المساعد الشخصي الرقمي

مشاهدة النسخة كاملة : خُشّ وعَلِّمْ ع الدكتور...!!!


الفرصة الأخيرة
12-01-2005, 02:08 PM
يوم الخميس..
جاه عتريس..
جمع أنفاره..
بلطجية..
بصمجية..
عصبجية..
حرامية..

مش مهم..

الكل واقف قدام اللجان.
ويا ويلك يا منتخب من الإنس والجان!

الضرب شغال قدامي.
دا نصاب ودا حرامي

مش مهم

المهم منع الناس تقول كلمتها..


حرية؟!
يا حرية؟!

ديمقراطية؟!
يا ديمقراطية؟!

هو دا العرف السائد
صار اللص هو القائد

ودي حكاية بلدي
اللي انضرب فيها ولدي!

والتهمة..
آه يا تهمة!!

كان رايح الانتخابات!
بيقول:
ليه بتلف وليه بتدور.. خُشّ وعَلِّم ع الدكتور!

آه يا ولدي!
هي دي حكاية بلدي!

أما هلال العيد التاني
دا مبسوط مش بيعاني!
سعادة البيه الطيب جاني
بيقول لابني هجيب الجاني

بس غني لسيدنا البيه
وانا هدفعلك يا بني جنيه!

رد الواد الحر وقالها
بلدي دياري مش للبيع

رفع الكلب إيديه من تاني
عاوز يضرب ابني تهامي!

رد الواد الحر وقالها
بلدي دياري مش للبيع

هي دي حكاية بلدي
اللي انضرب فيها ولدي!

بلدي!
آه يا بلدي!

هي الدنيا حصل فيه إيه؟
لما الكلب بيصبح بيه؟

الدكتور تاه في الزحمه!
والبغال ما بتعرف رحمه!

وابني معاه
بيصرخ
بيتألم

وإيه يعني

ما الكل عايش بجراحه
والكل اتقلت أفراحه!

هي دي حكاية بلدي
اللي انضرب فيها ولدي!

بلدي!
آه يا بلدي!
اخت مسلمة
12-02-2005, 05:53 AM
:)): صورة لما يحصل في انتخابتنا (( الديموقراطية ))
ياسلام اصبحنا كما ارادتنا اميركا وماسونية العالم :41:
قتلنا بعض في الانتخابات وكله بينتخب مش عارف مين وقلوبهم شتى
وحالة ليس لها الا الله
ياترى مين الدكتور المقصود ؟؟ :39:
تحياتي لك
الفرصة الأخيرة
12-02-2005, 11:38 AM
بلدي
آه يا بلدي!

خلاص يا ولدي يلا نروح
قنابل غاز شكل يدوخ

قاضي
فاضي
عمال يسأل
فين الناس؟
رد عليه الباشا شويش
اسكت أحسن من التفتيش

رد القاضي الفاضي وقال
دا الحكاية صارت موال

عسكر واقف حول الحي
منعوا الرايح منعو الجي

وبرده هعلِّم ع الدكتور‍‍!!

اقتل
اضرب

برده هعلِّم ع الدكتور!!

زور
حور

برده هعلِّم ع الدكتور!!

عمرو الكَحْكِي
أخد العلقة
وفي لحظة لقيته
نايم تحتي

إنت منين يا خويه يا عمرو؟
وإيه اللي جابك وسط الجمر؟

رد علي بكلمة ونص
اسكت
سيبني في حالي وبُص

صحفي جزيرة جاي أصور
بس الظاهر عاوز اتصور

هو الحمل فوقي تقيل
واللا نايم تحت الفيل؟

وبرده هعلِّم ع الدكتور!!

43 ألف
كله واقف
عاوز يعلم ع الدكتور!!

لكن الباشا
آه يا باشا!

وبرده هعلِّم ع الدكتور!!

يا قضاه يا قضاه
لا تخافوا إلا الله

الله!!

وبرده هعلِّم ع الدكتور!!
الفرصة الأخيرة
12-02-2005, 06:54 PM
تابع هنا:
http://70.84.212.52/vb/showthread.php?t=3582
سيف الكلمة
12-04-2005, 09:38 PM
الكذبة أكبر من 100 دكتور
قال لى مرة من فترة طويلة دكتور فى علم الإجتماع السياسى عبارة ظلت عالقة برأسى وهى :
(الرافد العسكرى إذا امتدت يده إلى الحكم لا تتركه إلا لرافد عسكرى آخر أشد قوة ولا يعود الحكم للمدنيين )
وأقول أن الديموقراطية كانت دائما رداءا لكل أنظمة الحكم فى كل المجتمعات
ولا يوجد فى واقع الأمر مجتمع ديموقراطى واحد بمفهوم الديموقراطية وهو حكم الشعب
كان الإسلام صادقا فالشورى لأهل العلم والحاكم من أهل الإيمان والعلم
وكان مدعى الديموقراطية دائما كاذبون فلم يحكم شعب قط
وإنما هو حكم من يسمونهم الصفوة أو يسمونهم الحرس القديم ولا دخل للشعب فى الحكم الحقيقى مهما كثر ترديد الشعار الكاذب حكم الشعب بالشعب أو الديموقراطية
الفرصة الأخيرة
12-08-2005, 03:44 PM
ما خلاص تاه الدكتور في الزحمة
والكلاب ما بتعرف رحمة


انظر هنا:
http://70.84.212.52/vb/showthread.php?p=28828#post28828