقوللكش نوع الخالق الصدفة ده إيه : طاقة ولا شوية ذرات
ولا حساء كوني : أنا باسأل عن طريقة خلق الكون ده وكل ما فيه : وإحنا وكل
الكائنات الحية : هل عندك بديل تاني لخلقها من بعد الخالق العاقل : غير الصدفة ؟!

><>< ممممم .. لأ ..

-- طيب يا أخ حسام .. تقدر تعرفلي بالظبط : إيه هيا الصدفة ؟!!..

><>< الصدفة ؟!.. دي حاجه سهلة يا شيخ محمد .. الصدفة هيا .. هيا ..
الصدفة هيا الصدفة !!.. يعني من غير معاد .. من غير ترتيب مسبق .. كده يعني ..

-- ماشي يا أخي .. أنا هاعيد صياغة السؤال مرة تانية : وهاساعدك فيه :
هل الصدفة : ليها هدف سابق لوقوعها ؟!!..

><>< لأ !!..

-- هل الصدفة : تقدر تدينا شيء متداخل ومتركب بتصميم معين ؟!!..

><>< مش فاهم دي يا شيخ محمد ..

-- بص يا سيدي .. شوف معايا التربيزة دي .. فك كده الرجل دي ..

><>< همم .. همم .. ايه ده .. هيا بتتفك إزاي دي يا شيخ ؟!!..

-- لفها .. هيا فيها مسمار قلاووظ هوا اللي مثبتها في الترابيزة ..

><>< آآآآه .. ماشي .. أهوه ..

-- السؤال دلوقتي يا أخ حسام : لو أنا جبت الترابيزة دي: والأربع رجول
دول : ورميتلهم 7 ألاف مرة في الأرض : هل تتوقع في مرة م المرات : رجل فيهم
هاتروح عند مكان التثبيت بتاعها : وتلف نفسها لحد الآخر كده لوحدها ؟!!!..

><>< مممم .. الحقيقة لا .. ولا حتى لو جربنا 7 مليون مرة مش 7 ألاف بس !

-- أهو هوه ده التصميم اللي سألتك عنه يا أخ حسام .. فهل الصدفة تقدر تعمل
أي شيء في الكون ده : ليه تصميم زي التربيزة الصغيرة دي ؟!!..

><>< لا طبعا ً...

-- سبحان الله .. إنت بنفسك قولت لا أهوه : في حتة تربيزة صغيرة زي دي :
أمال في البروتين والخلية اللي أعقد من الترابيزة دي مليون مرة هاتقول أيه ؟!!..

><>< أللا أللللا !!.. بروتين وخلية !!..

أنت كمان عارف الحاجات دي يا شيخ محمد ولا إيه ؟!!..

-- طبعا ًيا أخ حسام .. وعلى فكرة .. أنا ليا أخ في كلية العلوم ما شاء الله عليه :
مخه ذري .. معندكش عروسه ليه ؟!!..

><>< هههه .. والله يا شيخ محمد أنا حاسس إن نص همومي اتشالت من عليا بس
من طريقة كلامك معايا ..

-- يعني إيه يا أخي نص هدومك اتشالت من عليك من كلامي معاك ؟!!..

><>< نص هدومي إيه ؟!!.. بقولك نص همومي مش نص هدو... آآآه .. إنت
بتهظر معايا يعني !!.. ماشي يا شيخ .. مقبولة منك .. كمل بقى الله يباركلك .. أنا
حاسس إني لأول مرة قادر آخد نفس عميق واملا بيه صدري لآخره من سنين !!..

-- ماشي يا أخي .. نكمل ...
يبقى أنت قلت بنفسك إن الصدفة : ما لهاش هدف سابق لوقوعها ..!
وقلت إن الصدفة كمان : استحالة تعمل شيء متركب له تصميم محدد ..!
والسؤال التالت والأخير والأهم يا أخي هو :
افترضنا فرضا ًجدلا ًإن الصدفة عملت لينا ترابيزة زي دي .. فرضا ًجدلا ًزي ما
قلت : السؤال دلوقتي هو : هل بإمكانها تعمل كده تاني : وبنفس الشكل والتركيب
والطريقة والتصميم والمقاسات ؟!!!..

><>< مممم .. لا طبعا ً..

-- طيب : هل ممكن نتخيل إن الترابيزة دي من نفسها كده : ممكن تكتب الطريقة
اللي اتجمعت بيها نفسها :عشان تكررها تاني ؟!!!..

><>< لا برضه ياشيخ محمد : هيا الترابيزة عاقله عشان تعمل كده ؟!!!..

-- طيب .. ولا حتى ممكن نتخيل إنها تقرر كده من نفسها إنها تعمل طريقة :
تنسخ بيها نفسها : أو تنقسم نصين : وبعدين كل نص يعمله نص يكمله لوحده ؟!!!..

><>< والله كلامك حقيقي يا شيخ محمد !!.. فعلا ً: إيه الكلام ده ؟!!.. لأ طبعا ً!

-- طيب يا أخ حسام :
تختلف إيه مكونات الذرات ومكونات الخلية الحية والـ dna عن مكونات الترابيزة
دي في إنهم جمادات ؟!!!..

><>< مممممم .. أعتقد لا شيء .. فالاتنين مالهومش فكر ولا عقل زي الإنسان
خاص بيهم : يخليهم يعملوا شيء جديد من نفسهم !!..

-- الحمد لله يا أخ حسام .. أهو ده اللي كنت عايز أوصللوهولك ..
أصغر وحدات في الكون والكائنات الحية : هيا جمادات : مالهاش أي وعي أو تفكير
أو عقل مستقل .. هما طايعين لله عز وجل : ما لهومش يخرجوا عن القوانين اللي
حاطهالهم يمشوا عليها .. وعيهم وتفكيرهم بس : إنهم يسبحوا لله بطريقة إحنا ما
نعرفهاش ... أو حتى بصوت : إحنا ما نسمعهوش ..
المهم :
إنهم استحالة يفكروا في تصميم أو عمل أي شيء له مغزى وهدف وتكريب من نفسهم !
إنت عارف إيه أغرب حاجه في الملحدين يا أخ حسام ؟!!..

><>< لا .. إيه هيا يا شيخ محمد ؟!!..

-- الغريب إنهم لما ييجوا يعيبوا على المؤمنين بالله : بيعيبوا عليهم إنهم بيؤمنوا بحاجات
ما شافوهاش .. ما شافوش ربنا .. ما شافوهوش وهوا بيخلق الكون والكائنات الحية ..
وبيعتبروا إن ده كله : بيطعن في العقل والتفكير والاستدلالات المنطقية ..
أما الملحدين نفسهم :
فتلاقيهم برضه بيؤمنوا بحاجات ما شافوهاش !!..
فلا هما شافوا إزاي اتخلق الكون وبدأ !!.. ولا إزاي اتركب أول بروتين !!.. ولا أول خلية
حية !!.. ولا أول كائن حي !!.. ولا التطور اللي بيضحكوا بيه ع الناس !!..
فلو سألتهم عن كل ده هايقولولك :
احنا اتوقعنا وافترضنا : بناءً على النظر في تفاصيل الحاجات دي !!..
فسبحان الله العظيم !!..
طب ما احنا برضه إيماننا بالله الخالق الحكيم العليم : مبني على النظر في تفاصيل الحاجات
دي !!.. ولا هو حلال ليهم : حرام علينا ؟!!!..
ولكن مع فارق كبير يا أخ حسام يبين لك مين اللي احترم عقله من المؤمنين والملحدين :
ومين اللي ذل عقله لهواه وكفره والعياذ بالله ..

><>< وإيه هوا الاختلاف ده يا شيخ محمد ؟!!..

-- الاختلاف ده إن المؤمنين لما شافوا الدقة المتناهية والكمال الرهيب في كل شيء في
الكون : آمنوا إن وراه خالق عاقل متصرف حكيم قادر عليم !!!..
أما الملحدين : فشافوا إن الدقة المتناهية والكمال الرهيب في كل شيء في الكون : هيا
نتيجة الصدفة والعشوائية : واللي خليتك توصفها بنفسك بالعجز من ثواني !!..
بالذمة مش غريبة دي ؟!!!..

><>< فعلا ً.. أول مرة أشوف المسألة بالوضوح والغرابة دي !!..
أنا عقلي كان فين صحيح ؟!!..

-- قبل أما أختم معاك النقطة دي .. عايز ألفت نظرك لحاجه مهمة تانية : وهيا إنك
لما تدخل بيتك مثلا ً: وتلاقي سرير ولا كنبة ما كانوش موجودين أصلا ً: فبالله عليك :
هل تقول إن ما فيش حد جابهم هو المعقول : ولا إنك تقول إن في حد جابهم بس إنت
ماشوفتهوش لسه ؟!!..

><>< إنت عايز الحقيقة .. لأ طبعا ً.. هاقول إن في حد جابهم : حتى ولو ما كنتش
شوفته !!.. ده أكتر منطقية من إني أنفي !!!..

-- بس .. يبقى إنت أفتيت نفسك يا أخ حسام ...!
أما قبل أما انتقل معاك للنقطة التانية : أحب بس أديك ملحوظة منطقية أخيرة :
وغريبة برضه عن نظرية التطور عشان تقفل الباب ده لآخر مرة ف حياتك ..

><>< أنا عارف هاتقول إيه يا شيخ محمد .. هاتقول إن ما فيش ولا دليل
علمي عليها لحد دلوقتي !!.. لا في الحفريات الوسطية : ولا في الطفرات .. صح ؟

-- لا يا أخ حسام .. أنا عايز أديك شيء أعمق من كده بكتير ..

><>< إيه هو يا شيخ محمد ؟!!..

-- إنت مش ملاحظ يا أخ حسام إن في حاجات كتير في كل الكائنات الحية : ما ينفعش
تيجي على فترات أو مراحل : وإلا الكائن أصلا ًيموت وينتهى !!.. بل لازم تيجي مع
بعضها في وقت واحد ؟!!!..

><>< آآآه .. صح .. كلامك صح يا شيخ محمد .. ما توقعتش إنك تكون قاري
فـ دي كمان ..! فعلا ًنقطة من النقط اللي كانت معقدانا في منتديات الملاحدة
واللادينيين عندنا : وكنا بنألف ليها ردود أي كلام من هنا وهناك : هي البروتين
والـ dna !!.. لازم الاتنين يكونوا اتوجدوا مع بعض في وقت واحد :
وإلا ما كانوش قدروا يخرجوا بالصورة المتكاملة والمعجزة دي فعلا ً!!..
وزي الـ dna برضه والتكاثر ؟!!.. فأول خلية من غير تكاثر وانقسام : حتما ً
هاتموت : وبرضه من غير برمجة ووعي من الـ dna لكيفية التكاثر ده ونسخ
محتويات الشريط الوراثي : ما كانش يتم التكاثر !!!..
فعلا ً.. بتفكرني الحاجات دي بمعضلة البيضة واللا الفرخة ؟!!..

-- مش ده بس يا أخ حسام .. ده الكائنات الحية مليانة أمثلة زي دي : بس اللي
يحترم عقله في البحث والتفكير فعلا ً!!.. وأبسط مثال من الإنسان نفسه : وقيس
عليه باقي الكائنات الحية هو : الشرب مثلاً ..
فالإنسان من غير ميشرب ميه : يموت ..! وهنا تيجي أهمية حاسة العطش ..
وبرضه يموت من غير أعضاء مخصصة للشرب .. ومن غير ميكانيكيات معقدة جدا ً
لتوزيع الميه في جسمه للاستفادة منها : وإخراج الباقي منها في صورة بول وعرق !!..
والسؤال :
حاجة الإنسان للميه هيا اللي اتوجدت الأول : ومن غير الأعضاء والميكانيكيات دي ؟!
واللا الأعضاء والميكانيكيات دي اللي اتوجدت الأول : استعدادا ًلاعتماد الإنسان تماما ً
عليها : واللي من غيرها يموت ؟!!!..

><>< سبحان الله .. كلامك يصحي النايم فعلا ًيا شيخ محمد ..
كلامك منطقي جدا ً.. يا رب يستمر كده : وخصوصا ًفي مشكلة المشاكل في تفكيري
العجيب اللي قولتهولك عن فكرة الأكوان التانية دي ....!

-- ما هيا دي النقطة الجايه يا أخ حسام .. ما تخافش .. المهم إنك دلوقتي خلاص :
عرفت إن للكون ده إله سبحانه ولا لأ ؟!!..

><>< لأ خلاص .. آمنت بوجود إله.. بس تكملي النقطة المهمة جدا ًالجاية دي :
وأنا أشهد إنه فعلا ً: لا إله إلا الله .. اتفقنا ...؟

-- اتفقنا .. على بركة الله ...

--------
-----------------

><> كده أول شوط من السعي .. ياااه .. مسافه كبيره برضه مش صغيره
بين الصفا والمروة !!!.. صح يا حسام ؟!!..

><>< الله يرحم ابن حزم الأندلسي ! بيقولوا إنه ما زارش الحرم في حياته !
وعشان كده كان فاكر إن السعي من الصفا للمروة : والرجوع من المروة
للصفا : كده يبقى شوط واحد من السبعة ومش شوطين !!!!!!..
أعتقد فعلا ًلو كان جه وشاف المسافه بين الصفا والمروة : ما كانش عمره قال
كده !!!!..

> إلحقي يا أمي : هو ده جبل المروة ؟!!!..
سبحان الله !!!..

>< الغريب يا والدي إنك بتعرف حاجات عن العلماء : ناس كتير ما تعرفهاش !
مع إنك يعني كنت ……. كنت مش باين عليك ..

><>< والله كانت الأسباب مش ولا بد يا وليد ! بس الحمد لله ربنا تاب عليا !
يا للا عشان ندعي عشان نبدأ الشوط التاني من السعي …

>< وافتكر إن أنا اللي سبقتك يا والدي في الجري بين العلامتين الخضر في
الشوط الأول ده … أما نشوف بقى مين اللي هايبقى يسبق في الشوط التاني …

> أنا ….!

--------
-----------------

-- بعد أما خلصنا النقطة الأولى يا أخ حسام : واتأكدت معايا إن مستحيل
يكون الكون ده وإحنا معاه : اتوجدنا كده صدفة من غير إله خالق قادر حكيم :
نكون قضينا بعون الله بإجابة سؤال من السبعة : على بذرة الإلحاد جواك ..
موافقني على كده ولا لأ ؟!!..

><>< موافق يا شيخ محمد .. ومتشوق للسؤال اللي قولتلك عليه بتاع
الأكوان التانية دي .. وإنه ممكن يكون هناك أكتر من إله لكل كون ... إلخ

-- بسيطة يا أخ حسام إن شاء الله ..
فكل الأسئلة الباقية أصلا ًمصبوبة على اللادينية واللاأدرية .. وهانحلها مع بعض
بإذن الله : وبنفس الأسلوب السهل المنطقي البسيط زي ما وعدتك ..
لكن قبل أما أرد على سؤالك اللي محيرك ده ..
عايز أسألك سؤال بينك وبين نفسك : ترد عليه بصراحة .. ماشي ؟..

><>< ماشي يا شيخ .. اتفضل ..

-- دلوقتي يا أخ حسام : وبعد أما انزاحت الغمة عن عينيك في مسألة خلق
الكون وما فيه صدفة دي : هل كان اقتناعك بفكرة الصدفة دي : هو الأصل
اللي وصلت ليه بعد تفكير منطقي وعلمي عميق ومشاهدات ؟!!!..
واللا كان أصل الإيمان بيها الأول هو : فكرة إن ما فيش إله : وعشان كده لازم
تحط بداله أي فكرة تانية لخلق الكون : حتى لو كانت غبية ومش منطقية ولا علمية ؟

><>< ممممم ؟.. سؤال في الصميم بصراحة يا شيخ محمد !!..
أقولك الحق ...
أنا فعلا ًكنت باقعد كتير مع نفسي أفكر : ليه أنا مستمسك بغرابة بنظرية الصدفة
دي كده ؟!!.. فعلا ًأنا كنت شاعر من جوايا إن الأمر أكبر من مجرد إني مصدقها
أو مؤمن بصحتها ؟!!!.. ثغراتها كتيرة جدا ًفوق الحصر !!!.. بل هيا أصلاً مش
منطقية !!!.. ويرفضها عقل أصغر طفل !!!..
بس هيا فعلا ًما كانش موجود ألا هيا إذا استبعدنا فكرة إله خالق ..
أما اللي جالي في الفترة الأخيرة بعد أما احترمت عقلي شويه : فهي فكرة إن يكون
فيه فعلا ًإله خالق : ولكن : بالأسئلة العجيبة اللي قولتهالك دي ؟!!!..
زي إن إيش عرفني إن ما فيش أكوان تانية .. وإن كل كون يكون ليه إله ... وكده
يعني زي ما قولتلك وسامحني ...

-- كويس .. يعني انت متفق معايا يا أخ حسام إن فكرة الصدفة أصلا ًما كانش
فيها منطق : بس إنت كنت متمسك بيها عشان ما فيش غيرها لو أنكرت الإله ؟

><>< صح يا شيخ محمد .. صح ..
وما حسيتش بتافهتها أكتر وأكتر لدرجة القرف : إلا معاك من دقايق !!.. سبحان
الله : زي ما يكون فعلا ًغمة كانت على عيني وانزاحت مرة واحدة !!!..

-- جميل جدا ًيا أخ حسام .. وطب لو قلتلك دلوقتي إن نفس فكرتك عن الأكوان
التانية دي المتوازية ولا حتى مش متوازية : وآلهة تانية .. إلخ إلخ إلخ
لو قولتلك إنها برضه بنفس تفاهة ونكارة وعدم منطقية الصدفة !!.. هاتصدقني ؟!!..

><>< إزاي ؟!!.. فهمني الله يخليك يا شيخ !!..
أنا زي ما قولتلك والله : دماغي خلاص هاتنفجر من كتر التفكير في الحاجات دي !
حاسس إني أعمى في غرفة ضلمة أصلا ً!!!!..

-- أنا هقولك يا أخي ..
دلوقتي عشان تبقى فاهم .. ربنا حذرنا من الشيطان .. وعرّفنا إن للشيطان وسوسة
للإنسان على الكفر والشر .. وهانبقى نتكلم على ده بعدين في سؤال جاي بعد شويه ..
المهم ..
الشيطان ده عشان يخليك تكفر بربنا بأي صورة من الصور : عمره ما هايجبلك الكفر
بطريقة منطقية أبدا ً!!!.. عارف ليه ؟!!!..

><>< ليه يا شيخ ؟!!!..

-- لأن الكفر أصلا ًشيء غير منطقي !!.. بل هو ضد الفطرة والعقل !!!.. والدليل :
إنت اعترفت بيه بنفسك من ثواني في الكلام اللي قولته عن الصدفة !!!!..
باختصار :
الشيطان عارف إن كل شيء من حوالينا في الكون وفي الأرض وفي جسمي وجسمك :
بيدل على ربنا سبحانه .. وعشان كده : هو مش هايخليك تكفر بتدرج منطقي أبدا ً!
وإنما : هايعكس الآية !!!..
يعني : لازم الأول يعديك بمرض الكفر .. بالتفكير في عدم وجود إله !!!.. ويتنيه يوسوس
ليك بيها فترة من الوقت : لحد ما تاخد بالك منها لو ما كنتش واخد بالك أو مطنشها
منه قبل كده !!!..
وبعدين : يبدأ بقه يديلك الشبهات اللي تناسبك : عشان يحاول يقنعك بصحة الكفر
ده !!!!..
شوفت بقه طريقه عامل إزاي ؟!!!..
هو بيغرس فيك النتيجة الاول : قبل المعطيات !!!..

><>< ممممم ... بدأت أفهم .. طيب .. يعني إيه كلامك إنه يبدأ يديني الشبهات
اللي تناسبني ؟!!.. قصدك تناسبني في إيه بالظبط ؟!!!..

-- أنا أقولك ...
هو بيشوف الأول : إيه الحاجة اللي ليها وزن وتأثير عليك في حياتك .. وبعدين :
يبدأ يجيبلك شبهات معروفة قديمة : من ناحيتها : ويبدأ يضخمها في عينيك وعقلك
وقلبك للأسف !!!.. وطبعا ًعشان ما عندكش العلم الديني ولا الدنيوي الكافي :
وعشان إيمانك مش قوي وتسليمك لله مش قد كده : ممكن فعلا ًيتزعزع إيمانك
بالله !!!!..
يعني مثلا ً... واحد قلبه رهيف .. وعنده شفقة ورحمة .. يخش له الشيطان بعد ما
رمى بذرة الكفر جواه : بشبهات في رحمة الله !!!.. زي مثلا ً: العذاب الأبدي
للكافرين والعصاة !!.. والمصايب اللي بتحصل في الدنيا للناس: حتى المؤمنين منهم
أو الأطفال الرضع أو الضعفه والمساكين !!.. لحد مايوصل معاه لإنه يعتبر إن مجرد
خلق الكافر : مش رحمه !!.. لأن الله لو رحمه : ما كانش خلقه !!!.. وكأن الله
خلق الكافر كافر أصلا ًكده بالجبر !!!.. وده هاتكلم فيه برضه بعدين معاك ..

><>< آه صحيح .. ده اسمه الإلحاد العاطفي على ما قريت !!!.. فعلا ًوالله !
يعني أفهم من كلامك إن الشيطان بيحدد نوع الضحية الأول : وبعدين يبدأ يبين
له الشبهات اللي تناسبه عشان يكفر بالله ؟!!!..

-- أيوه .. وفيه كمان نوع من الناس : يخشلهم الشيطان من ناحية العقل والعلم !
ودول بقه : بيعمل معاهم حاجة من اتنين : أو الاتنين مع بعض على حسب كل حاله !
فإما يستغل بعض نصوص الدين في إنه يخلق منها تعارض ظاهر مع العلم : سواء كانت
النصوص دي صحيحة أو ضعيفة ..
وإما يستغل نفس الآيات الدالة على الله عز وجل : في إنه يخليها دالة على عدم وجود
الله عز وجل !!!!.. تخيل ؟!!!..

><>< الأخيرة دي غريبة فعلا ً!!.. إزاي يقدر يعمل كده ياشيخ محمد ؟!..

-- أقولك يا أخي ...
دي سهلة : وهي إذا كان الإنسان الضحية ده : هو من النوع اللي بيتأثر باللي حواليه ..
وللأسف الشديد : النوعية دي بقت كتيرة جدا ًفي زمانا ده نتيجة الإعلام !!!..
هاديلك مثال ...
أكيد إنت بتتفرج على التلفزيون ..
في قنوات وبرامج مخصصة للأعمال الكوميدية ...
وطبعا ًلسماجتها : لازم يعوضوا السماجة والرزالة والتفاهة دي : ببعض الغش اللي
بيأثر على نوعية من الناس ...
الغش ده مرة يكون بتسجيل أصوات ناس بتضحك : يحطوه مع كل موقف المفترض
إنه بيضحك : حتى ولو كان تقيل ومالوش معنى أو طعم !!!!..
فيقوم الناس اللي مش واثقة في نفسها 100 % : تضحك : مش عشان الموقف
بيضحك ولكن : عشان فيه صوت ناس بتضحك !!.. فيظن إن الناس دول فهموا اللي هوا


ما فهموش من الموقف : فيقوم يضحك معاهم عشان ما يحرجش نفسه ولو قدام نفسه !!!!..
><>< فعلا ًيا شيخ محمد !!!.. بس إنت عرفت الحاجات دي إزاي ؟!!!..
-- مشكلتكم يا أخي إنكوا فاكرين المتدينين الملتزمين دول أو الشيوخ : جايين
من كوكب تاني !!!.. لا يا سيدي اطمن .. للأسف أنا ضيعت سنين كتير من عمري
لحد مرحلة الشباب قدام التليفزيون فيما لا يفيد !!!..
ولكني دلوقتي بحاول استفيد من خبراتي معاه : في الدعوة زي ما انت شايف دلوقتي !!
نرجع لموضوعنا ...
بنفس طريقة تدخيل صوت الضحك ده لتأييد موقف سمج : زيها كمان إنه يعرض صورة
ناس بتضحك !!.. فيخليك تضحك زيهم !!.. أو ناس في عرض سحري بتمثل الدهشة
والتعجب : فتخدعك بإن اللي انته شايفه ده من الخدع : حقيقي !!!..
والقائمة لا تنتهي !!!.. منها إعلانات التليفزيون والجرايد إلخ إلخ إلخ
وكلها طرق معروفة مدروسة في الإعلام والدعاية !!!..
فهي دي الطرق البهلوانية الالتفافية الوحيدة عشان إقناع الناس بالباطل !!..
لأن الحق واضح وقصير وخط مستقيم !!!..
وأما الطرق دي : فهيا اللي بيعلمها الشيطان لأوليائه من البشر : عشان يخدعوا بيها
الناس !!!..
لأنه عارف إن أي طريق علم : لازم يوصل في الآخر لله !!!..
يبقى لازم يقلب الآية : بإنه يجيب ناس من أوليائه من شياطين الإنس : يقلبوا الآية !
يخلوا الأدلة على الله واللي في كل كونه : أدلة على الصدفة مثلا ً!!!!!!..
شفت الخبل والظلم واللا منطق واللا معقول ؟!!!!..
فهو ده مثال اللي دخل بيته ولقى كنبه ولا سرير :
فالمنطقي إن يقول حد جابهم وعملهم : والغير منطقي إن يقول إنهم اتعملوا واتجابوا هنا
صدفة !!!!.. فأي التفكيرين أعقل بالله عليك ؟!!!..
><>< يا ولاد الإيه !!!.. ما كنتش أتخيل إن الإجرام ممكن يوصل بيهم لاستخدام
طرق الإعلام الخبيثة دي في العلم !!!.. دلوقتي بس اكتملت صورة فضايح علماء التطور
في عنيا !!!.. كدب في كدب !!!.. كدب متعمد لتضليل الملايين اللي بيثقوا في كلام
العلماء !!!.. ونسيوا إن العالم ده في النهاية إنسان !!.. ممكن يكون إنسان محترم :
وممكن يكون إنسان مش محترم غشاش ومخادع !!!..
لكن يا شيخ محمد .. هل ممكن الشيطان يخش للإنسان عن طريق الناحيتين مع بعض ؟..
يعني أفكار وشبهات الكفر : العاطفية .. والعلمية ؟!!!..
-- أيوه يا أخ حسام للأسف .. هو بيحدد كل نقاط ضعف الضحية قبل الهجوم !!..
وبيحاول يستخدم مع الضحية كل الطرق !!!..
><>< الله ينور عليك يا شيخ محمد زي ما نورتني .. بس انت برضه ما كلمتنيش
عن فكرتي اللي مش راضيه تطلع من راسي دي .. الله يخزيه الشيطان !!.. هوه اللي
لزقها في دماغي لزقه مش راضيه تفك أبدا ًللأسف !!.. يا رب تطلع الليلادي !!!..
-- ماشي يا أخ حسام ..
أنا هاستخدم معاك أسلوب جديد إنت مش هاتتوقعه !!!.. أنا هاجاريك في خيالاتك
العلمية دي نفسها : عشان أبين لك أد إيه هيا أفكار شيطانية ساقطه أصلا ًمن العقل
والمنطق !!!.. وإننا برضه لو استخدمنا تفكيرنا : لازم نعبد فيها الله !!!.. مستعد ؟..
><>< مستعد ..!
-- ماشي ..
دلوقتي يا أخ حسام : وبدل ما يستغل الناس الاكتشافات العلمية الغريبة مؤخرا ًفي
ميكانيكا الكم : واللي بتثبت إنه ممكن يكون فيه عوالم تانيه معانا ولكن بذبذبات مختلفة :
فبدل ما يقولوا : آآآآه : صدق الله ورسوله في الإسلام أو الأديان الإبراهيمية عموما ً:
صدقوا لما قالوا إن فيه مثلا ًجن وملائكة عايشين معانا بس ما نقدرش نشوفهم !!!..
بدل ما يقولوا كده وياخدوا النتائج دي طريق للإيمان بالله وتصديق رسله :
بدل ما يشوفوا في اكتشافات العلم اللي بتثبت الدين كل يوم أكتر وأكتر زي ما قال ربنا:
"سنريهم آياتنا : في الأفاق .. وفي أنفسهم : حتى يتبين لهم أنه الحق " :

عملوا زي ما قولتلك بالظبط !!!..
شياطين الإنس يبدأوا يبثوا أفكار مش من المنطق في شيء : ولا حتى من العلم !!!..
والهدف : زعزعة الإيمان بالله تعالى وتفرده ووجوده ووحدانيته سبحانه !!!..
صح ؟!!..
><>< ما انكرش عليك يا شيخ حسام : صح !!..
أنا بقيت كل أما أجي أسيب فكرة الصدفة وارجع لفكرة إله خالق : بقت تطلعلي
الفكرة دي إنه : وإيش عرفني إن ما فيش أكوان تانيه : وكل كون ليه إله ؟!!!..
-- جميل يا أخ حسام ..
يعني العقده دلوقتي لإيمانك بالله : هو إن فيه آلهة تانيه في أكوان تانيه !!!!.. صح ؟
><>< صح !!..

-- جميل .. طيب ولو قلتلك إن معنى الله عز وجل إله : إنه خالق مش مخلوق !!!
فهل لسه هايكون فيه أي معنى لكلامك ؟؟..
مشكلتكوا مع أفكار الشيطان يا أخ حسام إنكوا ما بتنتبهوش إنه بيخليكوا تفكروا في
ربنا : زي ما بتفكروا في نفسكوا !!.. وسبحان الله العظيم ! ده حتى ربنا حذرنا وقال :
" ليس كمثله شيء " !!..
طيب ربنا اللي بنعبدوا خالق .. والخالق واحد في الوجود كله ..
وما ينفعش يبقى فيه أكتر من إله وإلا : سيقوا ساعتها مخلوقين : مش خالقين !
وساعتها يبقى الملحد ما عملشي حاجه غير إنه حط نفسه في معضلة تانية وتالتة
ورابعه وإلى ما لا نهايه !!.. لأنه هايفضل دايما ًمعاه نفس المشكلة وهي :
مين اللي خلق الآلهة دي ؟؟.. لأن الله الواحد : فريد ما لوش مثيل !
ومعنى إن فيه آلهة زي بعضها : إنه يكون خالقها وموجدها واحد !
لأن الوحدة في الصفات : بتدل على وحده في الصانع !!..
والسؤال دلوقتي يا أخ حسام :
هل تقبل إن عقلك يتنيه أسير التسلسل لما لانهاية :
آلهه مخلوقة من آلهه مخلوقة من آلهه مخلوقه من آلهه إلخ إلخ إلخ ؟؟

><>< فعلا ًيا شيخ محمد : شيء مستحيل .. لازم يكون فيه نقطة بداية :
ما يبقاش قبلها شيء !!..
أهو أنا دلوقتي فهمت مثال جميل قوي كان ضربه لي واحد مسلم قبل كده :
بس بصراحة ما استطعمتش روعته إلا دلوقتي .. عارف قاللي إيه ؟
-- إيه ؟؟..

><>< قاللي لو هناك عسكري عايز يضرب رصاصة من البندقية :
بس ما بياخدش أوامر إلا من واحد أعلى منه وسابقه في الرتبة ...
والأعلى منه مش هايديلوا أمر الضرب إلا برضه ما يجيلو أمر من أعلى منه ..
وهكذا إلى ما لا نهاية .. السؤال :
هل الرصاصة هاتنضرب أصلا ًفي يوم من الأيام ؟!!!..
والجواب : لأ !!!..
لأن طول ما التسلسل ده شغال من غير بداية أمر : فمش هاتنضرب أبدا ً..

-- مثال فعلا ًجميل ومعبر وقريب من نفس المعضلة اللي كلمتك عنها ..
يبقى الرد الأمثل على شبهاتك الغريبة واللي من النوع ده يا أخ حسام :
هو إنك تعرف يعني إيه الله عز وجل اللي بنعبده سبحانه !
هو الخالق .. هو الأول بلا بداية .. والآخر بلا نهاية ..
وكل ما عداه مخلوق وحادث ...
ولا احنا أول مَا خلق .. ولا آخر ما خلق ..
ولا نقدر نتكلم عليه بحاجه ما قلهاش لينا بنفسه أو رسله :
ولا بحاجه فيها تشبيه بينا إحنا وعالمنا ووجودنا : تعالى الله عن ذلك ..!

><>< استغفر الله العظيم !!..
فعلا ًيا شيخ محمد والله !!!.. الكفر ده خبل في خبل !!!!..
أنا كل الكلام اللي قلته ليك لحد دلوقتي : حاسس إني كنت زي الطفل الصغير اللي
كان سرحان بخياله وأساطيره الخرافيه : وبعدين لما كبر : عرف أد إيه كانت تافهه
ومش حقيقية !!..
بس الفرق بيننا إن الإنسان اللي كبر : ممكن ما يبصش للفترة دي بندم : عشان كان
طفل صغير مش فاهم حاجه ..
إنما أنا بابص لكل الأفكار دي بندم وقرف والله !!.. لأن عقلي كان فيها أصغر من
أصغر طفل : مع إني كنت راجل كبير !!!..
فعلا ًأنا حاسس إني عايز أبكي !!!!..

-- يا أخ حسام هون عليك .. إنت مش أول واحد يفوق من غيبوبة الكفر والإلحاد !
المهم إنك تكون عرفت أخطاءك وإزاي الشيطان دخل لك !!.. عشان ما تتكررش
تاني على الأقل .. أو عشان تعرف تنصح الناس بعد كده عشان ما يخشوش نفس
الغيبوبة دي بإرادتهم زيك للأسف ..

><>< إهيء إهيء .. صدقني يا شيخ محمد ... ففففف .. همف .. أنا حاسس
إن صدري بيوسع كل ما مر بينا الوقت .. حاسس إن روحي بتعلى عن جسمي !!!..
وهاقولهالك ياشيخ محمد صادق فيها والله : أشهد .. أن .. لا .. إله .. إلا .. الله ..

--------
-----------------

>< أنا اللي سبقتك برضه يا والدي ... إنت خلاص بقى : راحت عليك ..!

> لا يا وليد .. أنا كنت بجري أنا وأبي براحه : عشان ما نخبطش في الناس ..
انتا بس اللي أخدتها طيران كأنك في سبق !!..

><>< هيا السُـنة أصلا ًيا وليد الجري بسرعه فعلا ًبين العلامتين الخضر :
بس في حالة الزحام الكبير زيده : والستات والناس الكبيره في السن اللي كانوا
قدامنا : هاتعرف أنا مجرتش بسرعه ليه ..

>< ما انا عارف كل ده يا والدي .. بس برضه انا اللي سبقتكوا ..!

><>< إنتا عمرك ما هتفهم عشان راسك ناشفه .. طب أقولك على حاجه :
مش احنا قرينا إن السُـنة في أول تلت أشواط من الطواف حولين الكعبة :
الرمل ؟!!.. يعني الجري بسرعه برضه ؟!!..

>< آآه ..!

><>< طب إحنا مجريناش ليه يا ذكي ؟!!!..
>< نجري فين يا والدي !!.. هوا احنا كنا عارفين نمشي أصلا ً!!..

><>< شفت بقه .. أهو ده اللي أنا اقصده ...

> أمي جت أهي يا أبي ..

><>< حمد لله ع السلامه يا سيتي .. إنتي بطيئة في مشيك كده ليه ؟!!..

><> البركه فيكو إنتو لما جريتوا بين العلامتين الخضر !!.. لعلمكوا : أنا
لازم أقف وقت أطول في الدعا عند الجبلين !!.. ع الأقل أريح رجلي شويه !!
المسافه ما شاء الله كبيرة بين الصفا والمروة فعلا ً!!!..

>< ع العموم : كويس إن الصفا قريب من العلامتين الخضر أهوه : هانقف
براحتنا يا أمي ما تقلقيش ..

><>< أيوه .. وخصوصا ًإن عندي دعا كتير برضه عايز أقوله ..
ياللا عشان بعديها نبدأ الشوط التالت إن شاء الله ...

--------
-----------------

-- بص يا أخ حسام .. أسئلتك عن ربنا عز وجل : أسئلة سهلة وبسيطة وقديمة !
بس انت اللي كنت أصلاً مش مستعد تسمع الإجابة قبل كده !!..أما دلوقتي :
فأعتقد إن الوضع تغير ....
إنتا سألتني مثلاً : ربنا كان بيعمل إيه قبل أما يخلقنا ويخلق الكون اللي نعرفه ده ?..
صح ؟؟..

><>< أيوه يا شيخ .. واعذرني معلش ع السؤال .. بس صدقني : ما حدش
عرف يجاوبني عليه ..

-- أبشر يا سيدي .. وأنا بقه بقولك : إن ما حدش أصلا ًهايعرف يجاوبك عليه !

><>< ليه كده يا شيخ محمد ؟!!..

-- سهله خالص يا أخ حسام ..
دلوقتي إحنا في الإسلام : ما نعرفش حاجه عن ذات ربنا : إلا من القرآن أو السنة :
صح ؟؟.. واللا أنتا تعرف حاجه تالته في الإسلام ممكن تكلمنا عن ذات ربنا ؟!!..

><>< لا لا كلامك صح ..

-- طيب .. بص بقى يا سيدي ..
أنا لو سألتك : أنا كنت بعمل إيه امبارح الساعه 3 .. هتقدر تعرف ؟!!!..

><>< لا طبعا ً!!!..

-- ليه ؟!!..

><>< لأني ما كنتش موجود معاك أصلا ً!!..

-- كويس .. وهل فيه حد كان موجود مع ربنا قبل ما يخلقه أو يخلقنا : عشان
يجاوبك على سؤالك ده ؟!!..

><>< طبعا ًلأ !!..

-- خلاص يا أخ حسام .. إنتا جاوبت على نفسك !!..
يبقى طالما ما جاتش المعلومه دي في القرآن والسنه .. وطالما ما تعرفش حد
كان موجود مع ربنا : يبقى هاتعرف الإجابه منين ؟!!.. صح ولا لأ ؟!!..

><>< صح فعلا ً.. كلامك مظبوط ومنطقي !!..

-- طب سؤال مني أنا بقى ليك عشان أعرفك : مدخل من مداخل الشيطان
لتبويظ الدين عليك برضه ...

><>< اتفضل ...
سؤالي هوا : هل ربنا طلب منك في الدين : معرفة هوا كان بيعمل إيه قبل ما
يخلقك أو يخلق الكون ده ؟!!..

><>< مممممم ... ههههه .. لأ !!..

-- يبقى عرفت بقى إن الشيطان قدر يضحك عليك ويشغلك بحاجات في الدين :
هيا أصلا ًما حدش طلبها منك ولا حتى هايحاسبك عليها ؟!!!..
يعني في الآخر : الكافر عقله مستباح لوساوس الشيطان الكفرية !!!!..
مرة يفكر في : مين اللي خلق ربنا ؟!!!.. ومرة يفكر في أكوان تانيه بآلهة تانية !!!..
ومرة يفكر في : هو ربنا كان بيعمل إيه قبل أما يخلقنا !!!!..
الله يرحم الصحابة اللي فتحوا العالم ونوروا الأمم بالحضارة الإسلامية والعلم !!!..
عملوا بنصيحة رسول الله : فارتاحت دماغهم وبعدوا عن الخبل ده كله اللي ما لوش
مكان إلا عند ضعاف الدين والإيمان للأسف !!!..

><>< فعلاً يا شيخ محمد .. أنا عارف النصيحة اللي انت تقصدها دي ..
لما قالوا لرسول الله إن الواحد فينا بيفكر ساعات في مين اللي خلق كذا .. مين اللي
خلق كذا .. لحد ما يسألوا : مين اللي خلق الله ؟!!!..
وساعتها رسول الله قاللهم : يستعيذوا بالله وينتهوا ...
صدقني يا شيخ محمد : أول مرة أحس بأنه سلاح مختصر ناجح ومفيد ومُركز : حماهم
من شر الشيطان : بقطع حبل التفكير الكفري اللا منطقي عليهم من أوله !!!..

-- قيس على كده كل باقي الاسئلة اللي مالهاش لازمة يا أخي ..
يعني مثلاً سؤال : مين اللي خلق ربنا ؟!!..
لو عايز تجاوب عليه بالعقل برضه هاتعرف : بس رسول الله اختار لأصحابه الأسلم ..
وده المفروض يعمله كل مسلم ..
لكن هاجوبك برضه بعكس السؤال وأقول :
وهل ربنا أصلاً قال إنه اتخلق ؟!!!..
أو : هل عندك دليل واحد إنه اتخلق ؟!!!..
يقوم يرد الملحد ويقول : مش إنتو اللي بتقولوا إن لكل محدث : حادث ؟!!!..
نقوم نقوله : يا جهووول : وحد قاللك إن ربنا حادث ؟!!!..
الحادث : هوا اللي ما كانش موجود فترة من الزمن : وبعدين اتوجد من العدم ..
حد أحدثه ..
والسؤال : هل ربنا حادث يا أعمى البصر والبصيرة ؟!!..

><>< أنا ؟!!!..

-- هههههه .. لا مش إنت يا أخ حسام !!.. أنا باعطيك مثال بس للحوار
المفترض معاهم .. نكمل ...
ربنا بيقول عن نفسه إنه : الأول بلا بداية !!.. والآخر بلا نهاية !!!..
فإزاي هايكون حادث ؟!!!..

><>< فعلا ًكلامك منطقي في النقطة دي كمان يا شيخ محمد .. أنا نفسي فهمت
دلوقتي حاجه كمان ..

-- وإيه هيا ؟!!..

><>< ربنا وجوده مش زي وجودنا !!!.. إحنا اللي اتخلق معانا حياة وموت !!..
إنما هو ما عندوش أصلاً الكلام ده !!!..
زي ما احنا بنصنع مثلاً عربية : ونعملها بتمشي بالبنزين !!.. وبأربع عجلات ..
فهيا في الحالة دي ممكن تستغرب : إزاي الإنسان بيمشي من غير بنزين ؟!!.. ومن غير
أربع عجلات !!.. والحقيقة : إن هيا اتصنعت على الأساس ده وما تعرفش غيره !!..
صح ؟!!!..

-- صح يا أخ حسام .. ولله المثل الأعلى طبعا ً...
وفعلا ًكلامك عن اختلاف وجود الله عن وجودنا : كلام صحيح .. وحتى من ناحية
العلم نفسه !!.. فهو سبحانه اللي خلق الكواكب والأرض والشمس والقمر ..
ومعروف إن الزمان بيعتمد عليهم وعلى دورانهم وحركتهم في تحديد اليوم والشهر
والسنة .. يعني الزمان بيعتمد على المكان والكون اللي خلقه ربنا ..
ممكن اليوم على كوكب الأرض : يختلف في الطول عن اليوم في كوكب تاني !!!..
وعشان كده نلاقي ربنا بيقولنا في القرآن إن عنده يوم : بألف سنة من أيامنا !!!..
ويوم القيامة : بخمسين ألف سنة من أيامنا !!!..
والسؤال :
هل ربنا اللي خلق المكان وهو خارج عنه : هيبقى الزمان بالنسبة ليه : زي الزمان
بالنسبة لينا ؟!!..

><>< لا طبعا ً...

-- يبقى عرفت دلوقتي كمان : تهافت اللي بيسألوا عن تفاصيل زمنية لربنا سبحانه :
وكأنهم أحاطوا بكل شيء ٍعلما ً؟!!!..
وحاجه كمان أخيرة يا أخي ...
وهي إن صفات ربنا سبحانه : موجودة فيه سواء حصل مقتضاها أو لأ !!!.. لأنها صفات
لذاته عز وجل !!.. ودينقطة مهمة جدا ًللرد على اللييقولك ربنا محتاج لينا !!!!..
ساعتها تقوله :
زي ما الإنسان الكريم : صفة الكرم فيه قبل اما يقوم بعمل يظهر فيه كرمه :
فكمان ربنا سبحانه ولله المثل الأعلى :
هو خالق في ذاته : حتى ولو مخلقش !!..
ومجيد في ذاته : حتى ولو ما مجدهوش حد !!!..
وحميد في ذاته : حتى ولو ما حمدهوش حد !!!..
وكده في كل صفاته عز وجل ...

><>< سبحان الله ...
فعلا ًإجابات وردود بسيطة ما كانش الواحد واخد باله منها قبل كده يا شيخ محمد !!..

-- الحمد لله إنك قلت بنفسك إنها بسيطة ..
وبكده أبقى أجبتلك على نوعية أسئلة كانت محيراك هيا كمان .. واديتك من العلم
اللي ممكن تجاوب بيه على أسئلة شبهها كمان : أو متفرعة منها ..
وأما نصيحتي الأخيرة ليك يا أخ حسام قبل أما ننتقل للنقطة الرابعة هي :
1... اعرف إن الشيطان ليك عدو : وزيما ربنا قال .. يبقى لازم تنتبه لوساوسه ..

2... هايحاول يشغلك بالتفكير في حاجات غريبة : مش مطلوبة منك أصلاً في الدين !

3... ودليلها : إن ما حدش يعرف إجابتها إلا ربنا سبحانه !!.. يبقى ليه تنشغل بيها ؟

4... وأقل ما فيها : إنها هاتشغلك عن المطلوب منك أصلا ًفي الدين :
وده لوحده هدف أدنى للشيطان من أي مسلم !.. وإلا بالله عليك يا أخ حسام :
هل إنت متخيل كنت في سنين ترددك وإلحادك دي : وقرايتك بالعربي والإنجليزي في
كتب الدين والعلم : هل متخيل لو نص المجهود ده بس كنت عملته للدين : أو لدعوة
مسلمين غير عرب مثلاً للإسلام : هل متخيل كنت هتكسب أد إيه من الخير ؟!!..
وهل متخيل كان هايستفيد منك ناس أد إيه متشوقين يعرفوا الحقيقة عن الإسلام ؟!!..

><>< فعلا ًيا شيخ محمد والله !!.. على الأقل حتى كنت قريت ونفعت نفسي !!..
لا حول ولا قوة إلا بالله !!!.. طب دلوقتي يا شيخ محمد :
إيه النقطة الرابعة اللي انت اخترتها من كلامي ؟!!!..

-- نقطة إن لازم ربنا اللي خلقنا : يعرفنا بنفسه وما يسبناش كده !!!..
وإن من رحمته بينا إرساله للرسل والأنبياء والرسالات .... مستعد ؟!!!..

><>< مستعد .. اتفضل ..

--------
-----------------

><>< أظن رجلينا أخدت على السعي دلوقتي واحنا في بداية الشوط التالت صح ؟

><> أنا رجلي استريحت شويه لما وقفنا ندعي الحمد لله ..

> ممكن نشرب من مية زمزم يا أبي ؟..

><>< وهيا فين دي يا تامر ؟!!..

> أهيه .. بص يمين كده في الحته اللي هناك دي ...
الناس بتروح تشرب وتيجي أهيه ..

><> بس هل إحنا ممكن نروح ونخرج بره السعي ؟!!..

><>< أيوه يا سيتي ممكن .. وممكن نقعد نرتاح كمان لو عايزين ..

><> طب ياللا نروح نشرب ونريح رجلنا شويه ..

>< ياللا يا أمي ..

--------
-----------------

-- دلوقتي يا أخ حسام سؤال بسيط ...
هل ممكن أول واحد يخترع الغسالة الأوتوماتيك : يسيبها كده في أيدين الناس :
يلعبوا فيها وهما ما يعرفوش عنها حاجه : لحد أما تبوظ ؟!!!..

><>< آآآآه .. فهمت .. مممم .. لأ .. طبعا ًهايقولهم إن دي غسالة لغسل الهدوم :
وإنها بتشتغل عن طريق كذا وكذا : ويشرح ليهم طريقة استخدامها ..

-- جميل جدا ً.. وهل تعتقد يا أخ حسام إن الإنسان : ممكن يجيلو وقت فعلا ًيستخدم
نفسه في الحياة غلط ؟!!!..
بمعنى :
هل ممكن يعمل حاجات في الحياة أو يعتقد بمعتقدات : تكون غلط : فيبوظ نفسه ويهدم
نفسه بنفسه ؟!!!..

><>< الصراحة ... مممم .. أنا متاكد من كده !!!..
ويمكن أكتر حاجه بتوضح لي الحقيقة دي دايما ًيا شيخ محمد : هيا حالات انتحار الناس
اللي ما لهاش سبب مادي عادي ولكن : روحاني شعوري بحت !!!..

-- زي إيه مثلاً يا أخ حسام ؟!!.. ممكن تديلي أمثلة ؟!!..

><>< ممممم .. زي مثلا ًالجنود الأمريكان !!.. سواء بعد الحرب العالمية التانية :
أو حتى من بعد الحرب على العراق !!!.. أفتكر إني في مرة قريت إحصائيات عن أعداد
انتحارهم بعد رجوعهم لبلادهم أمريكا : أعتقد إنها زادت عن ضحاياهم في الحرب نفسها !

-- والسبب ؟!!..

><>< أفتكر الوحشية والجرائم اللي ارتكبوها تحت الأمر العسكري هناك في العراق !
كمية التدمير وقتل الأبرياء والأطفال والعجزة : بل وحتى استخدام الأسلحة البشعة المحرمة
دوليا ً!!.. كل ده ما قدرتش نفوسهم تتحمل ذنبه لما رجعوا لبلادهم مع ذكرياتهم :
فمنهم عدد كبير أدمن عشان ينسى .. ومنهم عدد كبير انتحر عشان يهرب من أفكاره
وذكرياته الوحشية اللي ما تتناسبش مع إنسانيته !!!..

-- في أمثلة تانية عندك عن الانتحار يا أخ حسام ؟!!..

><>< يعني مش كتير .. هيا حاجات كنت بقراها كده متفرقة هنا وهناك كل فترة ..
منهم ناس كانوا ملحدين وانتحروا .. ودي بصراحة من الحاجات اللي كانت بتضايقني
جدا ً!!.. وعلى أد ما كنت باستهزأ بيهم في الاول وبوصفهم بالغباء : على أد ما حسيت
قريب إني ممكن أعمل زيهم بعد اما راسي بقت هاتنفجر من التفكير في الإلحاد واللادينية :
وبعد أما قلبي بقه يوجعني من جوه !!!..

-- وفي أمثلة تانية ؟!!!..

><>< يعني .. برضه شوية ممثلين وممثلات ومشاهير ومليونيرات .. إنت عارف بقه :
الأشخاص النجوم المشاهير دول لما حد بينتحر فيهم : بينتشر خبره إزاي ..
ودول كنت باستغرب جدا ًمن انتحارهم برضه !!..
يعني الواحد واللا الواحده فيهم : المفروض إن عنده كل حاجه بيحلم بيها أي حد مننا !..
فليه ينتحر ؟!!.. مش عارف !!.. وزيهم برضه السويد والدنمارك واليابان !!!..
وأما من جوايا : وهاقولك الحقيقة برضه زي ما وعدتك يا شيخ محمد :
كنت عارف إن القاسم المشترك بينهم كلهم هو : بُعدهم عن الدين !!!..
سواء بالمعاصي والفجور والبوظان والوحشية .. أو بالإلحاد !!!..
مش ده اللي انته هاتقولهولي دلوقتي برضه يا شيخ محمد ؟!!..طك . طك . طك ..

><>< مين اللي بيخبط ده ؟!!..

-- لا .. ده هاتلاقيه عم إبراهيم المؤذن .. أكيد استعوقوني لما اتأخرت عن ورد القرآن !
خش يا عم إبراهيم ...

->- السلام عليكم .. مش هاتيجي تختم معانا يا شيخ محمد الليلادي واللا إيه ؟!!..
الليلادي ممكن تكون ليلة القدر ...

-- والله يا عم إبراهيم مشغول مع الأخ في حاجات مهمة جدا ً.. إنتو فاضلكوا أد إيه
كده تقريبا ًعلى ختمة القرآن ؟!!!..

->- يعني .... تلت تربع ساعة كده ..

-- خلاص .. ممكن نلحقكوا في آخرها إن شاء الله أنا والأخ ..

><>< إنت والأخ إيه ؟!!!..

-- أنا وإنت .. إن شاء الله يكون ليك نصيب في الختمة ولو تقرا قل هو الله أحد : وتدعي
معانا بإذن الله ...

><>< لا يا شيخ محمد .. إنت بتهظر .. ما تخلنيش اتكلم قصاد الراجل ..!

-- زي ما بقولك كده يا أخ حسام .. وهاتشوف ..
بقولك إيه يا عم إبراهيم .. ما تجيب للأخ حسام كده فنجان قهوة من عندكو بره ؟؟

->- من عنيه الاتنين يا شيخ محمد ..

><>< لا لا يا عم إبراهيم شكرا ً.. مش بحب القهوة والله ..

->- حد ما بيحبش القهوة !.. ما هو لازم تشرب حاجه يا أستاذ .. دي ضيافة واجبة عندنا ..

><>< ممم .. إن كان ولا بد .. لو فيه كوباية ميه .. لأني عطشان قوي ربنا يخليك ..

--------
-----------------

><> يااه .. مية زمزم دي غريبه فعلا ً..

>< فعلا ًسبحان الله .. طعمها نفسه غريب !!..

><>< ما تنسوش تدعوا وانتو بتشربوها .. الدعوه معاها مجابة إن شاء الله ..
بس خللو فيكو يقين بس !!..

> يعني إيه خاللو فيكو يقين بس يا أبي ؟!!..

><>< يعني اتأكد إن ربنا قادر يستجيب لدعاءك وانتا بتشربها ..
صدقني يا تامر : ما فيش حاجه بعيده على ربنا أبدا ًوحاشاه سبحانه !!..
أنا اتعلمت النهارده درس كبير قوي في استجابة الدعا ..!
درس أكبر من اللي ممكن تتخيلوه !!..

><> درس إيه يا حسام ؟.. قولينا عليه ...

><>< لااااا .. مش وقته دلوقتي .. هابقى أقولكوا عليه بعدين ..
يا للا يا عم وليد يا بتاع السباقات !!.. قدامك العلامه الخضرا اهيه ..
أنا مش عارف والله إحنا جايين في عمره ولا جايين نتسابق !!..
ومع ذلك .. احتمال بعد شوية الراحه دول : وشرب مية زمزم ديه :
تلاقيني سبقتك بعون الله ..
يا للا .. دا احنا لسه يُعتبر في بداية الشوط التالت !!..

--------
-----------------

><>< شكرا ًع الميه الساقعة يا شيخ محمد ..

-- عقبال ما تشرب من مية زمزم إن شاء الله ..

><>< ياااه .. مية زمزم مرة واحده !!.. بس أطلع الاول م اللي أنا فيه !!..

-- ما تخافش يا أخ حسام .. إنت عديت معايا عنق الزجاجه زي ما بيقولوا !!!..
ثم كونك صادق مع نفسك الليلة دي : ده لوحده كفيل يوصلك للحق بأقل مجهود
إن شاء الله ..
وهاتشوف إنك إزاي في الآخر هاتقوم تقعد معانا بره وتقرا قرآن كمان .. وهافكرك !
المهم ..
يبقى انت اتفقت معايا دلوقتي إن فيه حالات بيبقى الإنسان فيها مش مُستخدم صح !
وإن ده فيه خطر على حياته نفسها !!.. واللي لو ما انتهاش بالانتحار : فكفاية البؤس
والشقاء النفسي والتوتر اللي بيعيش فيه الإنسان اللي مش عايش صح ؟!!..

><>< أنا فعلا ًمتفق معاك في النقطة دي يا شيخ محمد ..

-- طيب يا أخي .. هل من المنطقي بقه : إن ربنا يسيبهم كده : عايشين ومش عارفين
هما المفروض يعيشوا إزاي ؟!!!.. أو : يسيبهم كده مش عارفين هما اتخلقوا ليه ؟!!!..
واللي خالقهم : عايز منهم إيه ؟!!!..

><>< لأ .. فعلا ًالعقل بيقول إن ربنا لازم يبين ليهم ده ..

-- وهوه ده اللي ربنا عمله يا أخ حسام بإنزاله الرسل والرسالات السماوية !!!..
عشان يبين للناس :

1.. هو عايز منهم إيه .. لأن مش كفايه توصل بعقلك بس إن فيه رب ليك ..

2.. يبين ليهم إزاي يعيشوا الحياة الأمثل اللي بيها لا شقاء في الدنيا ولا في الآخرة !!..

><>< الله يفتح عليك يا شيخ محمد .. أهو أنا كده اقتنعت بضرورة إن يكون فيه
رسالة أو رسل من الله للبشر ..
لكن ده هايخدنا للأسئلة التانية اللي كنت سألتهالك ..
ليه ربنا مخلقناش كلنا مؤمنين .. أو : محولناش كلنا لمؤمنين وهو قادر على كده !!!..
وليه خلق الشيطان واداله القدرة الكبيرة دي على الوسوسة والشر : طالما ربنا ما
بيريدش إلا خير ؟!!!..

-- بسيطة يا أخ حسام ... ودي هي نقط السؤال الخامس اللي كتبتها وراك من
كلامك .. بس ركز معايا ....

--------
-----------------

><> ياللا نقف شويه واحنا بندعي فوق المروة .. هوا انتو كله ورا بعضه ورا
بعضه كده ؟!!.. خلونا نستريح شويه ..

> ياللا يا أمي خلينا نبدأ الشوط الرابع بقه ..

><>< ياااااااااه .. عارفه أحسن حاجه يا أم وليد في السنه اللي فاتت دي ؟

-- إيه يا حسام ؟!!..

><>< إني بقيت آخد نفس عميق : أملا صدري كله هوا : وبعدين أخرجه !!..
بحس إن الهوا وصل لكل حته في قلبي سبحان الله !!..
قبل كده : كان نفسي ضيق جدا ًوالعياذ بالله !!.. كأن فيه حاجه كابسه على قلبي
ومضيقا صدري !!!..

><> الحمد لله يا حسام ..

>< يا للا الشوط الرابع يا جماعه ..

--------
-----------------

-- بص بقى يا أخ حسام ...
ربنا سبحانه وتعالى : هو مصدر الخير في الوجود .. ومن كمال خلقه : إن زي ما
خلق خلقه كلهم : مفطورين على الخير والإيمان والطاعه : ومش في مقدورهم
أصلا ًغيرها ..

><>< زي الملائكة يعني ؟..

-- أيوه الله ينور عليك .. زي الملائكة ..
كان من كمال خلقه عز وجل : إن يخلق مخلوقات تانيه : تؤمن بيه وتعبده وتطيعه :
وهيا في مقدورها إنها تكفر أو تعصي !!..

><>< ودول زينا طبعا ً؟!!..

-- أيوه .. إحنا والجن ...

><>< طيب وليه خلانا نوعين إنس وجن ؟!!.. ليه ما خلناش نوع واحد بس ؟!

-- التنوع يا أخ حسام بين الإنس والجن :
يدينا كل صور الخير والشر الممكن ظهورها في الوجود من حرية الاختيار ...
الجن والإنس : عالم الغيب وعالم الشهادة !!.. عالم أقوى من عالم !!..
وحتى كمان الذكر والأنثى !!.. التابع والمتبوع !!.. القائد والمقود !!..
وكل واحد ليه اختباره حسب صفاته .. وكل واحد ليه أجره لو قام بدوره صح !

أنا هكلمك مثلا ًعن الجن والإنس ..
الجن بيمثلوا عالم الغيب .. يعني ليهم خصائص أقوى وأعلى من الإنسان بكتير !!!..
فهما ممكن يتشكلوا في أي شكل !!.. وممكن يختفوا زي الملايكة !!.. وممكن يطيروا
ويتنقلوا بسرعات كبيرة جدا ً!!.. وفي منهم أقوياء جدا ًزي العفاريت !!.. وفي منهم
أعمارهم طويلة جدا ً!!.. وكل دي صفات : هي أقوى وأعلى من جثمان الإنس ..
صح ؟!!..

><>< صح ..

--وبناء ًعلى اللي فات ده : كان المفروض إنهم يكونوا أقرب للإيمان والطاعة ..
أولا ً: لقربهم أكتر منا لعالم الغيب والملائكة ..

وثانيا ً: لأن نعمه عليهم أكتر وعلى أجسامهم وطبيعتهم أوفر ..
لكن يشاء ربنا سبحانه إن يكون في خلق تانيين وهما إحنا الإنس : نكون أضعف منهم
في عالم الغيب : لكن أكتر فعالية في العالم المشهود بعقولنا ووعينا وخيالنا !!!..
ومن هنا :
فكان سيدنا محمد أعلى درجة من أي مؤمن حتى من الجن : لإنه أضعف من الجن في
الخلقة والطبيعة !!!..
وكان إبليس هو أقبح درجة في الكفر من أي كافر : لإنه كان معاه كل مقومات الإيمان
لكنه ما عملش بيها !!.. يكفي الحضرة الإلهية اللي ما احترمهاش بحرية إرادته !!!..

><>< يعني ربنا ما خلقش إبليس أصلا ًشرير ؟!!!..

-- ولا حتى خلق غيره شرير يا أخ حسام !!..
ربنا خلق الجن والإنس كلهم عندهم حرية إرادة وحرية اختيار !!.. ده اللي ربنا
خلقه .. أما هما بقى : فهم اللي اختاروا بين الإيمان والكفر والطاعة والمعصية !!!..
وكل ده ربنا سبحانه وتعالى عرفه أول ما خلقهم ..
شوف ربنا بيقول إيه في القرآن :
" هو الذي خلقكم : فمنكم كافر !!.. ومنكم مؤمن " !!..

><>< مممممم .. يعني أفهم من كده إن أي حديث يشتبه عليا معناه في الجزئية
دي : يبقى المقصود بيه إن الكافر كافر بعد ما خلقه الله .. والمؤمن مؤمن : بعد ما
خلقه الله ؟!!!..

-- أيوه يا أخ حسام وإلا : فين العدل إني أخلق واحد كافر من الأصل : وبعدين
أعاقبه وأعذبه لإنه كافر ؟!!!..

><>< صحيح .. غريبة دي .. طيب يا شيخ محمد : ما كان ربنا ما يخلقهوش
طالما عارف إنه هايبقى فيه هناك كفار كده وهايعذبهم ؟!!!..

-- يا أخ حسام ..
إحنا مخلوقين عبيد عند ربنا سبحانه : " لا يُسأل عما يفعل : وهم يُسألون " !!..
هو اللي شاء يخلقنا .. وخلقنا بالفعل .. فهل ليك من الأمر شيء ؟!!!..
وسيبك من سفسطة الملحدين اللي كأنهم بيعترضوا على الله بجهلهم وكبرهم وغرورهم !
هو سبحانه اللي كتب النعيم للمؤمن اللي هيعمل خير .. وكتب العذاب للكافر !!!..
وزي ما قلتلك قبل شويه :
هو لو عايز أصلا ًكل الناس تبقى مؤمنة : فهو عنده الملائكة أصلاً : كلهم مؤمنين !!..
إنما إنت قيمتك يا أخ حسام في وسط مخلوقات ربنا : إنك تؤمن : في حين إنك الوحيد
منهم اللي كان ممكن تكفر !!!..
وهنا أسألك سؤال في الصميم يا أخ حسام زي ما بيقولوا :
لو كان ربنا كله خير : ومابيصدرش عنه إلا خير وحكمة : وإنت كفرت بيه أو أنكرته
وأنت عارف بوصفه ده : تبقى انت إيه ؟!!..

><>< مممم .. هيا دي عايزه سؤال طبعا ًيا شيخ محمد ... طبعا ًهاكون أنا شر !

-- بس خلاص يا أخ حسام !!.. يبقى إنتا أفتيت نفسك !!!..
ويبقى إنت عرفت ليه العذاب أبدي للكافر في جهنم !!!..
فمجرد كفره بالله : هو أشر الشر !!!..
ولما ربنا عارف كده من كل مخلوق خلقه : كان من عدل ربنا إنه ما يعاقبش بالنار أو
ينعم بالجنة علطول !!.. وإنما الأول : لازم يظهر الحُجة على كل واحد فينا !!!..
ومن هنا جه الابتلاء والامتحان في الدنيا دي !!..
هيا دنيا إظهار للي ربنا عارفه من كل واحد فينا !!!..
هو بحكمته اختار لكل واحد الظروف والحال اللي يظهر حقيقته !!!..
من أول اختياره لزمن ميلادك والعصر بتاعك !!.. واختياره لأبوك وأمك !!.. ولمجتمعك
وصفاتك وفقرك أو غناك أو صحتك أو مرضك أو قوتك أو ضعفك إلخ إلخ إلخ
كل ده بتقدير كامل من الله سبحانه !!!..
وأما الدليل إنه ما ظلمش حد :
إن مش كل اللي كان فقير مثلاً كفر ونقم على الله !!!.. بل فيهم اللي صبر وزاد إيمانه
وشكره وحمده لربنا حتى مع فقره !!!..
ومش كل اللي كان غني مثلا ًجحد أو اتكبر أو بخل !!!.. بل فيهم اللي شكر واتصدق
وزاد تواضعه لله ورحمته بخلق الله !!!..
وقيس على كده المريض والضعيف والقبيح إلخ إلخ إلخ
كل دي أدوات الاختبار يا أخ حسام ..
وفي الجنة :
كل ده يزول ويرجع كل واحد فينا لأحسن حال وأحسن جسم وأحسن عيشة !
حتى مش كل اللي اتولد على دين غير الإسلام : مات على دينه !!.. لا .. كتير منهم
دور على الإسلام أو لما اتعرض عليه الإسلام دخل فيه !!!..
وفي المقابل برضه : مش كل اللي اتولد على الإسلام : مات على الإسلام !!.. بل منهم
اللي ارتد أو نافق مثلا ًوالعياذ بالله !!!..
فكل حالة بشر : حُجة على الحالات اللي زيها !!..

><>< طب والناس اللي نزلوا الدنيا دي عندهم امراض من ساعة الولادة ؟!!..
أو في حياتهم أو ابتلاءاتهم كانت أكتر من غيرهم ؟!!.. هل يتساووا مع التانيين ؟!!..

-- لا يا أخ حسام .. النبي صلى الله عليه وسلم بيقول إن حسابهم هايبقى يسير جدا ً
في أهوال يوم القيامة والحساب : لدرجة إننا نتمنى لو كنا اتعذبنا عمرنا كله في حياتنا
زيهم !!!.. شرطهم بس إنهم يصبروا على امتحان ربنا ليهم ويحتسبوا ويؤمنوا بيه ..

><>< طب واللي ماتوا وهما صغيرين يا شيخ محمد ؟!!!..
أو اللي ماتوا ومعرفوش الإسلام أصلا ًأو عرفوه بصورته المشوهة مثلا ً؟!!!..

-- دول بقى يا أخ حسام من النوع اللي امتحانهم هوا سؤال واحد .. وربنا ادخره
ليهم في يوم القيامة !!!.. لأن الله سبحانه ما يحاسبش حد ما وصلتلوش رسالة !!..
فكل الناس جالها رسل أو سمعوا برسل من الله .. وأما دول : فالله سبحانه هو اللي
هايمتحنهم بنفسه يوم القيامة : هايؤمرهم يرموا بنفسهم في النار !!!..
فلو أطاعوه : مش هايلاقوا حرها !!.. ولو عصوه : فإذا عصوا الله نفسه : فكانوا
هيعصوا رسله أكيد في الدنيا !!!..
وأما بعض الحكمة أو الحِكم العظيمة من كده :
فهيا في قدرة ربنا سبحانه إنه يخلي من ناس زي دول امتحان لغيرهم في الدنيا !!!!..
ففي ناس كفروا بسببهم مثلا ً!!!.. وناس وصفوا ربنا بعدم العدل !!!.. وكل دول
وقعوا في غلط واحد : زيهم زي اللي بيتحسر على المظلومين في الدنيا أو المقتولين !
كلهم بصوا للدنيا بس : ونسيوا إن فيه آخرة !!!..
ومن هنا كان وقوعهم في الكفر للأسف !!!..

فأما الشيطان الأول : اللي هوا إبليس : فبرضه ربنا لما علم إنه أخبث خلق الله بحرية
اختياره : مهد ليه طريقه اللي احنا عارفينه دلوقتي !!!..
الأول كان الامر بالسجود لآدم عليه السلام سجود تحية :

وده كان الموقف اللي ظهر إبليس على حقيقته :

وكسر حجاب التمثيل والنفاق عنه !!!..
لدرجة إنه من شدة كفره : هو اللي طلب من الله إنه يمد في عمره لحد يوم القيامة عشان
يغوي كل البشر والجن العاديين اللي يقدر عليهم !!!..
يعني كل ده كان ربنا مقدره وعالم بيه .. ولو ماكنشي عايزه يتم : ما كانشي هايتم ..
ولكن إرادة ربنا الكونية في إظهار الخير والشر والكفر والإيمان :
هيا اللي بيها سمح للشر بإنه يحصل في الكون .. لانه لو ما حصلش : ما كانشي هايبقى
حُجة ودليل على أصحابه ...
أما إرادة ربنا الشرعية : فهي إرادته للخير ..
فهمت رد أسئلتك دلوقتي بقه يا أخ حسام ؟!!!..

><>< يااااه .. فعلا ًيا شيخ حسام .. إنتا ربنا بعتك ليا الليلادي !!!..
أول مرة أبص للأمور من النظرة الجديدة دي !!!..
يعني أفهم من كده برضه إن زي ما إبليس كان أخبث خلق الله : وعشان كده ربنا
ساقه لأخبث عمل في الوجود :
فبرضه النبي محمد عليه الصلاة والسلام : كان أطهر خلق الله : فساقه ربنا لأطهر
عمل في الوجود ؟!!!..

-- عليك نور يا أخ حسام .. ربنا بيقول : " الله أعلم حيث يجعل رسالته " !!..

><>< تخيل يا شيخ محمد أنا دلوقتي فيه نصوص كتير جايه في عقلي : وبدأت
أفهمها فهم جديد !!!..
يعني ربنا أما يقول :
" هو الذي خلقكم " : يعني وميزكم بحرية الإرادة والاختيار .. ولما يكملها ويقول :
" فمنكم كافر ومنكم مؤمن " يعني : باختياركم برضه وإن كان لسه ما ظهرش على
أرض الواقع !!!..
ولما يقول : " قل : كلٌ يعمل على شاكلته " يعني على حقيقته ..
ولما يقول : " فسنيسره لليسرى " و " فسنيسره للعسرى " : يعني ربنا ييسر لكل
واحد من جنس حقيقته اللي يناسبه .. واللي يناسب اللي اختاره كل واحد فينا لنفسه !
وده كده يبقى عدل ربنا تمام ..
إن اللي بلغ بيه ظلمه إنه يبقى في الضلال : يمد ليه ربنا من جنس اللي اختاره لنفسه !!..
" قل مَن كان في الضلالة : فليمدد له الرحمن مدا ً" !!!..
والعكس بالعكس ..
اللي اختار طريق الهدى : ربنا يزيده :
" والذين اهتدوا : زادهم هدى : وآتاهم تقواهم " !!!..
وعشان كده رسول الله كان بيقول :
" اعملوا : فكلٌ مُيسرٌ لما خـُلق له " ؟!!..
سبحان الله العظيم يا شيخ محمد !!.. وكأني أول مرة أقرا النصوص دي !!!.. مع إني
حافظ معظمها من صغري : وياما استشهدت بيها في شبهات في كتاباتي للأسف !!!..
أكيد الكلام وجها ًلوجه مع صدقي مع نفسي الليلة فعلا ًهما اللي عملوا فرق كبير !!..
الله يرضى عليك يا شيخ محمد زي ما ريحت قلبي !!..
اتكلم ياشيخ اتكلم .. ما تقفش أرجوك ..

-- أتكلم وما اقفش إيه يا أخ حسام : هو أنا تسجيل ؟!!!..
إحنا الحمد لله دلوقتي أجبنا على معظم الشبهات اللي على الدين كدين عموما ً...
وعرفت معايا إن ربنا كان صادق فعلا ًلما قال في القرآن إنه مابيظلمش حد !!..
إنما الإنسان هو اللي بيظلم نفسه بنفسه باختياره الكفر والعمى واستهانته بعذاب
ربنا !!!..
فأنا لو قلتلك دلوقتي : حد ماسك لسانك ولا بقك عشان ما تقولش الشهادة ؟!!..

><>< لأ طبعا ً!!!..

-- أهو ده اللي أنا اقصده ..
إنت معروف عند ربنا نهايتك وحقيقتك : تقديرا ًلا جبرا ً!!!..
أما بالنسبة ليك إنت : فلازم تخاف على نفسك لأنك لسه ما تعرفش نهايتك إيه !
وفعلا ًربنا ما بيظلمش حد ..
وفعلا ًهو بيدي كل إنسان ويساعده :في الطريق اللي اختاره الإنسان ده لنفسه !!!..
شوف ربنا بيقول إيه :
" كيف يهدي الله قوما ً: كفروا بعد إيمانهم !!.. وشهدوا أن الرسول حق !..
وجاءهم البينات " !!.. فعلا ً!!.. يبقى معناها إيه لو ربنا أجبرهم على الإيمان ؟!!..
كان خلقهم ملائكة من الأول بقى !!.. لكنه شاء إن يكون فيه خلق يعبدوه بحريتهم !
وشوف ربنا بيقول إيه كمان :
" والذين جاهدوا فينا " يعني جاهدوا أنفسهم للوصول للحق : " لنهدينهم سُبلنا " !
لكن التانيين بقى شوف ربنا بيقول عنهم إيه والجزاء من جنس العمل :
" في قلوبهم مرضٌ : فزادهم الله مرضا ً" !!.. وكمان :
" نسوا الله : فنسيهم " !!.. وكمان : " نسوا الله : فأنساهم أنفسهم " !!.. يعني
خلاهم ينسوا صالح أنفسهم وإنهم يلحقوا أنفسهم بالإيمان قبل الموت والعذاب !!..
وشوف كمان بيقول إيه عنهم بكل صدق : " ولو علم الله فيهم خيرا ً: لأسمعهم " !
أعوذ بالله من الخذلان يا أخ حسام !!!..
والله دول يوم القيامة هاتسود وجوههم من الكفر اللي كفروه في الدنيا بالله !!..
شوف ربنا بيقولهم إيه في واحدة من آيات كتير تهز قلب الغفلان والله :
" حتى إذا جاءوا قال : أكذبتم بآياتي ولم تحيطوا بها علما ؟!.. أم ماذا كنتم تعملون " ؟!!!..
وعلى كده بقه :
يتبقالي معاك شبهتين بس : هما اللي محتاجين الرد من كلامك اللي حكيتهولي ..
أما باقي الشبهات التانية : فكلها حاجات صغيرة هاتلاقي معظمها انت عرفته دلوقتي فعلا ً..
والباقي هتعرفه مع الوقت في الأيام والأسابيع اللي جايه .. أما الشبهتين فهما :
شبهة عن القرآن : إنه كلام الله فعلا ًخالق هذا الكون والبشر ..
وشبهة عن النبي محمد صلى الله عليه وسلم : إنه فعلا ًرسول الله الخاتم للبشر ..
والصراحة :
العاقل لو أثبت أي واحدة فيهم : التانية لازم تنثبت معاها أوتوماتيك !!!..
لأن لو القرآن كلام الله فعلا ً: يبقى الرسول محمد حق !!!..
ولو أن محمد صلى الله عليه وسلم هو رسول الله فعلا ً: يبقى أكيد القرآن كلام الله !
تحب تبدأ بإيه منهم بقى ؟!!..

><>< همممممم .. ياريت بالقرآن ..

--------
-----------------

><>< ماشاء الله عليك يا والدي ..
انت إظاهر مية زمزم جابت نتيجة معاك .. إنت دعيت إنك تسبقني واللا إيه ؟!!..
يعني سبقتني الشوط اللي فات بعد أما شربتها .. وكمان الشوط ده !!..

> أبي شباب أكتر منك يا وليد !!..

><> إلا صحيح يا حسام ..لو أنا سألتك عن إيه الحكمة اللي انت حاسس بيها
من كل شعائر العمرة دي ؟!!.. الإحرام .. الطواف ..السعي ..هاتقول إيه ؟!!..

><>< والله يا أم وليد ناس كتير اتكلموا في الحاجات دي فعلا ًوقالوا كلام جميل ..
لكني بافكر ف حاجه تانيه : هيا اللي أنا حاسس بيها حقيقي ...

><> وإيه هيا بقى ؟!!..

><>< لا .. خليها بعد أما نخلص سعي ونتحلل .. ساعتها هاتأكد إن كان شعوري
ده صح ولا لأ ...

>< ياللا يا والدي الشوط الخامس ..
العد في السعي أسهل من الطواف بكتير فعلا ً..

><>< نقف ندعي الأول .. وبعدين نكمل على بركة الله ...


يُـتبع إن شاء الله ...

[إلى حب الله]

-- دلوقتي بقه يا أخ حسام .. إيه الشيء اللي يقنعك إن القرآن ده من عند ربنا فعلا ً؟؟..
><>< همممم .. إنه يكون فيه معجزة ماحدش يقدر عليها أبدا ًمن البشر !..
حاجه كده زي إحياء عيسى عليه السلام للموتى أو عصاية سيدنا موسى .. حاجه
زي الحاجات المعجزة دي ...
-- طيب يا أخ حسام .. وقبل أما نتكلم في معجزة القرآن : واللي أنا عارف
إنك عارفها .. عايز أسألك سؤال الأول : هايفدنا كتير بعدين .. ممكن ؟
><>< اتفضل يا شيخ محمد .. لأني فاهم غنك فهمت أنا أقصد إيه ..
-- ماشي يا أخي .. السؤال هو : هل تنكر إن أشهر وأقوى أنواع الكفر :
هو كفر الجحود والتكبر والعناد ؟
يعني النوع اللي مهما يشوف آيات ومعجزات من ربنا : حتى ولو كان طلبها هو
بنفسه : برضه هايكفر !!!.. وبرضه هايخترع أي مخرج أو حُجة عشان يقول إن
المعجزة دي مش معجزة !!!..
يعني مثلا ً...
بني إسرائيل منهم اللي قالوا على سيدنا عيسى إنه ساحر !!!!.. وده بعد ما شافوه
بعيونهم بيحيي الموتى بإذن الله ويشفي الأكمه والأبرص بإذن الله !!!.. صح ولا لأ ؟

><>< فعلا ً.. غريبة دي .. ورغم إني افتكرتها دلوقتي من القرآن :
إلا إنني ما كنتش حاططها في بالي قبل كده !!!..
-- لا .. وكمان قالوا كده على معجزات سيدنا موسى !!.. صح ولا لأ ؟!!!..
><>< أيوه أيوه فعلا ً!!.. بدأت أفهم إنت عايز تقول إيه يا شيخ محمد !!..

-- يبقى كويس قوي .. ومقصود كلامي هوا يا أخ حسام :
هل معنى إن فيه معاندين ومتكبرين وجاحدين : بينكروا معجزات الله الحقيقية : بأي
تفسير ٍكان : هل ده ينفي عن المعجزات دي : إنها معجزات ؟!!..
><>< لا طبعا ً.. العاقل بس هو اللي فكره مظبوط وما بيخدعش نفسه .. أما
اللي بيراوغ وهو أصلا ًمش عايز يؤمن : فهو ده اللي هاينكر معجزات ربنا لأي
سبب هايخترعه من عنده ومن دماغه !!!..
-- كويس قوي ..
معجزة القرآن يا أخ حسام زي ما انت عارف هي : إن ربنا تحدى فيه الجن والإنس
إنهم يأتوا بمثله كله !!!... وبعدين تدرج للأسهل وتحداهم ياتوا : بعشر سور من
مثله !!.. وبعدين تدرج وتحداهم يأتوا بسورة واحدة من مثله : فعجزوا كلهم وإلى
اليوم !!!!.. فهل دي معجزة ولا لأ ؟!!!..
وهل يقدح فيها كبر المتكبرين وجحود الجاحدين وعناد المعاندين اللي بيحاولوا في
كل وقت وزمان ينكروا حقيقة هزيمتهم دي ؟!!..
الكلام سهل والادعاءات سهلة ...
ومحاولات الإتيان بمثل القرآن قديمة ولحد اليوم : وكلها شهدت إن القرآن حق !!!..
وغنهم عجزوا يأتوا بمثله !!!..
لا في معانيه ونظمها بنفس طريقته !!.. ولا بمعاني جديدة ونظمها بنفس طريقته !!..
عشان كده : إما تلاقيها محاولات هابلة زي بتاعت مسيلمة الكذاب لو تعرفها ...

><>< أيوه قريتها .. دي هابلة قوي فعلا ً...
-- وإما تلاقيها تقليد مفضوح لنفس معاني ونظم القرآن !!!.. وده تحايل بليد
ويدل على الإفلاس الكفري في الإتيان بمثل القرآن !!.. لأنهم استعبطوا وقالوا إن
مثله : يعني تقليده !!!!..
وما أغباهم !!!.. وهل لو أنا جيت على بعض الكلمات في الآيات مثلا ًواستبدلتها
بكلمات على نفس وزنها وقريبة في معناها : هل أبقى كده جبت جديد !!!!..
لو بدلت مثلا ًيعرفون : بيعلمون !!.. أو سيروا بامشوا وهكذا ... هل ده هو نقض
الإعجاز : وسيبك طبعا ًإن كل كلمة في القرآن لا يمكن تحط كلمة غيرها وتكون
أنسب منها أبدا ًبغير اللي قالها ربنا في نفس مكانها ...
><>< فعلا ًيا شيخ محمد .. أقنعتني تماما ً.. وللعلم : واحد من المسلمين عندنا
من فترة كان نقل موضوع بيتكلم كله عن آراء غير المسلمين من المستشرقين المنصفين
والمفكرين والعلماء في القرآن !!!.. وكان كلامهم مؤثر جدا ًويدل على إعجاز
حقيقي .. وخصوصا ًإن منهم غربيين كانوا متخصصين في اللغة العربية في جامعات
كبيرة في الهند وغيرها .. سبحان الله ...
طب سؤال متفرع عن السؤال ده يا شيخ محمد : عشان الشبهة دي تروح من عقلي
بلا رجعة ... ممكن ؟

-- اتفضل يا أخي ...
><>< ممكن واحد يقولنا مثلا ً: إزاي ربنا يتحدى إن البشر يأتوا بمثل القرآن :
ومعظمهم ما بيتكلمش أصلا ًاللغة العربية ؟..
-- بسيطة يا أخ حسام ..
هو لما سيدنا عيسى أحيا الموتى وشفا الأبرص والأكمه بإذن الله : وانت بنفسك اعترفت
إن دي معجزة إنت مقتنع إنها تصلح لتحدي كل البشر بيها .. السؤال :
هل لو جالك حد وقالك : لا .. دي تحدي بس للأطباء !!!.. وعشان كده هيا مش
لكل الناس !!.. هاتقوله إيه ؟!!!..
><>< ما شاء الله ع التفكير يا شيخ !!.. إيه الذكاء ده !!.. فهمت فهمت ..
هاقوله إن الأطباء لما عجزوا عنها : يبقى غيرهم اولى .. ويبقى بكده ظهرت المعجزة
لكل البشر !!!!.. صح ؟
-- عليك نور ...
><>< بالظبط لما واحد يتحدى مثلا ًعلماء الالكترونيات بجهاز فريد .. ويعجزوا
عنه مثلا ًكلهم : فيكون لغيرهم أعجز !!!.. بل وتصدق يا شيخ محمد : ما حدش أصلا ً
هايفكر يسأل السؤال ده زي ما بيسأله الملحدين دلوقتي للمسلمين !!!..
سبحان الله .. أول مرة آخد بالي من الحقايق دي .. ربنا يبارك لك يا شيخ ..

-- طبعا ًإحنا كلامنا هنا عن معجزة الإتيان بس بالقرآن وإلا : فالملايين اللي بيخشوا
الإسلام من كل دول ولغات العالم : عمر ما اللغة العربية وقفت حايل قدامهم ولاقينا
حد منهم ساب الدين مثلا ًعشان اللغة !!!..
فأصل الدين هو الإيمان بالله ورسوله وملائكته وكتبه واليوم الآخر والقدر خيره وشره ..
والإسلام : هو الشهادتين والصلاة والصوم .. والزكاة والحج للي يقدر عليهم ..
أما الاستزادة بعد كده من الشرع : عبادات وأخلاق ومعاملات إلخ :
فده إما بيتعلموه من الشيوخ والدعاة : أو بيقروه واحده واحده من الكتب : واللي
معظمها بيبقى مترجم والحمد لله ...
وللعلم يا اخ حسام لو ما كنتش تعرف : المسلمين العرب كلهم : تقريبا ًخـُمس
المسلمين اللي في العالم كله اليوم !!!.. يعني حجة اللغة العربية دي وإنها لغة العرب
بس إلخ : دي حجة ما لهاش وجود إلا ع الورق بس وفي منتديات وكتابات الإلحاد !
><>< صح .. صح كلامك يا شيخ محمد والله ...
طيب .. هل فيه حاجات تانيه بتدل إن القرآن ده من عند ربنا سبحانه وتعالى ؟!!!..

-- طبعا ًيا أخ حسام ..
يكفيك إن ربنا بيتحدى إنه لو كان القرآن ده من عند غير الله : لوجدوا فيه اختلافا ً
كثيرا ً!!!.. يعني لو كان القرآن ده من بشر ولا جن : وادعى صاحبه إنه من عند
رب العالمين : للقى الناس فيه مش اختلافات صغيرة ومعدودة ومحدودة بل : اختلافات
كثيرة !!!.. لأنك عشان تتكلم وكأنك رب العالمين :
لازم ما يكونش في كلامك أي خطأ ولو صغير :
لا في القرآن نفسه ولغته وبيانه وبلاغته وفصاحته !!!..
ولا في خيرية وعدل وحكمة شرعه وأخلاقه وعباداته ومعاملاته !!!!..
ولا في إخباره بالغيب : سواء الغيب في الماضي .. أو الحاضر .. أو المستقبل !!!!!..
ولا في إشاراته المعجزة في كل العلوم تقريبا ً!!!!!!..
من علوم نفسية واجتماعية وفلكية وتشريحية وفيزيائية طبيعية وكيميائية إلخ !!!!!!..
صح ولا لأ ؟!!!..

><>< سبحان الله العظيم .. صح يا شيخ محمد .. كلامك صح الصح !!..
-- ومن هنا يا أخ حسام : تلاقي حاجه غريبة جدا ًبخصوص إشارات القرآن
للعلوم ..!!!
><>< وإيه هيا يا شيخ محمد ؟!!..
-- تلاقي إن ربنا سبحانه وتعالى في القرآن يجيب لك الكلام الديني العادي من
ترغيب وترهيب وتذكير وهداية : ممزوج بالإشارات العلمية بطريقة ما يقدرش
عليها أي حد !!!.. سواء عشان اللغة نفسها وإزاي الكلام يشيل المعنيين مع
بعض !!.. أو سواء عشان الإشارات العلمية دي نفسها : ما حدش يقدر يعرفها
أبدا ًوخصوصا ًفي وقت النبي : إلا رب الكون ورب العالمين !!!..
><>< آآآآآه .. طيب ممكن تديلي مثال كده ع السريع يا شيخ محمد ؟..

-- ماشي يا أخ حسام ..
بص معايا مثلا ًللآية اللي جايه دي .. واللي ربنا بيتكلم فيها على ظلمات أعمال
الكافرين فيقول بعد ما ضرب ليهم مثال بالسراب :
" أو كظلمات ٍفي بحر ٍلجي .. يغشاه موج ٌمن فوقه موج ٌمن فوقه سحاب !!..
ظلمات ٌبعضها فوق بعض .. إذا أخرج يده : لم يكد يراها !!.. ومَن لم يجعل الله
له نورا ً: فما له من نور " !!!..
فالآيات كل اللي يقراها : يحس بظلم وظلمات نفس الكافر وروحه وأعماله ..
ده الشيء العادي : حتى ولو انت ما كنتش عايش في منطقة فيها بحر ولا ركبت
سفينة ولا عديت بالظروف دي كلها ... فالكلام واضح .. وعشان انت مؤمن
وبتصدق ربنا : فهاتصدقه كله حتى ولو كنت ما مرتش بيه قبل كده ..
لكن العجيب يا أخ حسام :
هو اللي اكتشفه العلماء من أقل من 200 سنة بس !!.. لما بدأوا يقدروا يغوصوا
تحت الميه لمسافات أبعد من 30 متر : اللي كان الغواصين العاديين بينزلوها قبل
كده في آلاف السنين من الماضي !!!..
فومن ساعتها وكل ما قدرات الغوص تكبر : وينزلوا لاعماق أكتر : بدأ الإعجاز
القرآني يظهر أكتر وأكتر !!!.. ولحد 60 سنة فاتوا : بدأت الصورة القرآنية
الإعجازية تبان ككل !!!.. وبدأوا يعرفوا إن فيه موج فعلا ًتحت سطح الميه بمئات
الأمتار !!!!.. ومن بعده بيبدأ النور يقل لدرجة الظلام التام !!!.. وأما التفاصيل
الأكتر وأكتر : واللي ما تعرفتش إلا قريب :
فهي اكتشاف العلماء لكائنات بحرية عجيبة : كل حياتها هي في الظلام الحالك ده !
وإن لولا إن ربنا سبحانه وتعالى مديها قدرات غريبة جدا ًعشان تشوف تحت الميه :
ما كانتش تقدر تعيش أبدا ًفي الاماكن العميقة دي تحت الميه بآلاف المترات !!!..
منها اللي بيولد نور من جسمه !!!!.. وطرق تانية عجيبة وسبحان الله العظيم !!..
وشوف ختام ربنا المعجز للآية : واللي زي ما قولتلك :
يتفهم بالمعنيين : الديني الإيماني : والعلمي المعجز :
" ومَن لم يجعل الله له نورا ً: فما له من نور " !!!..

><>< فعلا ًسبحان الله العظيم يا شيخ محمد !!!.. ياااااااه .. سيبني كده أخد
نفس عميق يملا صدري كله ... هاااااا .. هيـــه .. كأني كنت غارقان والهوا
خلص من صدري : وفجاة طلعت على وش الميه بنفس عميق وكبير يبعت الحياة
فيا من جديد !!!!..
أنا حاسس إن صخره كبيره تانيه ولا تالته ولا رابعه انزاحت من على قلبي يا شيخ محمد والله ..
وتصدق ... زي ما اكون خلاص مش محتاج تكلمني على أدلة صدق
رسول الله صلى الله عليه وسلم !!!.. وزي ما قلت إنت من شويه ..
طالما كان القرآن ده من عند ربنا فعلا ًواتاكدت من كده زي دلوقتي : فده لوحده
دليل على صدق النبي صلى الله عليه وسلم ...
-- لا يا أخ حسام ..
لازم أكلمك برضه عليه ولو باختصار .. عشان فعلا ًتتولد إنسان جديد الليلادي ..
متفقين ؟؟؟...

--------
-----------------

>< متفقين يا والدي ؟؟..
><>< متفقين يا سي وليد ..
><> متفقين على إيه يا حسام ؟!!..
> هما اتفقوا يا أمي على إنهم الشوط السادس اللي جاي ده : ما يجروش فيه كده
وخلاص بين العلامتين الخضر ..
><> يعني إيه الكلام ده .. دي سنة للرجاله لازم يعملوها في السعي !!!..
عايزين تسيبوها ولا إيه ؟!!!..
>< لا يا أمي .. إحنا اتفقنا أنا ووالدي إن طول السعي لحد ما نوصل للعلامة
الخضرا وقبل الجري : هاتكلم أنا ووالدي على ذكريات المسلمين والنبي والصحابة
في مكة .. وإزاي كانوا فيها متعذبين ومتضهدين .. وإزاي دخلوها في العمرة
اللي بعد صلح الحديبية : في عزة ومنعه .. وفي مهابة وقوة : تعمد النبي عليه الصلاة
والسلام إنه يظهرها للكفار في مكة .. وده سبب الجري في الطواف في الـ 3
أشواط الأولى .. وكمان بين العلامتين الخضر ..

><> والله فكره حلوة .. أنا هاشترك معاكو ..
><>< يا سيتي هو انتي عندك معلومات أصلا ًمن السيرة عن الحاجات دي ؟!
><> يا سلام يا عم حسام !!.. انت ناسي إني بحضر دروس في المسجد كل
أسبوع ولا إيه .. أبدأوا انتو بس : وهانشوف المعلومات اللي عند كل واحد فينا ..
بس إيه اللي جاب الفكره دي في راسكو دلوقتي ..
><>< يعني .. بدل ما ابنك وليد واخد الجري بين العلامتين الخضر كده سبق !
قلت نحس بشوية معاني للمناسك دي وأصلها وفصلها : وأهو ناخد على كده حسنات
بذكرنا للنبي وأصحابه وإزاي عانوا لحد ما وصل لينا الدين ده كده بكل عزة وفخر !
والله دينا عزيز يا أم وليد ..
بس إحنا اللي محتاجين نفوق لنفسنا ..

ياللا استعدوا للشوط السادس ..

--------
-----------------

-- ودلوقتي يا أخ حسام : هاسألك سؤال بسيط قوي .. ممكن ؟..
><>< اتفضل يا شيخ محمد ..
-- إنت دلوقتي آمنت برب الكون .. وإنه لازم يهدي البشر لدينه اللي
هايحاسبهم عليه .. لأن ده من كمال عدله زي ما قلنا قبل كده ..
ودلوقتي : هل لو كان رسول الله صلى الله عليه وسلم كذاب : هل من المنطقي
إن ربنا سبحانه وتعالى يرفع شأنه ؟؟.. أو ينصره في كل حياته ؟.. أو يخليه
هو صاحب الدين الظاهر لحد دلوقتي وبعد أكتر من 1400 سنة ؟..
><>< لا طبعا ً.. لازم ربنا يبين للناس إنه محتال وإنه مش رسوله وإنه كذاب !

-- كويس قوي .. أهو ده بالظبط اللي ربنا عمله مع كل رسول أو نبي كذاب !
هل تعرف فيهم حد مشهور اليوم ؟.. أو ربنا نصره في حياته ؟.. أو نصر رسالته
ودينه المكذوب بعد مماته ؟..
><>< لا أبدا ً.. ده حتى الميرزا القادياني الكذاب : لما قريت سيرته وفضايحه
وازاي كان بيقول على حاجات هاتحصل : وربنا يخزيه وما تحصلش !!.. وقريت
عن نهايته المخزية اللي استحقها كمان .. وطبعا لما نبص لأتباعه لحد اليوم : فهم من
أغبى البشر الصراحة !!.. ولا أسهل عندهم من الكذب والتأويل المجحف لأي نص
في القرآن أو الأحاديث عشان يمشي على مزاجهم !!!.. أنا اتكلمت مع بعضهم
لفترة : ونفضت إيدي منهم ومن دينهم وعقولهم بالتلاتة !!!..

-- كويس جدا ًيا أخ حسام .. أهو انت كده أغنيتني إني أضرب لك مثال ..
وشوف ربنا بيقول عنهم إيه :
" ومَن أظلم ممَن افترى على الله كذبا ًأو قال أ ُوحيَ إلي : ولم يوحَ إليه شيء " !!..
ومقصود كلامي هو :
إن المؤمن بوجود ربنا سبحانه وتعالى : واللي عرف الإسلام ونبي الإسلام عن حق :
هايعرف إن ربنا سبحانه وتعالى ما كانش هايرفعه ولا هاينصره ولا هايحاوطه بالحق :
مش بالباطل والخرافات اللي بتخلي الناس تسيب أديانها التانية زي النصارى واليهود
والهندوس وغيرهم !!!..
فدي لوحدها علامة عن تميز رسول الإسلام ورسالته اللي بلغها للبشر عن غيره ..
وهنا سؤال :
وهل ده ينفي إنه ما يحتجش معجزات ؟!!..
أقولك يا أخ حسام : لا .. لازم ربنا يأيده في حياته : وبعد مماته : عشان الناس
تثق فيه أكتر وأكتر إنه من عند رب العالمين !!.. بل الأعجب : أن تأييده حتى
بدأ من قبل ميلاده !!!..
><>< من قبل ميلاده كمان !!..
إزاي دي يا شيخ محمد ؟!!!..
-- بالبشارات يا أخ حسام .. بالبشارات ..
><>< صحيح والله يا شيخ حسام .. إنت تعرف إن موضوع البشارات ده
كان بسيببلي دايما ًصداع حقيقي لما بافكر فيه !!!..
ده مش كان بس بيثبت إن محمد نبي ورسول ومذكور وصفه واسمه ومكان ظهوره
وهجرته وأخلاقه ونصره وأصحابه وعباداته وختم النبوة اللي في جسمه .. البشارات
ما كانتش بتثبت إنه نبي ورسول وبس .. ولكن كانت بتثبت شيء تاني أكبر وده
اللي كان بيزلزلني بجد .. وهو إن فيه دين واحد من آلاف السنين : واهم حلقة وصل
فيه بعد العقيدة والتوحيد والأخلاق والعبادات : بشارة مستمرة زي بشارات النبي
محمد دي !!!..
وده معناه غن فيه رب واحد وإله واحد في الكون فعلا ً.. وعالم الغيب حقيقي !!!..
عشان كده كنت بحاول كتير أهرب من الاعتراف بصدق البشارات دي .. وأحاول
مرة أغير معانيها بتعسف زي ما النصارى بيعملوا .. أو حتى أحاول أدور على
منجمين كانوا بيقولوا حاجات عن المستقبل زي نستراداموس مثلا ً..
لكن في كلتا الحالات : أنا من جوايا كنت عارف نقد كل محاولاتي الفاشلة دي !!..
حتى نستراداموس عرفت بعد كده إنه منجم عادي جدا ً.. ومعظم تنبؤاته في كتابه
القرون : أصلا ًما حصلتش .. ودي لوحدها فضيحة زي اللي بيدعوا النبوة !!.. بل :
وحتى الحاجات اللي بيقولوا إنه تنبأ بيها وبالذات في حروب اوروبا والحرب العالمية :
طلع إن كل بلد كانت بتألف كلام وتنسبه ليه عشان تعمل حرب نفسية على البلد
التانية وإنه مكتوب في المستقبل إنها هاتنهزم إلخ !!!..
ولكن كنت باحتفظ بكل النقد والحقايق ديه جوايا للاسف ..

-- فعلا ًيا أخ حسام .. ناس كتير فاكره إن ما دام واحد قال حاجه عن المستقبل
وتحققت : يبقى ده ينفي تفرد النبي عن غيره !!!..
ونسيوا إن أي إنسان أصلا ًممكن يشوف رؤيا في منامه وتتحقق !!.. فهل كل ده
يهدم النبوة أصلا ً؟؟.. أقولك حاجه يا أخ حسام ؟...
><>< اتفضل يا شيخ محمد ..
-- كلمة نبي أصلا ً: يعني ربنا بيوحي إليه .. يعني فيه تواصل بينه وبين خالق الكون
عز وجل .. واللي عالم الغيب والشهادة .. وده معناه : إن المفروض إنه ولا غلطة
تكون في كلامه عن المستقبل كنبي .. ومن هنا تعرف الفرق بين النبي وغيره !!!..
فإخبار النبي عن الغيب والمستقبل : لا يمكن يغلط ولو مرة واحدة !!!..
في حين كل منجم العكس : كتير من تنبؤاته ما بتتحققش لأنها بتكون كدب : وواحد
على 100 منها بس اللي بيتحقق : لأن ده اللي بتسرقه الشياطين من أخبار السما
بسرعة قبل ما يضربها شهاب يموتها .. وكل ده طبعا ًبحكمة ربنا ..
هو سبحانه لو عايز الشياطين ما يقدروش ياخدوا شيء : مش هايخدوا .. ولكنه بيسمح
ليهم ببعض الأخبار عشان يمتحن عباده .. ويظهر اللي بيصدقوا كدب السحرة والمنجمين
من غيرهم الواثق بالله وعارف إنهم ما يملكوش علم الغيب ..
فيه فرق تاني كمان ..
نبوءات أي نبي كتيرة .. وما لهاش حد زمني .. بل ممكن النبوءة الواحدة تتكلم على
حاجات هاتحصل بعد مئات أو آلاف السنين !!!.. وتتحقق !!!..
أما غيرهم من المنجمين أو حتى أصحاب الرؤيا المنامية اللي بتتحقق : فبتكون محدودة
بزمن ..

><>< أضيفلك حاجه كمان يا شيخ محمد ؟... معنى كلمة الغيب : يعني كل ما
غاب عن حس وإدراك الإنسان .. حتى ولو في الحاضر .. ونوع من أنواع الغيب :
هو الغيب العلمي !!!.. وفعلا ًفي أحاديث كتيرة جدا ًللنبي عليه الصلاة والسلام :
فيها إعجازات علمية معجزة !!!.. أنا باعترف بكده 100 في الـ 100 !!!..
بل وتنبأ بحاجات ما وقعتش إلا بعده بقرون طويله .. من 6 قرون فيما أكبر !!!..
زي بركان بين مكة والمدينة .. وزي فتح القسطنطينية .. بل وحاجات زي علامات
الساعة الصغرى دي : زي تطاول الناس في البنيان .. وفتح المال على العرب ..
وضعف المسلمين وتداعي أمم الكفر عليهم .. وحاجات تانيه كتير جدا : كل ده
لو جمعناه للإعجاز الغيبي والعلمي في القرآن هو كمان :
وأخبار الماضي المذكورة في القرآن بتفاصيل جديدة انفرد بيها عن غيره : وثبتت
صحتها اليوم :
كل ده لو حاطينا في اعتبارنا إنه ما ظهرش فيه غلطة واحدة لحد الآن :
لازم نسلم فعلا ًإن النبي محمد عليه الصلاة والسلام مستحيل إلا إنه يكون من
رب العالمين !!!.. صح يا شيخ محمد ؟؟..

-- ما شاء الله .. أنا سيبتك تتكلم واستغربت إنك عارف كل ده !!!.. يعني
الواحد فيكوا بقه عارف حاجات يمكن كتير من المسلمين العاديين ما يعرفوهاش !
بس العناد وضلال النفس والشيطان للأسف !!!..
صح كلامك يا أخ حسام ..
وفعلا ً.. أغرب شيء للي بيفترض افتراضات للهروب من اعترافه بنبوة سيدنا
محمد صلى الله عليه وسلم : هو أنه بافتراضاته دي : هايخلي النبي إنسان مش
عادي !!!..
لأنه هاينسب للنبي الكمال في : الأخلاق .. والعلم .. وأخبار أهل الكتاب اليهود
والنصارى اللي احنا ماكتشفناهاش أصلا ًإلا اليوم !!!.. وينسب ليه علم الغيب !
وينسب ليه كمال اللغة والتحدي بالقرآن واللي لحد دلوقتي ما قدرش عليه إنس
ولا جان !!!..
ونسي في كل ده : إن النبي نفسه : عمره ما نسب لنفسه أي شيء من المعجزات
دي !!!.. بل لسان حاله زي ما جه في القرآن :
" قل إنما أنا بشر ٌمثلكم : يوحى إليّ " !!!..
بل كان في قمة التواضع بين اصحابه والناس عموما ً: اللي يعرفه واللي ما يعرفوش !
وكان بينهي أصحابه إنهم يطروه ويبالغوا في مدحه : لا يقعوا في تقديسه ورفعه لمقام
شرك بالله زي ما عمل النصارى قبل كده بعيسى عليه السلام !!!..
وكان لا يستحي من إنه يقول إنه عبد لله !.. ياكل ويجلس كما ياكل ويجلس العبد !
ولما كان السجود للملوك منتشر في وقته في الفرس والروم في إيران والشام على سبيل
التحية والتعظيم :
وحب بعض أصحابه إنهم يسجدوا ليه وهو أحق بالتحية والتعظيم من كل ملوك الأرض :
نهاهم عن كده .. بل كان يجلس في وسطهم : لا تفرقه عنهم من تواضعه !!!!..
والخلاصة :
إن كل كدابين الارض اللي ابتغوا الملك والنبوة الكاذبة : كانوا يتمنوا بس واحد على
عشرة من معجزات النبي وكمالاته بإذن ربه : عشان يثبتوا لنفسهم تفرد وسط الناس
وينسبوا لنفسهم قداسة وتعظيم وأكبر صلاحيات في حياتهم !!!..
كل ده : ونلاقي النبي صلى الله عليه وسلم كان أزهد الناس في الدنيا وتعظيم الناس
ليه بما فوق بشريته صلى الله عليه وسلم !!!..
ودلوقتي يا أخ حسام ..
هل أقدر أقول إنك رجعت لإسلامك أخيرا ً؟؟؟!!..
هل أقدر أقول إنك تشهد حقيقي لمحمد بن عبد الله : إنه رسول الله حقا ًوصدقا ً؟..

><>< والله مش عارف أقولك إيه يا شيخ محمد !!..
حاسس إني مهما أقول : مش هاقدر أوفيك حقك الليلة والله !!!..
أنا حاسس إني اتولد فعلا ًالليلادي من جديد .. فعلا ًولادة حقيقية كنت قبلها شبه
ميت والعياذ بالله !!.. كنت حي وبتعذب .. أو حي ومش حي !!.. والله أنا باندم
على كل الفترة السودا دي اللي فاتت من عمري بلا عمل خير يقربني من ربي
سبحانه !!!..

-- أتاكد يا أخ حسام إن كل شيء فيه فايده حتى ولو انت ما أخدتش بالك منها !
انت في الفترة دي عرفت حاجات كتير عن الإسلام .. وغصبن عنك بقيت تقرا
في حاجات ما كنتش تفكر تقرا فيها وانت مسلم عادي بسبب غفلتك !!.. وده
اكبر درس ليك عشان تصحصح لدينك يا اخ حسام .. درس قاسي أعتقد إنك
دلوقتي اتغيرت في قوة إيمانك وعلمك : أضعاف أضعاف ما كنت عليه قبل كده
غافل عن حتى أساسيات دينك ..
><>< لا يا شيخ محمد .. مهما تقول : إنت مش هاتحس باللي انا كنت فيه !!..
أنا كان قلبي ميت .. ما فيش سعادة ولا ضحك حقيقي حتى ولو ابتسمت !!!..
ما فيش أمل في الحياة ولا هدف يخليك تعيش أي لحظة زيادة !!!..
تفكيرك فجاة بقا عامل زي اللي قاعد في أوضة ضالمه وعمال يخبط في كل ما فيها !
عايز يلاقي باب ويخرج منه للنور : أي نور : ومش عارف ..
أنا كنت حاسس إن قلبي بيوجعني يا شيخ !!!..
عارف إيه قلبك يوجعك من غير مرض ؟!!!.. يعني .............

طك . طك

->- يا شيخ محمد .. فاضل لنا آخر ربع في القرآن ونختم ! إنتوا مش جايين ولا إيه ؟
-- يا نهار أبيض .. خلصتوا الـ 3 اجزاء وما حسيناش بالوقت !!..
لا جايين اهوه .. قول للجماعة ما حدش يقرا إلا أما نيجي ..
أنا معايا اللي هايقرا الربع الأخير ويدعي كمان ...

--------
-----------------

><>< أشهد أن لا إله إلا الله .. وأن محمدا ًرسول الله ..
هيا دي اللي المشركين حاربوا عليها النبي والمسلمين اللي معاه !!!..
هما كانوا عارفين إن ربهم الله .. ولكن : كانوا بيعبدوا معاه غيره !!!.. كان كل واحد
له إلهه اللي بيحبه ويدعيه ويعبده !!!.. فيه اللي بيعبد الصنم واللي بيعبد نجم واللي
بيعبد هواه ومزاجه وشهواته وماله !!!..
>< أكمل أكمل يا شيخ حسام .. دانتا طلعت شيخ حقيقي وإحنا مش عارفين !
><> كمل يا حسام ..
-- هو انتو استحليتوا العملية ولا إيه .. ع العموم خلاص : إحنا خلصنا الشوط
السادس : وهانبدأ الشوط السابع والأخير اهوه ..
> ما قلتش بقا يا أبي .. وليه حاربوه عشان إنه رسول الله ؟..
><>< مجرد شهادة : أن محمدا ًرسول الله يا تامر : يعني آخر خطوة الواحد فيها
بيعلن إنه هايخرج من شهواته ومزاجه وأفكاره الخاصة في معتقده وسيره في الحياة :
إلى اللي هايبلغه بيه رسول الله ليه : وهو محمد صلى الله عليه وسلم !!!..
ففيه منهم اللي اتحجج بأن النبي مش رجل مشهور بين العرب وعظيم من عظماؤهم !
وفيه اللي اتحجج إنه بشر !!.. وكأنه كان عايز ربنا يبعتله ملاك مثلا ً!!!..
وده طبعا ًغباء منقطع النظير !!!..
لأن أصل الحياة هو الامتحان في الإيمان والكفر .. ولو كان ربنا عايز الناس تؤمن
وخلاص حتى ولو عن غير اقتناع داخلي بل جبر وأمر واقع : كان ظهر بنفسه للناس
سبحانه !!!.. أو ملا الدنيا معجزات للمؤمنين بس !!.. أو نصر المسلمين دايما ًعلى
عدوهم وخلاهم هم بس أغنى الناس وأصح الناس إلخ .. ولكن ساعتها راح معنى
الامتحان !!!.. فده بالظبط زي اللي عايز يشوف ربنا أو يطلب ملاك عشان يشوفه !

>< كمان حاجه يا والدي .. وهيا إن كون الرسول بشر : عشان يبقى قدوة لينا !
لأنه لو كان ملاك وأمرنا بحاجات من عند ربنا : لكان كل واحد ما قدرش يعمل حاجه
كان يقول : أصل هوا ملاك : ومش حاسس بينا أو مش بيعاني زينا !!!..
أو يتهم ربنا ظلما ًوجهلا ًإنه أمر بالشرع ده قياسا ًعلى الملائكة اللي عنده :
أما إحنا بشر وما نقدرش عليها !!!.. فيتهم ربنا بالجهل وعدم الحكمة وحاشاه ..
صح يا والدي ؟؟..
><>< صح يا وليد .. ما شاء الله عليك .. عارف يا وليد ..
أنا بتمنى وانا في نفس سنك كده : إني كنت أبقى زيك !.. بس قدر الله وما شاء فعل !
><> المفروض تشكرني أنا يا سي حسام !!!..
واللا هو وليد طلع كده ملتزم فجأة يعني ؟!!!..

><>< البركة فيكي يا أم وليد فعلا ً.. والله من غيرك مش عارف كنت هاعمل إيه !
إنتي بالفعل سديتي فراغ كبير أنا قصرت فيه مع الأولاد !!!..
ربنا يجزيكي عني وعنهم كل خير ..
ودلوقتي بقه :
عايزين سكوت تام .. كل واحد يحاول يناجي ربنا زي ما هو عايز في الشوط الأخير ده .
ولو سمحتوا مش عايز حد يكلمني ..

--------
-----------------

->- إنت جبتلنا الأستاذ حسام ده منين يا شيخ محمد ؟!!..
مش تقول إن ليك أصحاب عاملين كده !!!..
يا شيخ ده من أول سورة قراها : خلى كل اللي قاعدين يبكوا زي الأطفال !!..
-- والله أنا نفسي بكيت بكا : قد اللي بكيته في رمضان كله لحد دلوقتي !!..
->- سبحان الله ..!
والله دي بركة الليلادي يا شيخ محمد .. مش قولتلك إن الليلادي ليلة القدر ؟

><>< الغريبة إن صوتي مش حلو أصلا ً!!!!..
-- ما هو ده السر !!!..
إنت قريت القرآن قراءة متدبر وكانك بتقولنا موعظة !!.. وعشان انت نفسك
صوتك مغشلق من البكا انت كمان : خلتنا كلنا بكينا معاك !!.. حتى وقفاتك :
كلها كانت بتأثر فينا أكتر وأكتر !!!..
><>< أنا حاسس إن قلبي زي ما تكون اتغسل !!!!..
اتغسل بميه ساقعة في الاول ليها شهقه وصدمة .. وبعدين دلوقتي حاسس بالدفء !

->- المهم إنه بعد البكا ده كله : وبعد الدعاء من الأستاذ حسام من آخر المصحف :
سبحان من خلانا نضحك كمان !!!..
اللهم يجعله خير !!..
دي أغرب ليلة عدت علينا في رمضان كله لحد دلوقتي !!!..
-- ياللا يا جماعة نريح شويه قبل صلاة التهجد ..
الناس هاتبدا تيجي للمسجد دلوقتي .. شوفوا لو عايزين تاكلوا حاجه خفيفه قبل الصلاة ..
وربنا يتقبل إن شاء الله ...
><>< شيخ محمد .. عايز أسألك حاجه .. بس في أوضتك لو سمحت ..

--------
-----------------

><> الحمد لله رب العالمين .. اللهم تقبل ..
><>< لسه أما نتحلل بقا يا أم وليد .. إنتي روحي مع الستات اللي هناك دول ..
هايقصولك شوية شعر صغيرين .. أما احنا بقى ........
>< أيوه !!.. إحنا مشوارنا طويل !!!..
إنت عارف يا والدي لو كنا في الدور اللي فوق : فيه باب من هنا من المروة بيطلع
علطول على بره : والحلاقين هاتلاقيهم ورا المروة .. أما دلوقتي ومن هنا من البدروم :
لازم نمشي لحد العلامتين الخضر : فيه باب من هناك هو اللي بيطلع على فوق ..

> يعني كأنه شوط كمان يا وليد ؟؟..
>< لا .. شوطين !!!.. لأننا هانروح وبعدين هانيجي نفس المشوار بس من فوق !
><>< يا جماعة .. المهم إنكوا خلصتوا المناسك بتاعت العمرة على خير ..

><> فعلا ًسبحان الله .. الحركة في المناسك : تحس إنك تعبان ومجهود وشد نفسي ..
بس بعديها : ممكن نفس الحركة والمجهود : بس الشد النفسي راح ...
><>< يا للا يا جماعة عشان ما نضيعش وقت ..

--------
-----------------

-- اتفضل يا أخ حسام .. فيه حاجه من اللي قولناه عايز تسأل فيها ؟..
><>< لااااا .. الحمد لله .. أنا عايز أسأل سؤال : حاسس بإجابته : بس عايز
أسمعها منك انت .. عشان لو كانت زي اللي أنا حاسس بيه : يبقى إحساسي صح ..
-- اتفضل اسأل يا أخ حسام ..
><>< هو ليه الإيمان راحة ؟.. والكفر تعب ؟..
معلش يا شيخ محمد .. هو سؤال غريب شويه ..

-- ليه الإيمان راحة ؟!!.. وليه الكفر تعب ؟!!!..
والله سؤال قيم جدا ًيا أخ حسام .. وما تسألتهوش قبل كده الصراحة !!!..
ولو أنا فهمت قصدك بالراحة والتعب إنهم للقلب ..
فاقدر أقولك بكل بساطة : واللي حاضر في ذهني دلوقتي :
إن الإنسان مفطور على طاعة ربنا سبحانه وتعالى وعبادته !!.. ما في إنسان حتى
الكافر إلا وهو عارف بالفطرة إنه ليه رب هو اللي خالقه وهو اللي مستحق لعبادته ..
ودي يمكن هيا شهادتنا لربنا في عالم الذر والمذكورة في القرآن : شوف ربنا قال إيه :
" وإذ أخذ ربك من بني آدم من ظهورهم ذريتهم : وأشهدهم على أنفسهم : ألست
بربكم ؟!!.. قالوا : بلى .. شهدنا .. أن تقولوا يوم القيامة : إنا كنا عن هذا غافلين " !
فلو الإنسان فعلا ً:
اعترف بالحقيقة دي في الدنيا : وآمن بالله ربا ً.. واطاعه وعبده كإله :
فنفسه تستريح لأنها في مكانها الطبيعي اللي اتخلقت علشانه !!!..
شوف ربنا بيقول إيه :
" وما خلقت الجن والإنس : إلا ليعبدون " !!!..
زي الغسالة مثلا ًلما تستخدمها كغسالة : تستريح وتبسط .. لكن لو استخدمتها
كتلاجة : هاتبوظ وهاتعاني !!!..
فهو الإنسان كده برضه !!.. بالإيمان والإسلام : ترتاح نفسه ويرتاح قلبه : حتى ولو
كان في دنيته وجسمه تعبان !!!..
وأما بالكفر والإلحاد والنكران والجحود للرب العالمين : رب الخير والبر والإحسان
والعدل : هايعيش دايما ًشقيان وتعبان و ( قلبه بيوجعه ) :
حتى ولو كان أغنى أغنياء العالم وتحت إيده كل شيء !!!.. فسبحان الله العظيم !!..
أقولك على حاجه غريبة يا أخ حسام .. بل : هيا بتثبت ليك أكتر وأكتر كلامي ده ؟

><>< اتفضل يا شيخ محمد ...
-- إنت تلاحظ بعد كل عبادة شاقة أو فيها تعب شوية عن غيرها :
زي التراويح مثلا ً: إنك وانت فيها : فعلا ًبتبقى مشدود نفسيا ًوفي جد واجتهاد ..
وأما بمجرد ما بتخلصها : بتلاقي راحة عجيبة !!!.. وتحس باطمئنان غريب إنك
اديت اللي عليك أخيرا ًوجه وقت الراحة !!!!..
أهيا كده الحياة كلها لو كبرنا النظرة دي !!!.. لو أديت فيها حق الله ربك : بجد
واجتهاد : هاتلاقي بعدها الراحة الأبدية والاطمئنان بجوار الله رب العالمين !!!..
أما اللي ضيعوا الواجب ده : فهما اللي مش هايحسوا بالراحة دي أبدا ًللأسف ..
><>< سبحان الله يا شيخ محمد .. ده اللي كان في بالي بالضبط ..!

-- إنت عملت عمره قبل كده يا أخ حسام ؟.. اعتقد لأ .. صح ؟
><>< فعلا ًلأ .. ويا ريت اعملها إن شاء الله ..
-- إن شاء الله ربنا يكتبهالك فعلا ً.. لكن لو كنت عملت عمرة : كنت هاتحس
أكتر وأكتر بالمعنى اللي بقولهولك ده !!!..
في العمرة فعلا ًتعب .. والحج تعب اكتر واكتر ومشقة وجهد في وقته ..
لكن بمجرد ما تخلصهم : سبحان الله العظيم !!!..
تحس إنك خلاص عديت !!.. إنك على قد تعبك في جسمك : ربنا كافأك في راحة
نفسك وسلامة قلبك !!!..

--------
-----------------

><> إيه الكلام الحلو ده يا حسام !!!..
عشان كده بقى إنت كنت بتقولي إنك مش هاتتكلم في الحكمة من مناسك العمرة
إلا بعد أما نخلصها ؟!!..
><>< أيوه يا سيتي .. وعلى فكره : إنتي نفسك قولتي نفس الكلام ده من
شويه .. سبحان الله ..
><> لا .. بس انت وضحت وفصلت اكتر ما شاء الله ..
><>< مش قوي كده .. ده كلام كنت سمعته من الشيخ محمد اللي حاكتلك عنه ..
><> كلام جميل ما شاء الله .. بس برضه ما جبتش سيرة الحكمة مثلا ًمن الطواف
والسعي إلخ
><>< انا فعلا ًسهل إني اكلمك عن إن الطواف مثلا ًلتعظيم بيت الله .. وكمان
السعي مظهر من مظاهر شكر الله : وتذكر لمجهود أمنا هاجر مع سيدنا إسماعيل عليه
السلام .. لكن الصراحة :
كل ده بيروح عندي في معنى واحد بس :
إن ربنا هو اللي يؤمر بعبادته زي ما يشاء سبحانه .. وبالمناسك اللي هو يحددها :
فهمنا الحكمة منها او لا .. ده مش مطلوب منك .. المطلوب إنك تعبديه زي ما أمر !
هو ده اللي هايريحك كإنسان ..
فأنا مثلا ًبشوف في الرقم 7 سواء في الطواف او السعي :
إعلان غن رب الكون ده وكل متلازمات رقم 7 فيه : هو رب الإسلام وإله الإنسان :
وخصوصا مع تكرار رقم 7 في المناسك هنا : وكمان اتجاه دوران أشواط الطواف أو
السعي !!!.. كل الحاجات دي تلاقيها في كون ربنا كمان : من أصغر ذرة : لاكبر
مجرة !!!..
يبقى الإنسان لما يعملها معاهم : كأنه بيقول : انا منسجم مع الكون كله المخلوق لله
رب العالمين .. ودي الراحة اللي اتكلمنا عليها !!!..
راحة إنك في مكانك ومصيرك وفطرتك الطبيعية !!!.. وغنك مش مخلوق شاذ في
كون رب العالمين !!!!..

>< يا والدي .. بعد الحلاقة دي بقه .. وبعد الكلام الحلو ده .. مش هاتأكلونا
حاجه بقه ولا إيه .. إحنا جعانين خالص !!..
> أيوه يا أبي .. أنا لو ما أكلتش دلوقتي : هاحس بالبرد في راسي الظلبطة دي !!..
><> وإيه العلاقة بقه يا تامر يا عبقري بين ديه والأكل ؟!!!..
> بسيطة يا أمي .. أنا لو اكلت : هانشغل في الاكل ومش هافكر في راسي !!!!..
><> الصراحة شكلكوا انتوا التلاته عايزلوه صوره !!!..
ما شاء الله .. وانتو راسكوا محلوقه كده ع الصفر وبالإحرام الأبيض ده : تحس إنكوا
طلعتوا من ذنوبكوا تمام !!!.. سبحان الله ..
>< ما هو عشان كده النبي قال إن السنة للرجال هيا حلق الشعر مش التقصير !
ودلوقتي .. هاتروح يا والدي تجيبلنا الأكل ولا إيه ؟!!!..
><>< وليه ما تروحش إنت يا سي وليد !!.. مش انت الشباب ؟!!..
>< والله يا والدي ما فيا نفس اتحرك خطوة بعد اما قعدنا هنا في الساحة خلاص ..
صدقني والله ..
><>< طب ما انا كمان تعبان .. والصراحة انا القوة اللي فيا تكفيني مشوار واحد
بس لحد المطاعم اللي هناك خالص دي .. يا رايح : يا جاي !!!..
هانعمل إيه بقه ؟!!!..

-->> يا مطوع .. يا مطوع ..
><>< في إيه يا أخي ..
> مطوع يعني إيه يا أمي ؟..
><> يعني راجل بلحية يا تامر ..
-->> تبي عمل خير ؟؟..
> تبي يعني إيه يا أمي ؟؟..
><> يعني عايز أو تبغي تقريبا ً...
واسكت بقى خلينا نشوف الأخ الافريقي ده عايز إيه من والدك ؟!!..
-->> ممكن تجلس هنا على المقعد ده وهادفك لحد ما نعدي الشريط اللي هناك !
><>< طب وفين عمل الخير يا اخي ؟!!!..
-->> هذا الامن يمنع نعدي بالمقعد فارغ .. وانا هناك في شغل كتير من الناس
اللي جايه من خارج مكة وعايزين مقعد في العمرة .. هل تسمح ؟!!..
><>< سبحان الله العظيم !!!..
طبعا ًطبعا ً!!!.. قولتلي اسمك إيه ؟!!..
-->> يعقوب أخي .. من نيجريا ...

--------
-----------------

>< الحمد لله رب العالمين !!!..
عارف الأكلة دي كانت عايزه إيه يا والدي ؟!!..
><>< إيه يا سي السيد يا للي ما تحركش من مكانه وأبوه هو اللي بيخدمه ؟
>< إنت زعلت ولا إيه يا والدي !!.. طب ما انت رحت راكب وجيت ماشي !
إيه المشكله !!.. مش انت كنت بتقول إنك تقدر على مشوار واحد بس !..
أهو ربنا جابوا لحد عندك ..
><> قول يا وليد .. الأكلة دي كانت عايزه إيه ؟..
> كانت عايزه فاكهة يا أمي .. صح ؟
>< صح يا تامر .. لاول مرة تقول حاجه صح !!!..
ما كنتش تجيب يا والدي موز ولا تفاح ولا أي حاجه كده من هناك ؟!!..
><> هو كده والدك يا وليد علطول .. ما لوش في الحاجات دي ..
><>< والله العظيم أنا مش هاتحرك تاني لما تعملوا إيه حتى !!!..

>--> إنت يا مطوع ..
><> فيه إيه تاني !.. هو ما فيش اللا أنت المطوع بس اللي هنا الليلة ولا إيه يا حسام !
> قول له إنك لسه راكب يا أبي !!!..
><>< أيوه يا أخي .. فيه حاجه أقدر أعملهالك ؟..
>--> هذا الرجّال هناك على الكرسي المتحرك : باعتلك هذه الفاكهة ..
><> لااااا بقاااا .. إنت لازم تقولنا يا حسام إيه حكاية الراجل ده معاك ...

--------
-----------------

تمت بحمد الله ..