مشاهدة تغذيات RSS

Maro

الأسياد

التقييم: الأصوات 2, بمعدل 4.50.
(المشهد: "الغلبان" يجلس فى أمان الله داخل بيته، ويفاجأ بمن يطرق بابه بقوة)

الأسياد: طاخ طاخ طاخ
الغلبان: اللهم اجعله خير... مين بيخبط ؟
الأسياد: احنا أسيادك يا ولد، افتح الباب بسرعة !
الغلبان: خير يا اسيادنا؟ إيه اللى حصل؟
الأسياد: جايين ننتقم منكم يا إرهابيين يا ولاد الـ...........
الغلبان: ليه بس؟
الأسياد: عندنا برجين وقعوا و 3 آلاف قتيل، والريّس بيقول ان عمك هو اللى عمل كده
الغلبان: عمى؟ هو اللى عمل كده؟ طب واحنا مالنا يا اسيادنا؟ روحوا لعمى... انشالله تضربوه بالجزمة، احنا مالناش دعوة !
الأسياد: مالكوش دعوة ازاى؟ احنا لازم نفتش بيتكم طوبة طوبة لغاية ما نعثر عليه
الغلبان: بس يا اسيادنا أقول إيه أدام الناس؟ شكلى هايكون وحش أدامهم لما أسيبكو تدخلوا البيت وتبرطعوا فيه بدون سبب !
الأسياد: خد الفيديو ده ذيعه على الناس، صورنا فيه عمك وهو بيعترف بلسانه.
الغلبان: طيب خلاص اتفضلوا، بصراحة ماقدرش أقول لكم حاجة بعد الفيديو ده !

(واحد من الأسياد دخل المطبخ وسرق كل ما به من طعام، وآخر دخل غرفة النوم وأغلق الباب عليه مع سماع صرخات بالداخل، وآخر حطم الخزينة وأخذ كل ما بها من أموال)
الغلبان: يا جماعة مايصحش كده، انتو جايين تبحثوا عن عمى وتضربوه بالجزم، إيه علاقة ده بالأكل والمال واخواتى البنات؟
الأسياد: انت بتصدق ولا إيه؟ انت بتجيلك تهيوءات يا "غلبان"... ماحدش فينا لمس طعامك ولا حريمك !
الغلبان: يا جدعان عيب... دانا شايفكم بعينيا أهو !
الأسياد: انت بس ركز فى الفيديو اللى معاك، وسيبنا نشوف شغلنا.
الغلبان: حاضر ياسيادنا، هاركز فى الفيديو وبس... بصراحة ماقدرش أقول لكم حاجة بعد الفيديو ده !

(بعد فترة طويلة)
الغلبان: إيه ياسيادنا؟ انتو ماوراكوش غيرنا ولا إيه؟ مش خلاص بحثتو عن عمى وطلع مش موجود عندنا؟
الأسياد: اخرس يا ولد... احنا عارفين مصلحتك أكتر منك... احنا هانشرفك بالإقامة معك هنا فى بيتك لغاية ما يظهر لعمك الشرير أثر !
الغلبان: يا مصيبتى... انتو عملتوا إيه؟ قتلتوا ابنى الصغير؟ حرام عليكو يا ناس ! ده طفل رضيع؟ ماله ده ومال عمى الشرير؟
الأسياد: يوووووه... التهيوءات رجعت لك تانى يا "غلبان"... قلنا لك تركز فى الفيديو وبس، احنا صارفين عليه كتير الفيديو ده...!
الغلبان: حاضر... أنا آسف ياسيادنا، بصراحة ماقدرش أقول لكم حاجة بعد الفيديو ده !

(بعد 10 سنين)
الأسياد: ألف مبروك يا "غلبان"... ضربنا عمك بالجزم لغاية ما قتلناه
الغلبان: ماتقولوش عليه عمى يا سيادنا ! أنا متبرىء منه ! ده رجل شرير... هو السبب فى كل المشاكل دى !
الأسياد: برافو عليك يا "غلبان"... شفت لما سمعت كلامنا وركزت كويس فى الفيديو التهيوءات بتاعتك انتهت ازاى؟
الغلبان: معاكو حق ياسيادنا... بصراحة ماقدرش أقول لكم حاجة بعد الفيديو ده !
الأسياد: .................
الغلبان: طب إيه؟
الأسياد: .................
الغلبان: إيه يا جماعة... مش خلاص؟ عملتو اللى عايزينه؟
الأسياد: انت زهقت مننا ولا إيه يا "غلبان"؟ يعنى أسيادك ييجوا يخلصوك من الشر والإرهاب ويروحوا كده على طول من غير ما تضايفهم عندك قرنين تلاتة؟
الغلبان: صح، معاكو حق ياسيادنا... طب هى فين جثة عمى الإرهابى الشرير ؟
الأسياد: رميناها فى البحر !
الغلبان: ليه كده؟
الأسياد: أول سبب... عشان نغذى السمك
الغلبان: وتانى سبب؟
الأسياد: عشان ماحدش يعرف يوصل للجثة بعد كده ويعرف احنا قتلنا مين فى الحقيقة
الغلبان: طب أنا عايز أطمن انه مات بجد !
الأسياد: خد الصورة دى... بعد ما قتلناه، وعندك الفيديو ده كمان واحنا بنرميه فى عرض البحر
الغلبان: يا جماعة مايصحش... انتو كل حاجة عندكو صورة وفيديو؟ أنا عايز أشوف جثة عمى !
الأسياد: انت مش مصدق أسيادك ولا إيه يا "غلبان"؟ يعنى احنا هانضحك عليك؟ ركز كويس فى الصورة اللى معاك... احنا صرفنا كتير عشان نعمل الصورة دى لعمك وهو مقتول !
الغلبان: أيوه صحيح... معاكو حق يا أسيادنا... بصراحة ماقدرش أقول لكم حاجة بعد الصورة دى !

أرسل "الأسياد" إلى Google أرسل "الأسياد" إلى Digg أرسل "الأسياد" إلى del.icio.us أرسل "الأسياد" إلى StumbleUpon

التصانيف
غير مصنف

التعليقات

  1. الصورة الرمزية ندى الحياة
    ما شاء الله إبداع
  2. الصورة الرمزية أبو مصعب المغربي
    صراحة هذا واقع ليس بخيال
    هذا واقع الدول الإسلامية الضعيفة مع الدول الغربية تحت ضل كذبة الإرهاب

    عمل رائع أخي مارو وفقك الله
    تم تحديثها 07-03-2016 في 01:34 AM بواسطة [ARG:5 UNDEFINED]
  3. الصورة الرمزية مسلم أسود
    مبكية قبل أن تكون مضحكة للأسف .
شبكة اصداء