السلام عليكم وحمة الله وبركاته
فى البدايه احب ارحب بيكم وبعيدا عن المقدمات البلاغيه احب ادخل فى صلب الموضوع باختصار اولا انا ابتعدت فتره عن الموضوعات المتعلقه بالعقيده واكتفيت انى اتابع موضوعات الموحدين هنا وموضوعات الملحدين هناك دون الانحياز لطرف دون الاخر نادرا لما بكتب مقالات فسامحونى على اللغه الركيكه المستخدمه بس فى حاجات لاحظتها فى صفوف الموحدين هنا بتضعف صفوفهم جدا هما ايه الحاجات دى
1-بتلاقى اى حد دلوقتى ممكن يروح لملحد ويقوله تعالى نعمل مناظره قرا كتابين على مقالتين حس ان هو هيرميهم للملحد الملحد هينبهر وهيعيط وهيقول توبنا ورجعنا الى الله وهو ميعرفش ان الملحد بيكون قارى الكتب دى قبل ماهو يقراهم
2-عناوين الموضوعات بتبقى مستفزه جدا الصراحه ياجماعه على سبيل المثال(هدم الالحاد فى 5 دقائق-مش عارف ايه كده اسئله تحطم الالحاد)وهكذا بتلاقى عناوين تحس انك هتدخل تسمع اللى محدش قاله قبل كده فبتدخل تشوف ياهتلاقيه بيتكلم قضيه فلسفيه معقده جدا زى مثلا ازلية العالم وبيرد عليها بساخافات خياله المريض هيأله ان كده هو بياثر فى الملحد وان الملحد هيشوف كلامه هيتاثر لانه اصلا بيبقى شخص غير مؤهل لا علميا ولادراسيا ولا اى حاجه عشان يناقش موضوعات زى دى فطبيعى ان الملحد ياخد الكلام ده وينشره من تانى على سبيل التهكم السخريه
3-التعليقات نفسها بقى ياجماعه يعنى(س)من الناس عمل مقال محترم هنا فبتلاقى 99% من التعليقات مضمونها (بارك الله فيك) انا مش معترض على التعليق بس انت لازم تعرض وجهة نظرك او حاجه تؤكد راى كاتب المقال يا اما متخليش الشكل العام للمقال عامل زى الزفه واحد بيغنى وناس بتطبل وراه انت كده بتضيع مجهود كاتب المقال انت ممكن تعارضه وتبقى فى صفه او تاكد على صحة وجهة نظره من خلال معارضته هتلاقيه بيرد عليك بمبررات ممكن متكونش واضحه فى المقال يعنى مثال هندسى بسيط الزاويتين المكملتين مجموعهم 180 درجه بيكملوا بعض لكنهم مفصولين عن بعض
4-المقدمات الطويله فى المقالات ياجماعه بصراحه بتصيب القارئ بحاله من الملل وغالبا القارئ معدش بيقراها
5-دايما بتحاولوا تعقدوا الامر على اساس ان اللى يقرا يحس ان الاسلام بيناقش قضايا معقده جدا فى حين ان الملحد بيلعبها صح بيستخدم لغه سلسه بسيطه على اللى بيسمع او على اللى بيقرا فبيقدر انه يزرع شك الى حدا ما اقوى من الايمان اللى ممكن تزرعه قوة بلاغتكم
6-لازم تعرفوا ان جودة البلاغه فى المقال المكتوب وانت بتناقش موضوع علمى ممكن تحسس القارئ انه بيقرا روايه مش بيقرا موضوع له ارتباط بالعقيده او الفلسفه الالهيه فبتضعف جدا من مضمون القضيه المطروحه مش بقولك استخدم اساليب سوقيه لا بس اعرف دايما ان خير الكلام ماقل ودل
وفى امور تانيه كتير مخليانى مستاء من الحال اللى وصلتوا ليه بس للاسف مش هقدر اذكرها فى مقال واحد عشان هى قائمه طويله جدا تحتاج اكتر من قال لى عوده قريبا باذن الله
Bookmarks