السلام عليكم ورحمه الله
كنوع من الترفيه اليكم هذه الطرفه لكاتب حلمنتيشى يريدكم ان تشاركوه شعوره نحو نظام مبارك والذى مثله فى قصيدة بعنوان (من حسنى مبارك إلى الشعب المصرى)
هتطلع هتنزل هجيلك جمال
--------------------------------------------------------------------------------
يا شعبي حبيبي يا روحي يا بيبي
يا حاطك في جيبي يابن الحلال
يا شعبي يا شاطر يا جابر خواطر
يا ساكن مقابر وصابر وعال
يا واكل سمومك يا بايع هدومك
يا حامل همومك وشايل جبال
يا شعبي اللي نايم وسارح وهايم
وفي الفقر عايم وحاله ده حال
أحبك محشش مفرفش مطنش
ودايخ مدروخ وآخر انسطال
أحبك مكبر دماغك مخدر
ممشي أمورك كده باتكال
وأحب اللي ينصب وأحب اللي يكدب
وأحب اللي ينهب ويسرق تلال
[IMG]
وأحب اللي شايف وعارف وخايف
وبالع لسانه وكاتم ما قال
وأحب اللي قافل عيونه المغفل
وأحب البهايم وأحب البغال
وأحب اللي راضي وأحب اللي فاضي
وأحب اللي عايز يربي العيال
وأحب اللي يائس وأحب اللي بائس
وأحب اللي محبط وشايف محال
وأحبك تسافر وتبعد تهاجر
وتبعت فلوسك دولار أو ريال
وأحبك تطبل تهلل تهبل
عشان مطش كوره وفيلم ومقال
وأحبك تأيد تعضض تمجد
توافق تنافق وتلحس نعال
تحضر نشادر تجمع كوادر
تلمع وتقمع تظبط مجال
لكن لو تفكر تخطط تقرر
تشغل مخك وتفتح جدال
وتبدأ تشاكل وتعمل مشاكل
وتنكش مسائل وتسأل سؤال
وعايز تنور وعايز تطور
وتعمللي روحك مفرد رجال
ساعتها حجيبك لا يمكن أسيبك
وراح تبقى عبره وتصبح مثال
حبهدل جنابك وأذل اللي جابك
وحيكون عذابك ده فوق الاحتمال
وأمرمط سعادتك وأهزأ سيادتك
وأخلي كرامتك في حالة هزال
وتلبس قضيه وتصبح رزيه
وباقي حياتك تعيش في انعزال
حتقبل ححبك حترفض حلبك
حتطلع حتنزل حجيبلك جمااااال
Bookmarks