مدرسة الشياطين ..!

1... فصل الإخفاقات !!..

># هاسيبك بقى دلوقتي يا فاركشميش عشان تلحق أول فصل في الدراسة .. وما تنساش .. حط قدامك دايما أنا عملت بلاوي ومصايب أد إيه عشان أعرف أدخلك المدرسة دي .. يعني لولايا كنت تلاقيك دلوقتي قرين واحد من البني آدمين .. أتمنى إنك ما تنساش الجميل ده .. وتركز في دراستك هنا لحد ما تتخرج شيطان كبير مالي مركزه .. عايزك كده زي جدك سبعلتاش .. والحاجه اللي ما عملتهاش أنا : تقدر تعملها إنت .. عايز أفتخر بيك شيطان مشيطن كل الناس بتلعنه ..

## ما تخافش يابا .. كل مجهود وبلوة إنت عملتها عشان تقدم لي في المدرسة دي : هاردهولك على ديل الجزمة .. ولا تخاف .. وما تنساش إن الشر بيجري جوايا زي بقيت عيليتنا بالظبط .. إنت نسيت اللي كنا بنعمله أنا وإنت في الجن المسلمين وأنا صغير واللا إيه ؟..

># ما هو ده اللي أنا عايزك تاخد بالك منه .. إنسا بقه موضوع الجن المسلمين ده خالص .. إنت من اليوم هاتتعامل مع البشر .. طبعا ًسيبك من اللعب اللي كنا بنلعبه بيهم عشان نضحك ونفرفش ده .. لا .. إنت دلوقتي لو اتخرجت من المدرسه دي : هاتبقى شيطان مشرف على 1000 قرين ولا يمكن أكتر !!!.. عارف يعني إيه ده ؟!!.. يعني إنت اللي هاتوجه القرين نفسه اللي بيوسوس ليهم !!!.. يعني لازم تكون وصلت لدرجة عاليه جدا من فهم البشر ونفسياتهم وأخلاقهم وصفاتهم : بل : وتفهم نقاط ضعف القرين ونقاط قوته : لأن انت اللي هاتشرف عليهم وهاتبقى المرجع بتاعهم !!!.. ومين عالم .. يمكن تترقى في المدرسة : وبعدين ممكن تقابل إبليس نفسه !

## يا ريت يا والدي يا ريت .. أنا أسمع إن البصه الواحده لوشه العِكر : ممكن تنيم الواحد فينا شهر قرفان !!.. يا سلام على القوة يا سلام !!!..

تررررررررررررررن .. ترررررررررررررررن .. تررررررررررررررررررررن

># ياللا بسرعة يا فاركشميش .. الجرس دق .. هاجيلك الأسبوع الجاي .. مش عايزك تكسيفني قصاد الأساتذة اللي يعرفوني هنا ..
----------

وفي فصل الإخفاقات ...

--------------

^^ أهلا بيكو يا شياطين الغد وأمل المستقبل ...!
طبعا بعد ما اتعرفنا على أسامي بعضنا .. أنا عارف إن كل واحد فيكو دلوقتي يمكن بيسأل نفسه من جوه : إيه الحكمة إن يكون أول فصل في دراستكم هنا في المدرسة : هو فصل الإخفاقات !!!.. ويمكن كان كل واحد فيكو يتمنى مثلا ًأن يكون أول فصل هو فصل الإنجازات !!!..
ويسعدني إني أقولكوا : تساؤلكم في محله ......
لكن الحكمة من إنكم تشوفوا نماذج من الإخفاقات الأول : هي إن الإخفاقات عندنا : يا إما بيكون معاها حرق الملايكة لشيطان !!.. أو بيكون معاها عقاب إبليس لشيطان !!!.. - وطبعا ًالنتيجتين أسوأ من بعض - ..! يا إما أخيرا ً- وده أخف ضرر يقع عليكم - : هو طرد الشيطان من منصبه ..! يعني ضياع كل المزايا الإبليسية اللي أخدها لحد ما يوصل للمكانة بتاعتو كمشرف أو ريس على القرين !!!!..
مش هاطول عليكو ...
لأنكم هاتقابلوني وهاتجولي هنا كتير ...
فمع كل درجة هاتعلوا فيها لفوق .. لازم تجولي هنا عشان تتعرفوا على أمثلة ونماذج من إخفاقات الدرجة دي !!!..
ودلوقتي ...
استعدوا معايا لعرض أول 3 نماذج من الإخفاقات اللي اخترتها ليكم دلوقتي ..
عايزكوا تنتبهوا معايا جدا ...
وتكتشفوا معايا نقاط الضعف اللي أخفق فيها القرين ومشرفه ...
عايزين نتعرف على كل الجوانب المفيده عشان تتعرفوا أكثر على نفسيات البشر .. وخصوصا المسلمين .. عدونا اللدود ...
-----------

النموذج الأول ...

--------------

^^ والنموذج ده ...
كان لشاب مسلم متدين جدا ...
القرين بتاعه كان تعبان منه لدرجه لا تتخيلوها ...
أما الشياطين المشرفين عليه : فياما اتحرق منهم ومات : بسبب قربهم منه بس !!!!...
وعلى مدى يمكن 3 سنين ...
ما عرفوش يطلعوا منه بذنب عليه القيمة !!!..
وفي ليلة : وبعد ما اتحرق آخر مشرف كان على القرين بتاعه .. جالو مشرف اسمه : أبو زعالين الزعين ..
المشرف ده كان متخرج برضه من هنا زيكوا .. طبعا الكلام ده من سنين طويلة قوي ...
المهم ...
أبو زعالين الزعين ده : قدر يأثر أخيرا ًعلى الشاب المسلم المتدين ده .. وخصوصا وإنه كان في فترة الجامعة .. وما أدراكم ما الجامعة في بلد زي مصر !!.. سوق كبير لشياطين الإنس تحت إيدينا .. مخدرات على زنا على كدب على ظلم .. حاجات كتير قوي هاتعرفوها بعدين ...
المهم ...
بدأ أبو زعالين الزعين يغوي الشاب ده بالبنات .. لبس إيه !!!.. ولحم عريان إيه !!!..
لحد ما في يوم : زق عليه واحد من شياطين الإنس بتوعنا في الجامعة بشريط فيديو من إياهم .. قال إيه هايسيبه عنده لبكره .. وإن فيلم مفيد !!!.. وفعلا ً.. قدر أبو زعالين الزعين بالفكره دي وفي ليله واحده : يخليه يسيب قيام الليل ...! واستخدم مع قرينه سلاح الفضول والشهوة : لحد ما سهر للفجر مع الفيلم ده !!!!..
نيااااههها نياااااااااهاه هاه هههاه !!!..
شوفتوا بقى نصر أكتر من كده ؟!!!..

## حقيقي ؟!!.. طب فين الإخفاق اللي هنا بقى ؟!!!.. ده نصر منصر أهوه !!.. إحنا كنا فين وبقينا فين ؟!!.. إيه اللي حصل يا أستاذ شفلور أرجوك ؟!!.. قول لنا ؟!!!..

^^ حاضر يا سيدي ...
الشاب ده كان كل صحابه ومعارفه وزمايله في الجامعه : عارفين عنه الصلاح ...
وفي صباح اليوم التاني بعد الليلة اللي سهر فيها دي ...
واحد من زمايله شاف عينه غامقه كده شويه : فقاله : إنت سهرت إمبارح ولا إيه ؟!!!..
وهنا الشاب المتدين ده ارتبك !!.. وما عرفش يقول إيه !!!..
لو قال لا : يبقى كدب .. ولو قال آه : هايفتكروا إنه كان بيقوم الليل !!!.. فسكت وبص في الأرض !
وهنا ... كل زمايلوا قعدوا يشكروا فيه ويقولوا إنه أكيد كان سهران بيصلي ويعبد ربنا !!!.. لحد ما خلوا الشاب ده بكا .. وطلع يجري من قدامهم !!!..
ومن بعدها :
والشاب ده - ولحد دلوقتي - ما عرفناش ناخد منه لا حق ولا باطل !!!..
نازل حرق في شياطين أبونا اللي جابونا !!!..
وعلى إيده اتهدى مئات الشباب والضايعين والتايهين !!!..
وصار يوم الفرح لقرينه : بل يوم العيد : لو وقع منه بس ذنب صغير من الذنوب بتاعت الصالحين اللي هانقولكوا عليها بعدين ..
ويا ريت دا حتى بيدوم !!!.. إلا أما في ثواني تبص تلاقي تاب !!!.. والملايكه عماله تكتب ...

-- طب وأبو زعالين الزعين حصلوا إيه يا أستاذ ؟!!!..

^^ ده أول شيطان بهيم إتحرق بالشاب ده بعد توبته !!!.. يستاهل على غباوته ...
بس سيبكوا من ده دلوقتي ... وجاوبوا على سؤالي :
حد فيكو يقدر يقولي دلوقتي : إيه اللي ممكن نستفيده من النموذج ده ؟!!!!..

-- ممكن نقول يا أستاذ إن بعض المتدينين بيكون بعد التوبة : أقوى بكتير من نفسه قبل التوبة والمعصية .؟

^^ شاطر .. فعلا .. دي حقيقه .. ولكن .. هل معنى كده إن إحنا ما نخليهوش يعصي مثلا ًولا إيه ؟!!!..

-- أنا شايف يا أستاذ إن بعض المتدينين نسيبه في حاله أحسن ؟!!!..

^^ لا يا أبو قرون طويله !!!.. إنت اتهبلت !!.. نسيبه في حاله يعني إيه ؟!!!..
المؤمن في حد ذاته طول ما هو ملتزم حتى ولو كان إنسان بسيط : هو في نفسه مصيبة لينا !!!.. إنت ما تعرفش البشر بيعدوا بعضهم في الحاجات دي إزاي !!.. كتير هايشوفوه وهايفكروا يبقوا زيه أو يعملوا زيه !!!.. دول أذى على كل شياطين الأرض !!.. ولا الدعا بتاعه !!!.. نار نار يا إخواننا .. احفظوا الحاجات ديه عشان ما فيش حد يغلط ويقول الكلام ده قدام شيطان كبير فيضحك عليه ...

## طب أنا عندي نقطه مستفاده يا أستاذ شفلور ..
أنا شايف النوع ده من الناس المتدينه : ما ينفعش نوقعهم في معصية كبيرة زي دي فجأه !!!.. لأن فيهم ناس بتبقى قويه وعزيزه عليها دينها .. فبترجع أقوى مما كانت .. إنما الصح : إننا نتدرج معاهم : حتى ولو أخد ده وقت طويل : وما نستعجلش .. المهم إننا نخليهم ياخدوا على المعاصي واحده واحده .. وبكده لما يقعوا في المعصيه الكبيره في الآخر : يكونوا اتجهزوا نفسيا : وما يبقاش فيه نفس النفور بتاعهم أول مره !!.. إيه رأيك يا أستاذ ؟؟..

^^ عفاهم عليك يا ....

## فاركشميش يا أستاذ ...

^^ عفاهم عليك يا فاركشميش .. عفاهم عليك .. أهو إنت كده شيطان ابن شيطان حقيقي ..!
لازم الشيطان يحط هدفه قدامه .. وما يستعجلش .. المهم إنه ينول هدفه : حتى ولو بعد سنين !!!.. حتى ولو عشرات السنين !.. أيوه يمكن تستغربوا .. لكن صدقوني .. فيه هنا عندنا خطط لكل أصناف البشر : صالحين وطالحين .. شيوخ وعوام .. نصارى وقساوسه .. حكام دول ورؤساء .. وفي منها بيتحقق بعد 40 سنه !!.. وفيه بعد 50 سنه !!..
وفيه في آخر العمر قبل ما يموت الواحد منهم !!!.. وكل ده هاتعرفوه في فصول المدرسه بعدين ...
المهم دلوقتي :
لازم يكون للشيطان منكوا نظرة خبرة في الإنسان اللي بيتعامل قرينه معاه ...
البشر كلهم مش زي بعضهم ...
لازم تعرف البني آدم اللي قصادك ده نوعه إيه ؟؟!!.. ضعيف ولا قوي ؟!!!.. بيحب الانتقام من الشيطان ولا لأ !!.. بيعز عليه الذنب الصغير ولا الكبير ولا لأ ؟!!!.. التزامه ده هش وخفيف وبتاع مظاهر وبس : ولا مالي قلبه فعلا من جواه ؟!!!..
كل الحاجات دي هاتفرق كتير قوي معاكوا في حياتكو مع البشر دول ...
ومعلهش لأني طولت معاكو في النموذج ده رغم بساطته .. لكني عملت كده لأنه أول نموذج إخفاق تتعرضوا لدراسته هنا .. فكان لازم أشرح كتير حوليه ...
وأما النموذج التاني ...
فهو نموذج مشهور .. يمكن حتى تكونوا سمعتوا عنه بره المدرسه .. نموذج الشابين السعوديين ؟!!..
عارفينه ؟؟...

-- !!!

-- لا ..

^^ طب كويس .. هاحكيلكوا عليه ونشوف المصيبه دي كمان كان سببها إيه ...

يُـتبع بإذن الله ...

---------

النموذج التاني ....

--------------

^^ والنموذج ده بقى ... عكس النموذج الأول !!!..
دول شابين سعوديين : كانوا قمة في الصياعه والضياع .. الفلوس بتجيلهم من غير تعب من ناحيه : واحنا بنتفنن معاهم في عمل المعاصي من الناحيه التانيه !!..
والغريبه إنهم في صغرهم كانوا طفلين عاديين .. بل : وحافظين أجزاء من القرآن كمان ...!
لكن الفضل يرجع للتليفزيون والدش والنت .. أكبر منح أخدناها عن البشر والبني آدمين ..!
أكبر وصلة عزف جماعي بين شياطين الإنس والجن في العصر الحديث ...!
وطبعا ده من أكبر الفصول الدراسية اللي هاتقعدوا فيها كتير هنا .. أقصد الفصل الإعلامي ..
وخصوصا ًمع بلد زي السعودية .. فن فن ..! احتراف إنك إزاي تقدر تأثر في بلد زي دي بالتدريج ...!
أيوه في تعاون بين أكتر من جهه مع الإعلام .. زي حبايبنا بتوع حقوق الإنسان والمرأة وجريدة الوطن وعكاظ ..
بس بيفضل دايما ًللإعلام الأيد الأطول في التأثير اللي إحنا عايزينه بالظبط ..
هانصحكوا تتابعوا مدرس في الفصل الإعلامي اسمه : مازياتاكش .. روحولوا واتعلموا منه ...
ده مربي على إيده أجيال في الفساد الإعلامي في مصر وتونس والجزائر والمغرب : وكمان دول إسلامية من شرق أسيا !!..
مع العلم :
إن اللي هايتخرج فيكوا متخصص في الإعلام : بيبقى ليه مرتبه تانيه خالص غير باقي المشرفين في أي تخصص تاني ..
ده بيبقى أغلى عندنا من الدهب ..!
وده لأنه بيقدر يعمل في ساعات : اللي بيعمله الشياطين غيره في سنين !!..
المهم ...
الشابين دول كانوا اصحاب وساكنين في فيلتين جنب بعض ..
وكل أسره فيهم كانت سر نجاحنا مع ابنها ..!
الأب عمال يحول فلوس وخلاص : ويمكن ما بيشوفش ولاده إلا في الأسبوع أو الشهر مره ..! هو فاكر طبعا إنه كده يبقى قايم بدوره معاهم تمام !!!..
وأما الأم .. فمشغوله علطول بالعزومات اللي فيها بتلبس الموضات على كل شكل ولون .. ومشغولة بالسفر يمين وشمال .. وشوية بورصة .. على شوية شغل نسوي وتجاري على ما قسم كمان !!!..
المهم ...
إنها عمرها ما سألت ابنها انت فين : ولا حتى رايح فين ! ولا حتى بتصرف فلوسك في إيه !
طبعا ًده مثال الأسرة السعودية المثالية اللي بنحلم إننا نعممه في السعودية زي الكتير من البلاد التانيه .. وده اللي بنحاول ننشره في الإعلام دلوقتي فيها لكن بطريقه غير مباشره ..
وبرضه لسه الطريق طويل ...
فالسعوديين لسه معظمهم عايش ع الدين والإلتزام ...
وقصاد كل عشرة شباب ضايع : فيه شباب كتير لسه صالحين ...
ولسه تحفيظ القرآن هناك بيتم بشكل رسمي وبتشجيع ساعات : رغم كل اللي بنحاول نعمله فيه من وقت للتاني ..
لكن قاعدتنا الذهبية بتقول :
<<< لا يأس مع الوقت >>> ...!
والتحول اللي حصل في مصر على مدار قرن واحد بس : بنتمنى يحصل زيه في السعودية برضه : وبمساعدة الإعلام وإخواننا شياطين الإنس هناك : أحبابنا الليبراليين والعلمانيين ..
وادينا بنشتغل على قدم وساق زي ما بيقولوا ...
نرجع للشابين دول ...
كان ليهم عادة كل فترة : سفره لتركيا أو بلد أوروبي .. يبوظوا حالهم هناك شويه : ويفرتكولهم كام عشرتلاف ريال : ويرجعوا يشحنوا تاني ..!
وطبعا ًتركيا على قد ما فيها أعداء لينا مسلمين وصاحيين .. على قد ما فيها إخواننا شياطين الإنس من العلمانيين اللي قايمين بدورهم هناك على قد ما يقدروا ..
ويمكن تكونوا سمعتوا عن الأماكن هناك اللي فيها بوظان زيها زي أوروبا وأمريكا بالظبط .. ده غير الإعلام البايظ برضه ..
المهم ...
في السفره دي للشابين دول :
حصل مشكلة في حجز الفندق الرئيسي اللي كانوا هاينزلوا فيه ...
فاضطروا يحجزوا في أي فندق رخيص يباتوا فيه لحد الصبح : وبعدين يسافروا للمكان اللي كانوا رايحينوه ..
وبالفعل : حجزوا في فندق صغير ورخيص في حي بسيط بعيد عن نص البلد ...
وناموا من التعب ...
وهنا كانت المفاجأة !!!..
قبل أذان الفجر بنص ساعه : دق الباب والجرس عليهم !!!..
بصعوبه جدا صحيوا على الصوت ... وطبعا افتكروا فيه حاجه مهمه بره .. فلما فتحوا الباب وكلموا رجل الاستقبال :
لاقوه بيقولهم إنهم يعملوا حسابهم إنهم هايصلوا الفجر في مسجد جنب الفندق !!!!..
وإنهم يختاروا واحد فيهم إمام !!!..
ودي المصيبة اللي ما كانتش على بال القرين ولا حتى الشيطان بتاعه !!.. وبعد أما افتكروا إن كل حاجه تحت إيديهم وكل حاجه تمام !
أتاري أصحاب الفندق هم مسلمين على الفطره .. بيحبوا الدين على قلة علمهم وتعليمهم : وقلوبهم متعلقة وبتعشق أي حاجه من ريحة مكة والمدينة بل : والسعودية عموما ً!!!...
هيا في نظرهم رمز الدين وعَلمه المرفوع !!!.. وهيا في نظرهم بلد التدين والقدوة والمتدينين الصح !!.. بلد أهل السنة والجماعه !!.. بلد السديس والشريم والحذيفي والعجمي والمعيقلي !!.. البلد الوحيد اللي لسه بيحارب البدع والصوفية والخرافات !!..
وما كانوش مصدقين نفسهم لما نزل عندهم شابين من السعودية !!!..
وكأن السعودية عندهم الطويلة العريضة دي : هي مكة والمدينة بس !!!..
ساعتها ...
عرف الشابين سر الترحيب والحفاوة والبشاشة والكرم الزائد اللي اتعاملوا بيه من ساعت ما نزلوا الفندق !!!..
طب والعمل إيه ؟!!!..
سأل الشابين نفسهم ؟!!.. هل ننام ونطنش ؟!!.. لا .. لأن الراجل شافنا وكلمنا وعرف إننا صحينا !!!..
هل نعتذر بالتعب ؟!!!.. لا .. مش عذر ده عشان نسيب الصلاة : واحنا كل واحد فينا طوله متر و 80 سنتي أهوه !!!..
هل ناخد الشنط ونمشي قبل معاد الصلاة ؟!!..
آها .. أهي دي فكره كويسه ....
وفعلا ً: بدأوا يلموا حاجتهم البسيطه وشنطهم اللي ما تفتحتش أصلا ً: واستعدوا للهرب بسرعه ..
لكن لما نزلوا تحت :
لقوا أكتر من عشرين واحد مستنينهم عشان يمشوا معاهم للمسجد !!!!.. وقعدوا يسلموا عليهم ! ويسألوهم عن مكة والحرم والمدينة !!!..
طبعا الشابين استحيوا يقولولهم إنهم كانوا ماشيين !!!..
فسابوا الشنط عند الاستقبال : على إنهم هايمشوا بعد الصلاة علطول عشان مستعجلين !!!..
وفعلا دخلوا المسجد عشان يصلوا ...!
واتوضوا ..
واختاروا واحد منهم ...
ولو ما كانش الجن بيتحرق بالنار : كان القرين بتاعوا اتحرق اللحظة دي من المنظر بس !
تخيل بعد كل سنين البوظان دي وكل المجهود اللي عمله معاه : لاقاه واقف بيصلي إمام بالناس في تركيا !
في الأول حاول يشغله وينسيه القرآن اللي هو ناسيه أصلا !!!..
وكان هاينجح .. لولا إن الشاب ده كان فيه سورة من القرآن بيحبها من صغره جدا وحافظها صم .. سورة الفجر !
الغريبة إنه في الأول قعد يقطع في السورة برضه من رهبة الموقف .. لكن المصيبه إنه مع كل وقفه كان بيقفها :
كان الناس من وراها تبكي !!!.. كانوا فاكرينه بيقف عشان بيقرا القرآن وهو متأثر وبيبكي !!!.. فيبكوا !!!..
وفعلا كمل الشاب السورة على الركعتين .. وبكى وتاب !!!..

-- وإيه اللي حصل بعدها ؟!!!..

^^ زي القصه اللي فاتت !!!..
الشيطان اللي معاهم ما قعدش كتير إلا واتحرق طبعا من الملايكة اللي بقت مع الشابين دول علطول بتحميهم !!!..
والقرين بتاع الشاب اللي صلى إمام ده : جالوا صرع !!!.. واستبدلناه بواحد تاني هو اللي معاه لحد دلوقتي ..
نهاية مأساوية !!!.. صح ؟؟

-- بالنسبة لينا فعلا : صح !!!.. أكيد ده شعور رهيب لما تلاقي اللي بنيته في سنين وبكل إنجازاته : بينهار قدامك في لحظات !!!.. في موقف واحد !!.. شيء صعب جدا ًالصراحة !!!..

^^ طب مين يقدر يقولي الدروس المستفادة ؟؟؟..

-- ممممم .. أنا شايف إن جزء كبير من الإخفاق اللي حصل : كان مصدره خارجي !!.. ممكن نسميه القدر !!.. لأنه لولا تغيير حجز الفندق الأولاني ده : ما كانش حصل اللي حصل !!..

^^ متخلف !!!.. إنت شيطان متخلف !!!.. ما فيش شيء اسمه قدر !!!.. إنت لم تقول قدر : يعني كأنك بتعترف بالله بتاعهم وإنه فعلا هو اللي بيتصرف في الكون !.. إياك أسمع الكلمه دي من حد فيكم تاني .. هاحرقه !!!..

-- هدي نفسك بس يا أستاذ شفلور .. هدي نفسك .. زعبلوش ده ما يقصدش حاجه .. هو بس ما بيعرفش يعبر كويس .. أنا ممكن أقولك على حاجه مستفاده كويسه ..
أنا شايف إنه كان ممكن الشيطان يخلي القرين بتاع الشابين دول : يخليهم يرفضوا من الأول قصاد الراجل بتاع الفندق إنهم يصلوا !!!.. يعني إيه المانع إنه كان يوسوس له إنه يرفض بصراحه ويقولوا مثلا إن إحنا مش بنصلي ؟!!..

^^ دانتا أغبى من صاحبك !!!.. مش بقولكوا إنتوا لسه قدامكوا حاجات كتير هاتتعلموها عن البشر ؟!!!.. فيه حاجه اسمها الضمير !!.. فيه حاجه اسمها الحياء !!.. أيوه إحنا ممكن نخلي واحد مؤمن أو حتى غير مؤمن : يقع في الكتير من الذنوب والمعاصي بتاعتهم .. لكن مش كل البشر بيكون ضميرهم أو حياؤهم اتأثر لسه بكل البوظان ده !!!.. والضمير والحياء دول : وطول ما هم لسه موجودين : اعرفوا إنكوا معرضين في أي لحظة للفشل !!!..
أيوه إحنا ممكن نوسوس ليهم بالأفكار اللي إحنا عايزينها .. لكننا ما بنعرفش ولا نسمعش هما بيفكروا في إيه جوه عقولهم : إلا اللي بيظهر منهم في أفعالهم وكلامهم ..
انتو ما سمعتوش الحديث بتاع النبي بتاعهم في الاسلام اللي بيقول : إن لم تستح : فاصنع ما شئت !!!..
الضمير .. والحياء ...
خليكوا فاكرين الاتنين دول دايما ويبقوا في أولويات اعمالكوا مع البشر ...
لو قدرتوا تقضوا عليهم أول بأول ومن بدري : هاترتاحوا كتير جدا بعد كده في باقي حياة أي إنسان !!!..

## كلام جميل يا أستاذ شفلور .. بس أنا شايف فيه حاجه كمان ممكن نستفيدها من هنا .. وهي مش بعيد قوي عن كلامك الأخير اللي قولته ده ..

^^ جميل ... قول يا ........ يا .... فاركشمـــ .. فاركشميش ؟..

## أيوه يا أستاذ .. فاركشميش .. احفظني بقه ..

^^ معلش يا ابني .. انتو اللي اسماؤكوا في الجيل ده اللي بقت غريبة شويه وصعبه تتحفظ !!.. فين أيام الأسماء اللي كلها بتنتهي بـ كوش ؟!!.. عفركوش .. عفرتكوش .. بهلتكوش .. وفين الأسماء زي زعيبل ؟.. مطيمع ؟.. قلت كتير .. ع العموم .. إنت شاكلك كده هاتبقى شيطان نابغه .. يعني لو قلت حاجه عليها القيمة في النموذج ده كمان : يبقى حُكمي عليك ونظرتي فيك دي صح ..

## أنا شايف يا أستاذ إن النموذج ده بيدينا إنذار إننا نخلي بالنا من الناس اللي كانت في حياتهم بداية من صغرهم كويسه مع الدين .. زي حفظ القرآن في الحضانه والمدرسه وحضور دروس في المسجد ومناهج دين مفيده والحاجات دي ..
لأن زي ما والدي حكالي : إن الناس دول من أصعب حالات البشر .. لأن معظمهم ومهما يبوظ ويبعد في حياته : لسه في جواه جزء قادر يرجعه تاني للدين والتوبة !!.. صح ؟

^^ عفاهم عليك يا فاركشميش ؟؟ آه .. فاركشميش .. عفاهم عليك .. فعلا ملحوظة في محلها ..
وعشان كده : لازم تعرفوا فايدة فصول قسم الطفولة هنا في المدرسه .. إحنا هنا مش بنلعب .. كل مرحله عمريه هنا ليها فصولها المتخصصه .. طفل - مراهق - شاب - رجل - شيخ - كهل - متزوج وغير متزوج : ومن الجنسين !!!..
وأما قسم الطفولة :
ففعلا وبناء على تعليمات أبونا إبليس : بدأنا ندخل في الوسائل الإفسادية فيه : كل التقنيات الحديثة بقالنا أكتر من 50 سنه ... أغاني وموسيقى بدل القرآن ووعظ الأناجيل وحفظ المتون المفيدة ..! لعب أتاري وكمبيوتر وبلاي استيشن والنت بالساعات .. حاجات كتير هاتتعلموها في فصول قسم الطفولة لما توصلوله ..
والمهم ...
تحطوا دايما ًنماذج الإخفاقات دي قدامكوا ما تنسوهاش ..
أديكوا شوفتوا عملي إزاي اتقلب في ساعات شابين من أقصى الشمال : لأقصى اليمين !!!..
وغزاي حنوا لحياة الإيمان في لحظات : وتابوا وسابوا كل اللي وقعناهم فيه لسنين !!..
ويا ريت المصيبه وقفت عليهم وبس ..
ده كل واحد فيهم غير أبوه وأمه وإخواه كمان !!!..
يعني كانت مصيبة وفضيحة بجلالجل للشيطان ولكل قرين منهم !!!.. وله حق القرين اللي اتصرع ده !

-- نماذج مفيدة فعلا ًيا أستاذ ...
شوقتنا للنموذج التالت بقه .. هو إيه يا ترى ؟؟؟..

يُـتبع بإذن الله ...

---------

النموذج التالت ....

--------------

^^ والنموذج ده بقه : كانت حسرة شيطانه وقرينه بيه أكبر حسرة !!!...
كانوا خلاص هايصولوا للنصر الأكبر : ويحولوا مؤمن لملحد ...!
لكن كل شيء راح في قعده واحده .. في جلسه واحده ..

-- إزاي يا أستاذ شفلور ؟؟.. إزاي ...؟

^^ أنا هاقولكوا ...
النموذج التالت ده .. كان شاب سوري مسلم .. يعني القصة حديثة شويه ...
شاف بعينه اللي ما حدش شافه من إنجازاتنا الأخيرة مع إخواننا النصيريين .. قتل وتقطيع وتشويه وتعذيب واغتصاب ..
هوا أصلا ًكان شاب في حاله قبل الثورة .. لا هو متدين .. ولا هو اللي بايظ قوي .. هو من النوع اللي بنصنفه ونعامله عندنا تحت بند : غافل .. يعني غفلته دي مفيده عشان تخليه دايما يبعد عن الدين .. هو كويس كده .. ودي الأوامر اللي كانت مع القرين بتاعه من شيطانه .. إنه يخليه على حاله وده ويحافظ عليه .. لا عيزينه يتقدم خطوة لقدام فيتعرف على دينه وإلتزاماته ويجمع الملايكه حوليه .. ولا حتى في المقابل هانخليه يرجع لورا في الذنوب والمعاصي الكبيره : لأنها ممكن تفوقه وتغير حاله وتلفت نظره للتوبه وللدين ..
المهم ...
كان الشاب ده عايش حياة الغفلة والبلاده لحد ما بدأت الثورة وشاف اللي شافه ...
بدأ يتغير ...
نسي أيام العيشة الحيوانية : أكل + شرب + معاكسة بنات + عمل + نوم ..
في الأول : كان فاكر إنه نسي الحاجات دي والعيشة دي : لأنها هي نفسها اختفت مع الظروف اللي جدت في بلاده !!..
لكن مع الوقت ...
بدأ يتكلم بلسان الدين والضمير !!!..
بدأ يتكلم عن معاني الشرف والعزة والعرض والجهاد والدفاع !!..
بدأ يشارك في معارك ويروح يمين وشمال مع المقاومة ...
وهنا ...
كان لازم شيطانه يبدأ يغير من خطته معاه شويه .. لأنه ما بقاش غافل زي الأول ...
وهنا : انتقل بيه لخطة قديمه ومعروفه عندنا من عمر البشر نفسهم ..! بل من عمر الشر نفسه وأول قتل وأول حرب !
خطة اللعب بالنفوس الرقيقة .. وخصوصا اللي ما عندهاش أي خلفية من العلم ولا الدين ..
وفورا ً: الشيطان إدا أوامره للقرين بتاعوا إنه يبدأ يركز مع الشاب ده في التفكير في اللي بيشوفه !!..
وطبعا إحنا عندنا طرق فعاله جدا نبرز بيها مشاهد القتل والتعذيب والتشويه والاغتصاب في عقول أمثاله :
لدرجة الوسواس القهري كمان لو قدرنا ... بس في حاله زي حالته دي :
كان يكفينا بس إنها تملا عليه تفكيره بالصورة والوجهه اللي إحنا عايزينها ... وبدأنا زرع أسئلتنا المعروفة كالعادة معاها :
فين ربنا من اللي بيحصل ده كله ؟...
فين رحمة ربنا بالمؤمنين ؟؟.. بعباده المسلمين ؟؟.. بالأطفال الرضع والشيوخ والنساء ؟؟؟..
معقوله لو فيه ربنا : كان يشوف كل ده وما ياخدش الظالمين أخذ عزيز مقتدر ؟..
وطبعا إنتو عارفين الباقي ...
المهم ...
الشاب ده فعلا بدأ يتغير ...
بدأ يظهر في كلامه كلمات تزمر وعدم رضا ...
ضعفت همته في الحرب والمقاومة .. يعني لولا دفاعه عن المستضعفين والمظلومين ما كان عاد يمسك سلاح !
القرين بتاعه كان مزقطط . والشيطان اللي فوقيه كان خلاص بيعد نفسه لاستثبال كافر جديد .. ملحد طازه ..
وبالفعل كل مؤشراتنا على الشاب ده إنه كان خلاص في طريقه للإلحاد ... ولأحضان إبليس بيمشي ..
لكن فجأة ...
وفي قعده واحده بس جمعته مع شيخ سني دمشقي ..
قلب موازين الشاب 180 درجة !!!..
حول الشاب من ورقة نبات بتموت وبتدبل : لشعلة نار بتحرق إخواننا من الإنس والجن للأسف !!!..
رمى أسئلته كلها للشيخ ده وهما مستخبيين مع بعض في خندق تحت بيت عملوه الثوار ...
وبدأ الشيخ يتكلم ...
عرفه الأول إزاي هما كانوا ناسيين الله : فنسيهم الله !!.. وسأل الشيخ الشاب : صح ؟
فرد الشاب : صح !!.. عرف ساعتها أد إيه هو كان غافل عن الحق في دينه ودنيته : حياته وأخرته !!..
بدا الشيخ يحكيله الحال اللي كانوا فيه .. الاستسلام اللي استسلموه من زمان لإخواننا النصيريين وإعلامهم التبويظي فخر فساد الأخلاق في بلاد الشام !!.. حكاله عن استسلام الكتير من أهل السنة لمضايقات المخابرات والأمن .. لحد ما وصلوا لدرجة من الجبروت لا يتخيلها بشر .. كل ده بالابتعاد عن الدين ..!
وصلوا لدرجة الزنا والبوظان العلني .. وصلوا لدرجة مساواة السني مع الشيعي مع الدرزي مع العلوي النصيري ! بل : مع النصراني !
كل ده كان بينتشر بينهم وهما غافلين .. مستسلمين .. قلة منهم اللي كانوا صاحيين .. أو بيقاوموا على قد ما يقدروا ..
لكن للأسف : لما بيحل غضاب الله وعذابه : بيحل على الكل ... الشيخ قاله كده ...
وقاله إنه يبقى نعمه من الله إنه ينجي عباده اللي كانوا بيأمروا بالمعروف وينهوا عن المنكر !!..
وبدأ الشاب يتغير في دقايق وهو بيسمع من الشيخ تحت ضرب النار !!!..
وبدأ الشيخ يتكلم عن رحمة ربهم وحكمة ربهم !!..
وقاللوا إن رحمة ربهم غير رحمة البشر .. هي شيئ غير الشفقة .. هي شيء بيكتب للمؤمنين الأحسن في الدنيا أو الآخرة !.. يعني ممكن يصيب المؤمن شر في الدنيا - أيا ًما كان فظاعة ذلك الشر - فيكون أفضل ليه في الآخرة : أو أفضل لمجموع المسلمين نفسهم في الدنيا والآخرة !!.. ممكن يموت إنسان صالح موته بشعه : فيكون ده سبب يقظة شعبه اللي كان نايم ومستسلم !!.. وبمقياس أكبر : ممكن بموت شعب وتعذيبه ببشاعه : فيكون ده سبب يقظة أمه كانت نايمه ومستسلمه !!..
الشيخ كان قوي الحجة قوي اللسان قوي المنطق واثق وثابت النفس شجاع !!!..
كان حوليه ملايكه : ما قدرش حتى القرين بتاع الشاب يقرب منهم ساعتها ولا شيطانه ...
وبدأ الشاب نفسه تجيله ملايكه هو كمان : كل ما يزيد اقتناعه بكلام الشيخ !!..
وكان الشيطان وقرينه هايتجننوا !!!..
وبدأ الشيخ يقول للشاب آيات من القرآن والسنة : إن ربهم عارف كل اللي بيحصل ده ..
عارف بالظالمين والمظلومين .. عارف بالقتلة والمقتولين ..
يقدر ينصر المستضعفين في أي وقت بأسباب ومن غير أسباب لو شاء ..
لكن كل شيء هو بيجريه ويصرفه ويوقته بحكمه .. الابتلاء الشديد له وقته وله حكمته : حتى مع الرسل والأنبياء بتوعهم والناس اللي معاهم : لحد ما يقولوا وزي ما جه في القرآن : متى نصر الله ؟!!.. ألا إن نصر الله قريب !!.. فليه الخوف وليه التزمر وليه عدم الرضا ؟!!.. وقاللوا مش ربهم بيقول : ولو يشاء الله لانتصر منهم ؟!.. ولكن : ليبلوا بعضكم ببعض !!.. فزي ما ربنا كان حاضر وقت تعذيب وموت المؤمنين أصحاب الأخدود : واللي حفر الكفار ليهم الشقوق الكبيرة في الأرض وملوها نار ورموهم فيها : برضه ربنا حاضر وكل الظلم والقتل والتعذيب والتشويه والاغتصاب ده بيحصل !!.. منه جزء من ذنوبنا .. ومنه جزء بيحيي بقية الدين اللي كادت تختفي من بلادنا : فصارت اليوم في ظهور وبتزيد !!.. ومنه جزء بيمهد لتحفيز الأمه على إنها تصحى وتفوق للمعارك الأقوى اللي جايه ...
والدليل إنت !!.. الشيخ قالها للشاب .. هل إنت دلوقتي بعد اللي حصل : كنت زي الأول ؟!!..

-- يقصد المعارك الكبرى والدجال الجايه ؟؟؟..

^^ أكيد هو بيقصد حاجه زي كده ... أنا اتعمدت أنقل ليكوا كل اللي دار على قد ما اقدر : عشان مهم جدا تعرفوا الشيوخ دول بيفكروا ازاي : وازاي بيقدروا في لحظات يقلبوا نصرنا هزيمة للأسف !!!.. لازم تتعلموا منطقهم عشان تحاولوا توسوسوا فيه للناس اللي زي الشاب ده ...

-- طب وإيه اللي حصل بعدها يا أستاذ شفلور ؟!!..

^^ كالعادة ... الشيخ أقسم للشاب ده إنهم هاينتصروا .. وإن النصر صبر ساعه !!.. وإن زي ما كان الخذلان نصيب أصحاب نار الأخدود بعد اللي عملوه في المؤمنين : وإن أهل الإيمان في الآخر بيظهروا ولا يُستأصلوا : أقسم ليه إنهم هما كمان هاينتصروا : لأن الأحداث دي صنعت من شعبهم مؤمنين من جديد : عايزين ينصروا الله على النصيري بشار اللي بيدعي إنه إله !!.. كان قسم الشيخ للشاب : شيء مهيب !.. شيء ما فيهوش ذرة تردد ولا عدم ثقة !!.. شيء بيعتمد زي ما قاله على آية القرآن : ولينصرن الله مَن ينصره !!.. حتى ولو ما معهمش سلاح إلا الطوب والعصي واللي يقدروا عليه !!.. وما النصر إلا من عند الله !!..
وذكر ليه أوقات ومصايب كانت أصعب على المسلمين من اللي حصل لسوريا ده !!.. ذكر ليه دخول التتار العراق والفظائع اللي عملوها فيها ..! وذكر ليه دخول الصليبيين القدس والإجرام والوحشية اللي عملوها فيها ..
وفي اللحظات دي :
اتحرق الشيطان والقرين مع بعض : من كتر الملايكة اللي اتجمعت حولين الشاب والشيخ ...!
ودي كانت آخر حاجه بلغهالنا القرين بتاع إخواننا النصيريين شياطين الإنس قبل أما يهرب من المكان هو كمان ..
ودلوقتي ...
مين يقدر يقولنا الدروس المستفادة ؟!!..

-- أكيد أول وأهم درس : إننا نبعد بالشباب الغافل ده عن الشيوخ بتوعهم والعلماء والدعاة !!.. دول شر مستطير على كل مجهوداتنا الجايه ..! صح يا أستاذ ؟

^^ صح يا .. بليس .. بليسبعاج ؟؟؟..

-- أيوه يا أستاذ .. محسوبك بليسبعاج ...

## فيه هنا سؤال كمان يا أستاذ ...

^^ اسأل يا فاركشميش ...

## طبعا وزي ما ظهر دلوقتي : إن واحد من أسهل طرق الإلحاد : هو استغلال الجهل بالدين + رقة النفس أو الشفقة المبالغة .. والسؤال يا أستاذنا : هل ده سهل في أوقات الحروب بس ؟؟.. ولا فيه مواقف تانيه كمان ممكن نقوم فيها بالخدعة دي مع البني آدمين المؤمنين ؟؟؟..

^^ سؤال رائع يا فاركشميش .. مش بقولك أنا متوقع ليك مستقبل باهر ..
أيوه يا سيدي .. الأصل اللي بنلعب عليه واحد .. وإنما صوره في حياة البشر كتيره ...
وخصوصا عند ضعيفي الإيمان اللي تعلقهم بالدنيا وما فيها وأحبابهم فيها كبير ...
يعني بمعنى تاني : خصوصا مع اللي نظرتهم لحياة بعد الموت : ضعيفه ..
فدول هما أكتر ناس بتأثر فيهم الخدعة دي ...
لأنهم لما بيشوفوا حاجه من مآسي الدنيا زي الحروب والحوادث والظلم الطاغي إلى آخره :
بتكبر في عنيهم وقلوبهم وعقولهم جدا مصيبتها : لأن نظرتهم للآخرة ضعيفه !!.. ولو كانوا صاحيين :
لكان على الأقل عملوا باللي بيقولو دينهم من إن الشريرين لهم العذاب : والمظلومين والمستضعفين المؤمنين ليهم الجنة !
وده ينقلنا لدرس تاني مستفاد :
وعشان نوصل الحلقة من آخرها لأولها .. بمعنى : إن ده ينبهنا لضرورة نشر حالة الغفلة وقلة العلم الديني بين المؤمنين !
لأن من أكبر ثمار الغفلة دي : هي ضعف النظرة الأخروية في عنيهم وقلوبهم .. بيفصلوا الدنيا عن الآخرة والحساب ويستهينوا بفكرة يوم القيامة أو على الأقل بتتهمش في عقولهم وما يبقاش ليها وجود حقيقي فعال في اللي بيشوفوه في حياتهم ولا حتى أقوالهم وأفعالهم ...
أما باقي ثمار الغفلة دي والجهل الديني : فحاجات ثابته ومعروفه وعلى رأسها : جهلهم بصفات ربهم اللي بيعبدوه !!.. فتلاقيهم مره يشككوا في علمه أو قدرته أو رحمته أو حكمته !!!.. وحتى لو ما ظاهرش ده في كلام منهم واضح وصريح : بيظهر في بعض كلامهم ووتعليقاتهم وتصرفاتهم ..
وساعتها بس :
بنعرف إن الواحد فيهم وقع : وعلينا نمد ليه إيد المساعده .........

نياها ها ها ها .... ها ها ها .... نياااا

ترررررررررررررررررن .. ترررررررررررن ... ترررررررررررررررررررن

## يا خسارة يا أستاذ شفلور .. ما لحقتش تخلص ضحكتك ؟
هو الفصل اللي بعد كده إيه ؟؟؟..

يُـتبع بإذن الله ...