-منقووووووووول


في الديناميكا الحرارية Thermodynamics قانون لطيف جداً ، وصارم جداً اسمه "قانون العشوائية" أو "الإنتروبي" Law of" Entropy" .. وهو القانون التاني من قوانين الديناميكا الحرارية .. بيقول ايه؟

القانون بيقول ببساطة إن "أي نظام فيزيائي محكم أو مغلق أو معزول (عن أي مؤثر خارجي) بيميل تلقائياً إلى عدم الاستقرار أو اللانظام أو العشوائية" ..

- القانون ده يُعتبر مسلَّمة من المسلمات الفيزيائية اللي عليها ماشي العلم في كل مجالاته وتخصصاته ، وبناء عليه بتتبني الطرق والمصانع والمفاعلات النووية وبتكتشف الذرات وبتُدرس سلوك الخلايا وسلوك البني آدمين كمان .. لأنه القانون المهيمن فعلا على كل قوانين العلوم ، لدرجة إن أينشتاين نفسه سماه "القانون الأول لكل العلوم The first law of all sciences" ، وقال عليه إنه "أساس قوانين العلوم The premiere law" .. طيب بس يعني إيه؟ وعاوز إيه منه؟

خليك معايا شوية ..

- باستخدام القانون الظريف ده اتعرف في الثيرمودايناميكس نتيجة لذيذة مفادها إن "الاحتمالية الإحصائية لنشوء نظام معين بشكل عشوائي في الطبيعة مرتبطة ارتباط مباشر بدرجة تعقيد النظام ده" .. إزاي؟

لقوا إن كل ما درجة التعقيد (Complexity) في أي نظام فيزيائي تكون أقل ، كل ما كانت درجة احتمالية نشوءه (أو وجوده أو استمراره) - أياً كانت - أعلى .. والعكس صحيح ; كل ما زادت درجة تعقيده كل ما قلت احتمالية نشوءه (أو وجوده أو استمراره بالتعقيد ده) ، لأن رجوعاً للقانون اللي قلناه فوق ، الأنظمة الفيزيائية بتميل تلقائياً لأنها تحقق الـ entropy بتاعها أو درجة العشوائية أو اللاتعقيد ، في اتجاه واحد يستحيل معاه الاتجاه المعاكس بدون بذل جهد أو شغل (مؤثر خارجي) .. يعني إيه بردو؟

- مثال صغير وسطحي جداً:
لو ماشي في الطريق ولقيت كومة طوب أحمر مثلاً على جنب ، أول حاجة هتفكر فيها إنها ممكن تكون وقعت من عربية كانت بتنقل طوب مثلا (تعقيد قليل = احتمالية عالية الحدوث) .. لكن لو لقيت كومة الطوب دي مترتبة ترتيب جميل في شكل بيت أنيق ، فاحتمال ان الطوب ده اترتب بالشكل المعقد ده تلقائياً زي ما اترتب بالشكل العشوائي على الطريق كده تلقائياً هو احتمال قليل (تعقيد أعلى = احتمالية أقل) ..

مثال تاني:
هات طبق صيني من النيش عندك مثلا وارميه على الأرض .. هيحصل إيه؟ هيتكسر كذا حتة .. جميل .. تعال بقى وشيل الحتت المكسورة دي وارميها تاني على الأرض .. هل هتتجمع وترجع طبق تاني سليم؟! لا طبعاً ..

- الطبق السليم في المثال كان هو النظام الفيزيائي المعقد اللي احتمال نشوءه قليل .. الاحتمالية دي قلت لأن فيه طريقة واحدة بس للوصول ليه في الشكل اللي كان عليه ، وانكساره (وصوله للإنتروبي - العشوائية - اللاتعقيد) كان محتمل جداً لأن ببساطة فيه عدد لا نهائي من الطرق اللي ممكن تتحقق بيها .. (قطعتين بس ، واحدة كبيرة وواحدة صغيرة أو اتنين قد بعض .. أو 3 قطع 2 كبار وواحدة صغيرة .. أو عشرة .. أو مية .. أو أو إلخ إلخ) .. واحتمال رجوعه للنظام المعقد اللي كان عليه (لما كان سليم) بدون مؤثر خارجي (إنك انت نفسك تتدخل مثلا وتلزقه تاني) احتمال منعدم ..

طيب بالنسبة للكون؟

- مفيش حد بيماري في تعقيد الكون اللامتناهي وتنسيقه البالغ ، التنسيق والتعقيد اللي محكومين بقوانين ، بتحكمها مجموعة من الثوابت اللي مقدار التغيير في واحد فيها (الثابت الكوني مثلا Cosmological constant) لو بلغ جزء واحد من 10 أُس 120 (1 وقدامه 120 صفر) .. أو لو توزيع الكتلة والطاقة (Mass & Energy distribution) وقت الانفجار الكبير كانت اختلفت دقته بمقدار جزء واحد من 10 أُس 10 أُس 123 (1 وقدامه 1230 صفر) كان الكون ده كله انعدم وجوده أصلاً قبل ما يوجد ، أو لو وُجد فعلا كانت انعدمت أهليّته وقابليّته لنشوء حياة عليه .

نظام بالتعقيد ده كله .. والإحكام ده كله ، احتمال نشوءه على صورته المعقدة دي تلقائياً بدون مؤثر خارجي (إله مدبر حكيم) احتمال منعدم أصلاً حتى في مسلَّمات الفيزيا وقوانين الطبيعة ؛

إلا في عقل صديقي الملحد المسكين ..